.jpg)
កម្ពុជាមិនទាន់ទទួលបានភ្ញៀវទេសចរចិនច្រើននៅឡើយទេ នាសប្តាហ៍ដំបូងនេះ។ ហុង មិនា
ភ្នំពេញៈ បើទោះបីរដ្ឋាភិបាលចិនអនុញ្ញាតឱ្យជនជាតិខ្លួនអាចធ្វើដំណើរចេញទៅកម្សាន្ត ឬវិនិយោគនៅក្រៅប្រទេសឡើងវិញបន្ទាប់ពីការរឹតបន្តឹងដោយសារវិបត្តិជំងឺកូវីដ១៩ក្ដី ក៏ចំនួនភ្ញៀវជនជាតិចិនដែលធ្វើដំណើរមកកម្ពុជាក្នុងសប្តាហ៍ដំបូងបន្ទាប់ពីការប្រកាសបើក ហាក់មិនទាន់មានកំណើនគួរឱ្យកត់សម្គាល់នៅឡើយ។
ក្រសួងទេសចរណ៍ និងវប្បធម៌ប្រទេសចិន កាលពីថ្ងៃទី២០ ខែមករា បានប្រកាសថា ប្រទេសចិននឹងចាប់ផ្តើមបើកឱ្យមានការធ្វើដំណើរទស្សនាឡើងវិញទៅកាន់ប្រទេសដែលត្រូវបានជ្រើសរើស។
កម្មវិធីសាកល្បងនេះនឹងចាប់ផ្តើមពីថ្ងៃទី៦ ខែកុម្ភៈ ដើម្បីអនុញ្ញាតឱ្យក្រុមហ៊ុន និងភ្នាក់ងារទេសចរណ៍បើកដំណើរការទេសចរណ៍ក្រៅស្រុកទៅកាន់ប្រទេសចំនួន២០ មានដូចជា កម្ពុជា ថៃ ឥណ្ឌូនេស៊ី ម៉ាល់ឌីវ ស្រីលង្កា ហ្វីលីពីន ម៉ាឡេស៊ី សិង្ហបុរី ឡាវ ចក្រភពអារ៉ាប់រួម អេហ្ស៊ីប កាន់យ៉ា អាហ្វ្រិកខាងត្បូង ស្វ៊ីស ហុងគ្រី នូវែលសេឡង់ ហ្វីជី គុយបា និងអាហ្សង់ទីន។
លោកធៀម ធឿងប្រធានសមាគមមគ្គុទេសក៍ទេសចរណ៍ភាសាចិនកម្ពុជា(នៅខេត្តសៀមរាប) បានប្រាប់ភ្នំពេញប៉ុស្តិ៍ក្នុងថ្ងៃទី១៣ ខែកុម្ភៈថា ចំនួនភ្ញៀវទេសចរបរទេស ពិសេសជនជាតិចិនដែលធ្វើដំណើរមកខេត្តសៀម រាប ក្នុងរយៈពេល១សប្តាហ៍កន្លងមកគឺមិនទាន់កើនឡើងគួរឱ្យកត់សម្គាល់ទេ ប៉ុន្តែចំនួននេះអាចនឹងហក់ឡើងនៅពេលឆាប់ៗ ព្រោះរូបលោក និងមគ្គុទ្ទេសក៍ទេសចរណ៍ជាច្រើនរូប គឺបានទទួលសារតាមប្រព័ន្ធ We Chat ពីភ្ញៀវជនជាតិចិនដើម្បីសាកសួរពីស្
លោកនិយាយថា៖«សម្រាប់ពេលនេះភ្ញៀវចិនមិនទាន់មកច្រើនទេ ប៉ុន្តែវានឹងអាចកើនឡើងខ្ពស់ក្នុងពេលឆាប់ៗ ព្រោះស្ថានភាពនៃជំងឺកូវីដ១៩ នៅប្រទេសចិនកាន់តែធូរស្រាល ហើយរដ្ឋាភិបាលកម្ពុជាក៏ប្រកាសបើកចំហទទួលភ្ញៀវពីគ្រប់ប្រទេសផងដែរ»។
លោកប្រាប់ទៀតថា ភ្ញៀវទេសចរចិនស្ទើរ ១០០ភាគរយធ្វើដំណើរមកកម្ពុជាតាមជើងហោះហើរផ្ទាល់ពីប្រទេសចិន គឺមិនដូចភ្ញៀវមកពីប្រទេសមួយចំនួនដែលចូលទស្សនានៅប្រទេសជិតខាងរួច ទើបបន្តដំណើរមកកម្ពុជាទេ។ ជាមធ្យមភ្ញៀវទេសចរចិនធ្វើដំណើរមកកម្សាន្តនៅកម្ពុជាចន្លោះពី ៣-៥យប់។
បើតាមលោកធួនស៊ីណានប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាទោះបីរដ្ឋាភិបាលកម្ពុជាបានប្រកាសបើកចំហក្នុងការទទួលភ្ញៀវទេសចរពីគ្រប់ប្រទេស និងតំបន់ក៏ដោយ ក៏ក្នុងសប្តាហ៍ដំបូងនេះហាក់នៅមានចំនួនតិចតួចនៅឡើយ។
លោកថ្លែងថា៖«សម្រាប់ការវាយតម្លៃថាភ្ញៀវទេសចរបរទេស ពិសេសជនជាតិចិន នឹងកើនឡើងកម្រិតណាក្នុងពេលនេះ គឺខ្ញុំមិនទាន់អាចវាយតម្លៃបានទេ ដោយយើងគួររង់ចាំមើលដល់ខែមីនាសិន ទើបអាចវាយតម្លៃបាន»។
រដ្ឋមន្ត្រីក្រសួងទេសចរណ៍ លោក ថោង ខុន កាលពីថ្ងៃទី៧ ខែកុម្ភៈ បាននិយាយថា៖«ឆ្នាំនេះយើងនឹងប្រឹងប្រែងឱ្យបានទេសចរចិនប្រហែល ៨០ម៉ឺនទៅ១លាននាក់ ដោយក្នុងខែមករា កន្លងមកយើងទើបទទួលបានទេសចរចិនប្រហែល ២៥ ០០០នាក់ប៉ុណ្ណោះ ដែលតាមធម្មតាទេសចរចិនមកកម្ពុជា ក្នុង១ខែ(មុនឆ្នាំ២០២០) អាចមានជិត ២០ម៉ឺននាក់។ ប៉ុន្តែឥឡូវនេះគិតក្នុង១ថ្ងៃយើងទើបទទួលបានប្រហែល ១ពាន់នាក់តែប៉ុណ្ណោះ ដូច្នេះយើងត្រូវធ្វើយ៉ាងណាឱ្យទេសចរចិនកើនដល់ ៧-៨ពាន់នាក់ក្នុង ១ថ្ងៃ នោះសភាពការណ៍នឹងត្រឡប់មកដូចដើមវិញ(មុនវិបត្តិកូវីដ១៩)»។
លោកនាយករដ្ឋមន្ត្រី ហ៊ុន សែន ក្នុងពិធីបើកការដ្ឋានសាងសង់ស្ពានឆ្លងកាត់ទន្លេមេគង្គ ខេត្តក្រចេះ និងផ្លូវតភ្ជាប់ កាលពីថ្ងៃទី២ ខែមករា ឆ្នាំ២០២៣ ធ្លាប់បានប្រកាសបើកទទួលភ្ញៀវទេសចរចិន ដោយមិនរើសអើង(ប្រទេសមួយចំនួនមានភាពស្ទាក់ស្ទើរក្នុងការទទួលភ្ញៀវជនជាតិចិន ដោយបារម្ភពីស្ថានភាពនៃការឆ្លងរាលដាលជំងឺកូវីដ១៩ នៅប្រទេសចិន) ដោយលោកលើកឡើងថា បើភ្ញៀវទេសចរចិនមកកម្ពុជាច្រើន វានឹងធ្វើឱ្យសេដ្ឋកិច្ចកម្ពុជារីកលូតលាស់កាន់តែខ្លាំង ខណៈវិស័យកសិកម្ម ឧស្សាហកម្ម និងសេវាកម្ម(លើកលែងវិស័យទេសចរណ៍)បានបង្ហាញពីកំណើនជាបន្តបន្ទាប់រួចទៅហើយ។
លោកបន្ថែមថា ទេសចរចិននឹងចូលរួមចំណែកយ៉ាងច្រើនក្នុងការជំរុញកំណើនសេដ្ឋកិច្ចកម្ពុជានៅក្នុងដំណាក់កាលនេះ ក៏ដូចជានៅពេលអនាគត។
ទិន្នន័យក្រសួងទេសចរណ៍ បង្ហាញថា ក្នុងឆ្នាំ២០២២ កម្ពុជាទទួលបានភ្ញៀវទេសចរអន្តរជាតិសរុប ២ ២៧៦ ៦២៦នាក់ កើនឡើង ១ ០៥៨,៦ភាគរយបើធៀបនឹងឆ្នាំ២០២១ ដែលមានចំនួន ១៩៦ ៤៩៥នាក់។ ក្នុងឆ្នាំ២០២២ កម្ពុជាទទួលបានភ្ញៀវចិន ១០៦ ៨៧៥នាក់ កើនឡើង ១៣៣,៥ភាគរយធៀបឆ្នាំ២០២១។ ក្នុងឆ្នាំ២០១៩ ដែលជាឆ្នាំកម្ពុជាទទួលបានភ្ញៀវទេសចរអន្តរជាតិច្រើនបំផុតជាង ៦,៦លាននាក់ គឺភ្ញៀវចិន មានចំនួន ២ ៣៦១ ៨៤៩នាក់៕
