.jpg)
លោកឌិត ទីណា នៅក្នុងសន្និបាតពីថ្ងៃ ១៣ កុម្ភៈ។ រូបថត ក្រសួងកសិកម្ម
ភ្នំពេញៈ ក្នុងឆ្នាំ ២០២២ កម្ពុជាអាចផ្គត់ផ្គង់សាច់សម្រាប់តម្រូវការក្នុងស្រុកបានរហូត ៩៥ ភាគរយ ខណៈការផ្គត់ផ្គង់ផលិតផលទាំងក្នុងស្រុកនិងនាំចេញមានទឹកប្រាក់ប្រមាណជាង ២ ពាន់លានដុល្លារ ក៏ប៉ុន្ដែរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានជំរុញបន្ថែមទៀតឱ្យមន្ត្រីដោះស្រាយបញ្ហាទាក់ទងនឹងផលិតផលសត្វឱ្យបានទាន់ពេល។
ការអះអាងនេះបានធ្វើឡើងនៅពិធីបើកកិច្ចប្រជុំបូកសរុបការងារសុខភាពសត្វ និងផលិតកម្មសត្វប្រចាំឆ្នាំ ២០២២ និងលើកទិសដៅការងារឆ្នាំ ២០២៣ នៅថ្ងៃទី ១៣ ខែកុម្ភៈ ឆ្នាំ ២០២៣ របស់អគ្គនាយកដ្ឋានសុខភាពសត្វ និងផលិតកម្មសត្វ។
តាមក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា វិបត្តិសកលនៃជំងឺកូវីដ ១៩ បានរុញច្រានសេដ្ឋកិច្ចកម្ពុជាឱ្យធ្លាក់ដល់ (៣,១ភាគរយ) ក្នុងឆ្នាំ ២០២០ ហើយសង្គ្រាមអ៊ុយក្រែនរុស្ស៊ី និងបញ្ហាប្រឈមធំៗផ្សេងទៀតបាននិងកំពុងបន្តជះឥទ្ធិពលមកលើសេដ្ឋកិច្ចកម្ពុជា។
ក្រសួងបានបន្តថា រាជរដ្ឋាភិបាលកម្ពុជា បានជម្នះបញ្ហាប្រឈមឧបសគ្គ និងការលំបាកនានានិងបានស្តារសេដ្ឋកិច្ចកម្ពុជាឱ្យសម្រេចបានកំណើន៣ភាគរយក្នុងឆ្នាំ ២០២១ និង ៥,២ ភាគរយក្នុងឆ្នាំ ២០២២ ហើយគេរំពឹងថា នឹងអាចសម្រេចកំណើនរហូត ៧ ភាគរយដូចមុនវិបត្តិកូវីដ ១៩។
ក្រសួងកសិកម្មបានបញ្ជាក់ថា «ចំពោះការងារចិញ្ចឹមសត្វ គឺសម្រេចកំណើនបាន ៨,៨ ភាគរយក្នុងឆ្នាំ ២០២២ ហើយជាលទ្ធផលកម្ពុជាអាចផ្គត់ផ្គង់សាច់សម្រាប់តម្រូវការក្នុងស្រុកបានរហូត ៩៥ ភាគរយ ហើយផលិតកម្មសាច់ ការនាំចេញសត្វ និងផលិតផលសត្វ គឺមានទំហំទឹកប្រាក់ប្រមាណជាង ២ ពាន់លានដុល្លារ ក្នុងឆ្នាំកន្លងទៅ។ លើសពីនេះទៀតរោងចក្រក្នុងស្រុក ២៦ មានសមត្ថភាពផលិតចំណីសត្វជាង ១,៥ លានតោន /១ ឆ្នាំដែលអាចផ្គត់ផ្គង់បាន ៦៧ ភាគរយនៃតម្រូវការក្នុងស្រុក»។
ក្នុងឱកាសនោះ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានថ្លែងថា ថ្នាក់ដឹកនាំ និងមន្ត្រីគ្រប់លំដាប់ថ្នាក់នៃអគ្គនាយកដ្ឋានសុខភាពសត្វ និងផលិតកម្មសត្វ បានខិតខំប្រឹងប្រែងជម្នះរាល់ការលំបាក និងបញ្ហាប្រឈមនានា ក្នុងការបំពេញតួនាទី និងភារកិច្ចប្រកបដោយការទទួលខុសត្រូវ ទោះបីក្នុងបរិបទជំងឺកូវីដ១៩ក្តីរហូតសម្រេចបានលទ្ធផលល្អប្រសើរដោយអនុវត្តលើសផែនការដល់ទៅ ១១ ភាគរយ។
យ៉ាងណាក្ដី លោកឌិត ទីណា បានជំរុញឱ្យអគ្គនាយកដ្ឋានសុខភាពសត្វ និងផលិតកម្មសត្វត្រូវពិនិត្យ និងចាត់អាទិភាពការងារដោយមានផែនការច្បាស់លាស់ តម្រង់ទិសទាំងការងារជំនាញ និងនយោបាយ ព្រមទាំងត្រូវចំណាយឱ្យចំគោលដៅ និងមានប្រសិទ្ធភាពការងារពិតប្រាកដ ដើម្បីសម្រេចបាននូវផលិតកម្មសត្វក្នុងការធានាដល់សន្តិសុខស្បៀង។
លោកបានបញ្ជាក់ថា៖ «ការធ្វើផែនការគឺត្រូវផ្តោតគិតគូរលើសន្តិសុខស្បៀង និងនិរន្តរភាព ផ្អែកលើអាហារមានជីវជាតិតាមទំនៀមទម្លាប់ និងវប្បធម៌ ដោយដាក់សន្តិសុខស្បៀងជាអាទិភាព។ ទន្ទឹមនឹងនេះ ត្រូវមានការយោគយល់នូវសាសនា និងអនាម័យ និងភូតគាមអនាម័យព្រមទាំងធ្វើការបែងចែងឱ្យច្បាស់លាស់ជាមួយនឹងច្បាប់រដ្ឋ»។
លោកបានបន្ថែមថា៖ «លើសពីនេះទៀតត្រូវធ្វើយ៉ាងណាឱ្យទាំងអ្នកចិញ្ចឹម អ្នកបរិភោគ និងអ្នកពាក់ព័ន្ធក្នុងខ្សែចង្វាក់ផលិតកម្មសប្បាយចិត្ត យល់ត្រឹមត្រូវ មិនមានការយល់ច្រឡំអំពីគោលនយោបាយរបស់រាជរដ្ឋាភិបាល។ ចំពោះការងារសត្តឃាតដ្ឋាន គឺត្រូវធ្វើឱ្យប្រសើរឡើង និងមានស្តង់ដា មាននិរន្តរភាព និងមានផលចំណេញ ដើម្បីបម្រើជាតិប្រជាជនពិតប្រាកដ»។
តាមរយៈសន្និបាតនេះ លោក ឌិត ទីណា ក៏បានណែនាំឱ្យមន្ដ្រីគ្រប់លំដាប់ថ្នាក់ព្យាយាមជំរុញបន្ថែម និងដោះស្រាយបញ្ហាប្រឈម ដោយកុំបណ្ដែតបណ្ដោយឱ្យបញ្ហានៅចាក់ស្រែះគ្មានដំណោះស្រាយ។ ជាមួយនេះលោកបានស្នើឱ្យអគ្គនាយកដ្ឋានវិភាគពីតម្លៃសត្វ និងចំណូលចំណាយ ដែលអាចតម្រង់ទិសទាន់ពេលវេលា ហើយត្រូវពិនិត្យឡើងវិញ និងមិនត្រូវឱ្យមានការិយាធិបតេយ្យឡើយ តែត្រូវរក្សាធនធានមនុស្សមានសមត្ថភាព និងធ្វើការឱ្យមានប្រសិទ្ធភាព ឱ្យមានការទទួលខុសត្រូវទៅតាមជំនាញ និងបច្ចេកទេសផ្ទាល់។
ម្ចាស់កសិដ្ឋានចិញ្ចឹមសត្វម្នាក់នៅខេត្តកំពង់ឆ្នាំង សុំមិនបញ្ចេញឈ្មោះ បានបង្ហាញក្តីសប្បាយចិត្ត ដែលរដ្ឋមន្ត្រីក្រសួងបានជំរុញឱ្យមានវិធានការ និងដំណោះស្រាយសម្រាប់បញ្ហាផលិតកម្មសាច់នៅកម្ពុជា។ អ្នកស្រី បានរំពឹងថា បញ្ហាដែលកសិករ ឬអ្នកចិញ្ចឹមសត្វបានជួបប្រទះនឹងត្រូវបានដោះស្រាយប្រកបដោយប្រសិទ្ធភាព ដោយអ្នកស្រី បានអះអាងថា ការចិញ្ចឹមសត្វនៅកម្ពុជាបច្ចុប្បន្ន គឺកំពុងដំណើរការបានល្អ និងប្រកបដោយស្តង់ដា។
អ្នកស្រីបានបញ្ជាក់ថា៖ «ក្នុងបទពិសោធន៍ដែលខ្ញុំចិញ្ចឹមសត្វមកជិត ១០ ឆ្នាំនេះ គឺកាន់តែល្អទៅៗ គ្រាន់តែពេលខ្លះយើងនៅប្រឈមនឹងបញ្ហាដដែលៗដូចជា បញ្ហានាំចូលផលិតផលគ្មានគុណភាពពីប្រទេសជិតខាង។ បញ្ហាអគ្គិសនីដែលមានតម្លៃថ្លៃ ហើយងាកដាច់ៗធ្វើឱ្យប៉ះពាល់ដល់ពួកយើងដែលត្រូវចំណាយច្រើន។ ប្រសិនបើក្រសួងអាចដោះស្រាយបញ្ហាទាំងអស់នេះបានទៀត គឺកាន់តែប្រសើរដល់ពួកយើង»។
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា ស្វាគមន៍ចំពោះការដាក់ចេញវិធានការក្នុងការដោះស្រាយបញ្ហានានា ជាពិសេសពាក់ព័ន្ធនឹងតម្លៃលើទីផ្សារដែលប្រជាកសិករតែងបានជួបប្រទះជាយូរមកហើយ។
លោកបានរំពឹងថា ចំណាត់ការរបស់រដ្ឋមន្ត្រីក្រសួងកសិកម្មថ្មី នឹងជំរុញឱ្យមានដំណោះស្រាយសមស្របមួយ ដែលជំរុញឱ្យពលរដ្ឋទទួលបានអត្ថប្រយោជន៍ជាពិសេសអ្នកចិញ្ចឹមសត្វនេះតែម្តង។
លោកបានបញ្ជាក់ថា៖ «ខ្ញុំស្នើឱ្យរដ្ឋមន្ត្រីក្រសួងកសិកម្ម និងក្រសួងពាក់ព័ន្ធផ្សេងៗទៀតជុំវិញដំណើរការដោះស្រាយបញ្ហាតម្លៃលើទីផ្សារសម្រាប់ផលិតផលសាច់ដោយធ្វើយ៉ាងម៉េចឱ្យមានតម្លៃសមរម្យ និងលើកទឹកចិត្តឱ្យមានការផ្គត់ផ្គង់នូវការចិញ្ចឹមបន្ថែមសម្រាប់ម្ហូបអាហារនិងការនាំចេញ រួមនឹងការប្រើប្រាស់ផលិតផលក្នុងស្រុក។ បើយើងប្រើផលិតផលក្នុងច្រើន យើងនឹងទទួលបានភាពល្អប្រសើរ និងសមស្រប ហើយពលរដ្ឋដែលប្រកបរបរទាំងនោះនឹងកាន់តែល្អប្រសើរ»៕
វីដេអូ៖
