ភ្នំពេញៈ​ថ្លែង​ក្នុង​សន្និសីទ​សារព័ត៌មាន​ស្តីពី ​«​ភាព​ជោគជ័យ​រយៈពេល​ ៥ ឆ្នាំក​ន្លងមក​របស់រ​ដ្ឋ​បាល​ខេត្ត​កំពង់ធំ​» ដែល​ធ្វើឡើង​នៅ​ទីស្តីកា​រគណៈរដ្ឋមន្ត្រីកាលពី​ព្រឹក​ថ្ងៃទី ១៤ ខែ​កម្ភៈ​ ​អភិបាល​ខេត្តកំពង់ធំ លោក ងួន រតនៈ ​បានឱ្យដឹ​ងថា ខេត្តកំពង់ធំ​មាន​សមត្ថភាព​ផលិត​ស្រូវ​បាន ៦០ ទៅ ៧០ ម៉ឺន​តោន ​ក្នុង​ ១ ឆ្នាំ ដែល​ទំហំ​ផលិត​នេះ​​ខេត្ត​អាច​ធានាបាន​សុវត្ថិភាព​ស្បៀង និង​អាច​បម្រុង​ទុក​សម្រាប់​ការនាំចេញ​ជា​សេដ្ឋកិច្ច​បាន​៥០​ម៉ឺន​តោន​ក្នុង​១​ឆ្នាំ​។

​លោក​អភិបាល​ខេត្តកំពង់ធំ​ថ្លែងថា​៖ «​ផ្ទៃដី​ដាំ​ដុះ​សម្រាប់តែ​ដំណាំ​ស្រូវ​ គឺមាន​ផ្ទៃដី​រហូត​ទៅដល់២៥៣ពាន់​ហិកតាហើយ​នៅ​ក្នុងនោះ​ក៏​យើង​មាន​ហេដ្ឋារចនាសម្ព័ន្ធ​គាំទ្រ​ដល់​គុណភាព​ស្រូវគឺមាន​ស​ម្ងួ​តនិង​សមត្ថភាព​នៃ​កា​រស​ម្ងួ​ត​ផងដែរ​។​ជាក់ស្តែង​ទិន្នផល​ស្បៀង​បម្រុង​ដែល​ពី​ដើម​យើង​និយាយ​ពី​សន្តិសុខ​ស្បៀងមកដល់​ចំពោះមុខ​នេះ​សន្តិសុខ​ស្បៀង​មិនមាន​ការព្រួយបារម្ភ​ទៀត​ទេ​»​។

​លោក ងួន រតនៈ បាន​លើក​ឡើងថា ជា​មួយ​នឹង​ភាព​រីកចម្រើន​នៃ​វិស័យ​កសិកម្ម​នេះ​រដ្ឋបាល​ខេត្ត​កំពង់ធំ​បាន​និង​កំពុង​ជួស​ជុល​ប្រព័ន្ធ​ធារា​សាស្ត្រដែល​ជា​ហេដ្ឋា​រចនា​សម្ព័ន្ធ​គាំទ្រ​ទៅ​ដល់​លទ្ធ​ភាព​នៃ​ការ​ផលិត​ស្រូវ​ទាំង​ប្រាំង ​និង​វស្សា​។លោក​បាន​ឱ្យដឹង​ថា ជាក់​ស្តែង​ស្រូវ​ប្រាំង​នៅ​ខេត្ត​កំពង់ធំ​មាន​ទំហំ​រហូត​ទៅដល់​ជាង ៦ ​ម៉ឺន​ហិក​តា ប៉ុន្តែ​លទ្ធ​ភាព​ពាក់​ព័ន្ធ​នឹង​ប្រព័ន្ធ​ធារា​សាស្ត្រដែល​មាន​ដូច​ជា អាង​ទឹក ប្រឡាយ​មេ ប្រ​ឡាយ​រង ជា​ដើម​នោះ ​ខេត្ត​កំពង់ធំ​អាច​ផ្តល់​សុវត្ថិ​ភាព​ទឹក​ដល់​ដំណាំ​ស្រូវ​បាន​តែ​ចំនួន ២៥ ​០០០​ហិកតា​ប៉ុណ្ណោះ​។

​លោក​អភិ​បាល​ខេត្ត​កំពង់ធំ​បញ្ជាក់​ថា ខេត្ត​មាន​ប្រភពទឹ​ក​សំខាន់ៗគឺជា​ស្ទឹង​សំខាន់ៗ​ចំនួន​៤គឺ​ស្ទឹង​ស្ទោង​ ស្ទឹងសែន ស្ទឹង​តាំងក្រ​សាំង និង​ស្ទឹង​ជី​និ​តដែល​ជា​ប្រភពទឹក​អាច​មាន​ចលនា​រហូត​ធ្វើឱ្យ​ពលរដ្ឋ​អាច​ម្ចាស់ការ​ក្នុងការ​គ្រប់​គ្រង​ទឹក​បន្ថែម​ទៅលើ​លទ្ធភាព​ដែល​រដ្ឋ​បាន​ផ្តល់ឱ្យទើប​ការដាំ​ស្រូវ​ប្រាំង​បាន​រហូតដល់​ជាង៦​ម៉ឺន​ហិកតា​។

​លោក​ងួន រតនៈ បាន​ឱ្យដឹ​ងថា តាមរយៈ​គោលន​យោ​បាយ​​ដីធ្លី​របស់​រាជរដ្ឋាភិ​បាល​​ផ្តល់ជូន​ស​ម្រាប់​ពលរដ្ឋ​អាស្រ័យ​ផល​ក្នុង​តំបន់​ជុំវិញ​បឹង​ទន្លេសា​ប ព្រមទាំង​ការ​កាត់​ឆ្វៀល​ពី​គម្រប​ព្រៃឈើ២​០២២និង​ដែន​ការពារ​គម្រប​បរិស្ថាន​ផ្សេងៗ​ទៀត​នោះ​ ផ្ទៃដី​ដាំ​ដុះ​នៅ​ខេត្តកំ​ពង់ធំ​នឹងមាន​ការកើន​ឡើង​កាន់​តែ​ច្រើន​បន្ថែម​ទៀត​ធ្វើឱ្យ​លទ្ធ​ភាព​ផលិត​កសិកម្ម​ក្នុង​ខេត្ត​កំពង់ធំ​កាន់តែ​មាន​ទំហំ​ធំ​។

​លោក​អភិបា​លខេត្ត​បានឱ្យ​ដឹង​បន្ថែមថា ជាមួ​យនឹង​គម្រោង​គាំទ្រ​របស់​ក្រសួង​ធនធាន​ទឹក និង​ឧតុ​និ​យមនៅ​ឆ្នាំ​២០២៣​នេះ ​ខេត្ត​កំពង់ធំ​នឹងធ្វើ​ទំនប់​២​បន្ថែម​ទៀត​ ដើម្បី​បង្កើន​បរិមាណ​ទឹក​ និង​ជួយ​គាំទ្រ​ពង្រីក​ការ​ដាំដុះ​។​ទំនប់​ទាំង​២​នោះ​ទី​១ស្ថិត​ក្នុង​ប៉ែក​ខាង​លើ​គឺ​នៅ​ឃុំ​ដង​កាំបិ​តនៃ​ស្រុក​សណ្តាន់ ​និង​ទី​២ស្ថិត​ក្នុង​ប៉ែក​ខាងក្រោម​គឺ​នៅ​ឃុំ​កំពង់​គោនៃ​ស្រុក​កំពង់​ស្វាយ ​ខេត្ត​កំពង់​ធំ​។

​លោក​ថ្លែង​ថា​៖«​ជ្រុង​១​នៃ​ដំណាំ​ស្រូវ​រួមទាំង​ហេដ្ឋារ​ចនាស​ម្ព័ន្ធ​រូប​វន្ដដែល​នឹងមាន​ក្នុង​ពេល​ដ៏​ខ្លី​ខាង​មុខទាំង​ហេ​ដ្ឋា​រចនា​សម្ព័ន្ធ​ដឹក​ជញ្ជូន និង​ហេ​ដ្ឋា​រចនា​សម្ព័ន្ធ​គាំទ្រ​វិស័យ​ទឹក​នេះ​ជា​មួយ​ផ្ទៃដី​ដែល​ទទួ​លបាន​ពី​គោលន​យោបាយ​ខ្ញុំ​សង្ឃឹមថា​ជ្រុង​១​នៃ​ដំណាំ​ស្រូវ​នឹង​មាន​ការ​រីក​ចម្រើន​»​។

​លោក​ប៉ែន វណ្ណ​​រិ​ទ្ធ ប្រធាន​មន្ទី​រកសិកម្ម ​រុក្ខា​ប្រមាញ់ និង​នេសាទ​ បាន​ឱ្យដឹង​ថា ការ​ផលិត​ស្រូវ​ក្នុង​ខេត្ត​កំពង់ធំ​ជា​មធ្យម​បាន ៤​តោន​ក្នុង​១​ហិក​តា ​ប៉ុន្តែ​ជាក់​ស្តែង​នៅ​តំបន់​ខ្លះ​ខេត្តកំ​ពង់ធំ​អាច​ផលិត​បាន ៧​តោន​ក្នុង​១​ហិក​តា និង​កន្លែង​ខ្លះទៀត​បាន​រហូត​ដល់ ជិត​១០ ​តោន​ក្នុង​១​ហិកតា​ក៏មាន​។ យ៉ាង​ណា​ក្ដី ការ​ផលិ​ត​ស្រូវ​នេះ​គឺ​អាស្រ័យ​លើ​កត្តា​ដី កត្តា​ពូជ​ អាកាស​ធាតុ និង​កត្តា​ថែទាំ​។

​លោក​ថ្លែង​ថា​៖«​កន្លែង​ខ្លះ​យើង​ធ្វើបាន​ជិត​១០​តោន​[​ក្នុង​១​ហិកតា​] ហើយ​កត្តា​ដែល​បាន​ហ្នឹង​គឺ​ធ្វើ​ស្រូវ​ប្រាំង​ ដោយ​មាន​កត្តា​៤​យ៉ាង​សំខាន់​ដូច​ខ្ញុំ​និយាយ​ខាង​ដើម​នេះ​គឺ​យើង​អាច​ធ្វើ​បាន​»​។

​លោក​ប្រធាន​មន្ទី​រកសិកម្ម​ខេត្ត​កំពង់​ធំ​បាន​ឱ្យដឹង​ថា នៅ​តាម​បណ្តា​ប្រទេស​មួយ​ចំនួន​ដូច​ជា ​តៃវ៉ាន់ និង​ចិន​ជា​ដើម​គេ​អាច​ផលិត​បាន​ជិត ១៥​តោន ​ក្នុង​១​ហិក​តា ហេតុនេះ​បើ​ប្រៀប​ធៀប​ជាមួយ​បណ្តា​ប្រទេស​១​ចំនួន​ កម្ពុជា​នៅ​ផលិត​បាន​ទាប​នៅ​ឡើយ​។ លោក​បញ្ជា​ក់ថា ក្រសួង​កសិក​ម្ម រុក្ខា​ប្រមាញ់ និង​នេសាទកំពុង​ជំរុញ​ការ​ផលិត​ដោយ កត្ដា​ជ្រើស​រើស​ពូជ កត្តា​បច្ចេក​ទេស និង​កត្តា​ដី​។

លោក​​ថ្លែងថា​៖«​សព្វថ្ងៃនេះ​កំពុង​គិតពី​គោ​លនយោ​បាយ​ដី តើ​ដី​ណា​ដែល​ត្រូវជា​១​ដំណាំ​អី​ឱ្យ​កសិករ​គាត់​ទៅធ្វើ​ហ្នឹង ឱ្យ​ត្រូវ​នឹង​ដី​ហ្នឹង គឺ​កសិក​ម្ម​ចង្អុល​បង្ហាញ​គាត់​ហើយ​គាត់​ទៅ​ផលិត​អាហ្នឹង​ទៅ ​អា​ហ្នឹង​អាច​បាន​ចំណេញ​ហើយ​»៕