ភ្នំពេញៈ ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន មានសុទិដ្ឋិនិយមថា បុណ្យទន្លេលើកទី៧ ឆ្នាំ ២០២៣ ដែលរៀបចំក្នុងខេត្តកំពង់ធំ នៅខែក្រោយនឹងមានភ្ញៀវទេសចរជាតិអន្តរជាតិជាច្រើនចូលរួម ខណៈនេះជាលើកទី១ ដែលរដ្ឋាភិបាលអនុញ្ញាតឱ្យរៀបចំពិធីនេះឡើងវិញចាប់តាំងពីឆ្នាំ ២០២០។
ពិធីបុណ្យទន្លេ លើកទី៧ ឆ្នាំ ២០២៣ នឹងរៀបចំធ្វើក្នុងបរិវេណសួនស្ទឹងសែន ខេត្តកំពង់ធំ ចាប់ពីថ្ងៃទី ៨-១០ ខែមីនា ក្រោមប្រធានបទ «ទន្លេរបស់យើង ដើម្បីបច្ចុប្បន្ន និងអនាគត»។
ថ្លែងប្រាប់ ភ្នំពេញ ប៉ុស្តិ៍ កាលពីថ្ងៃទី ២០ ខែកុម្ភៈ លោកស្រី ឆាយ ស៊ីវលីន បានឱ្យដឹងថា ពិធីបុណ្យទន្លេលើកទី៧ នាពេល ខាងមុខនឹងមានភ្ញៀវជាច្រើនចូលរួម ព្រោះជាលើកទី១ ហើយដែលពិធីនេះធ្វើឡើងវិញបន្ទាប់ពីអាក់ខានរយៈពេល ២ ឆ្នាំ ដោយសារវិបត្តិនៃការឆ្លងរាលដាលកូវីដ ១៩។ បច្ចុប្បន្នដំណើរការនៃការរៀបចំកំពុងដំណើរការទៅមុខយ៉ាងរលូន។ លោកស្រីបន្តថា ក្នុងខេត្តកំពង់ធំមានរមណីយដ្ឋានទេសចរណ៍ជាច្រើនទាំងបែបប្រវត្តិសាស្ត្រ ធម្មជាតិ និងអេកូទេសចរណ៍ ដូចជា ភ្នំសន្ទុក, ប្រាសាទសម្បូរព្រៃគុក, ព្រៃប្រស់, ភូមិបណ្តែតទឹក (ផាត់សណ្តាយ)។
លោកស្រីបញ្ជាក់ថា៖ «ខ្ញុំគិតថានឹងមានភ្ញៀវទេសចរជាតិ និងអន្តរជាតិជាច្រើនទៅចូលរួមក្នុងពិធីបុណ្យទន្លេនាពេលខាងមុខ ខណៈនេះជាឆ្នាំដំបូងដែលរដ្ឋាភិបាលសម្រេចរៀបចំពិធីនេះឡើងវិញ បន្ទាប់ពីវិបត្តិកូវីដ ១៩»។
លោកស្រី ស៊ីវលីន បានឱ្យដឹងទៀតថា ក្រៅពីបំផុសគំនិតប្រជាជនឱ្យធ្វើដំណើរកម្សាន្តក្នុងប្រទេស ពិធីនេះក៏ជាការផ្សព្វផ្សាយទៅកាន់ភ្ញៀវអន្តរជាតិឱ្យធ្វើដំណើរចូលមកកម្សាន្តនៅកម្ពុជាកាន់តែច្រើនផងដែរ។
លោកស្រីប្រាប់ទៀតថា បើតាមលោក ថោង ខុន រដ្ឋមន្ត្រីក្រសួងទេសចរណ៍ គឺក្រសួងនឹងជំរុញឱ្យមានការរៀបចំកម្មវិធីផ្សព្វផ្សាយពីសក្តានុពលវិស័យទេសចរណ៍កម្ពុជា ឱ្យបានកាន់តែច្រើននៅទូទាំងប្រទេស ដើម្បីទាក់ទាញទេសចរជាតិ និងអន្តរជាតិឱ្យធ្វើដំណើរមកកម្សាន្តនៅកម្ពុជាកាន់តែច្រើន។
ក្នុងសប្តាហ៍កន្លងមក អភិបាលខេត្តកំពង់ធំ លោក ងួន រតនៈ ក៏បានជួបប្រជុំជាមួយ លោក ថោង ខុន រដ្ឋមន្ត្រីក្រសួងទេសចរណ៍ និងលោក យូ ស៊ុនឡុង រដ្ឋមន្ដ្រីប្រតិភូអមនាយករដ្ឋមន្ដ្រី ដើម្បីត្រួតពិនិត្យការងាររៀបចំពិធីបុណ្យ ទន្លេលើកទី ៧ ដែលនឹងមានការចូលរួមពីលោកនាយករដ្ឋមន្ត្រី ហ៊ុន សែន។
ពិធីបុណ្យទន្លេត្រូវបានរៀបចំលើកទី១ ក្នុងឆ្នាំ ២០១៥ នៅខេត្តក្រចេះ, ឆ្នាំ ២០១៦ នៅខេត្តស្ទឹងត្រែង, ឆ្នាំ ២០១៧ នៅខេត្តកំពង់ចាម និងខេត្តត្បូងឃ្មុំ, ឆ្នាំ ២០១៨ នៅខេត្តកណ្ដាល, ឆ្នាំ ២០១៩ នៅខេត្តកំពង់ឆ្នាំង និងឆ្នាំ ២០២០ នៅខេត្តបាត់ដំបង។ វិបត្តិនៃជំងឺកូវីដ ១៩ រាជរដ្ឋាភិបាលបានផ្អាកកម្មវិធីនេះក្នុងឆ្នាំ ២០២១ និងឆ្នាំ ២០២២៕