ភ្នំពេញៈ ពាណិជ្ជកម្មអន្តរជាតិកម្ពុជានៅក្នុងខែដំបូង ឆ្នាំ ២០២៣ មានទឹកប្រាក់សរុបជិត ៣,៥ ពាន់លានដុល្លារធ្លាក់ចុះជិត ១/៣ បើធៀបនឹងរយៈពេលដូចគ្នាឆ្នាំ ២០២២។ នេះបើតាមទិន្នន័យអគ្គនាយកដ្ឋានគយ និងរដ្ឋាករកម្ពុជា។
ស្ថិតិជញ្ជីងពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា បង្ហាញថា ក្នុងខែមករា ឆ្នាំ ២០២៣ ការនាំចេញចូលទំនិញរបស់កម្ពុជាជាមួយប្រទេសនានាលើពិភពលោក មានទឹកប្រាក់សរុប ៣ ៤៩០,១៩៨ លានដុល្លារ ធ្លាក់ចុះ ២៨.៨ ភាគរយ ពី ៤ ៨៩៩,៧៤៤ លានដុល្លារកាលពីខែមករា ឆ្នាំ ២០២២។ សម្រាប់ទឹកប្រាក់នាំចេញទំនិញនៅក្នុងខែមករា ឆ្នាំ ២០២៣ គឺ ១ ៥៦៧,៨៦៧ លានដុល្លារ ធ្លាក់ចុះ ១៣,៩ ភាគរយ និងការនាំចូលទំនិញ ១ ៩២២,៣៣១ លានដុល្លារ ធ្លាក់ចុះ ៣៧,៥ ភាគរយ។ បើតាមតួលេខខាងលើ គឺជញ្ជីងពាណិជ្ជកម្មអន្តរជាតិកម្ពុជាមានឱនភាពចំនួន ៣៥៤,៤៦៣ លានដុល្លារ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ និយាយថា តាមអ្វីដែលលោកដឹង គឺចំនួននៃការបញ្ជាទិញទំនិញសក្តានុពលកម្ពុជាពីទីផ្សារគោលដៅធំៗបានចាប់ផ្តើមធ្លាក់ចុះតាំងពីឆមាសទី ២ ឆ្នាំ ២០២២ ដែលបញ្ហានេះគឺទាក់ទងនឹងកំណើនសេដ្ឋកិច្ចពិភពលោកដែលស្ថិតក្នុងភាពមិនប្រាកដប្រជា។ ឥទ្ធិពលនៃវិបត្តិជំងឺកូវីដ ១៩ ជម្លោះភូមិសាស្ត្រនយោបាយ និងសង្គ្រាមនៅប្រទេសអ៊ុយក្រែន បានធ្វើឱ្យប្រជាជននៃប្រទេសនីមួយៗបង្កើនការរឹតត្បិតការចំណាយរបស់ខ្លួន។
លោកប្រាប់ភ្នំពេញប៉ុស្តិ៍ក្នុងថ្ងៃទី ២០ ខែកុម្ភៈ ថា៖ «វិបត្តិសុខភាព និងសេដ្ឋកិច្ចពិភពលោកកំពុងដាក់បន្ទុកកាន់តែខ្លាំងលើតម្រូវការផលិតផលដែលមិនចាំបាច់សម្រាប់ការរស់នៅប្រចាំថ្ងៃ (ក្រៅពីម្ហូបអាហារ)។ ដោយសារផលិតផលនាំចេញរបស់កម្ពុជាភាគច្រើន គឺក្នុងវិស័យវាយនភណ្ឌ និងកង់ជាដើម ដូច្នេះការបញ្ជាទិញធ្លាក់ចុះនៅពេលនេះគឺជារឿងពិបាកចៀសផុត»។ លោកបន្តថា៖«សម្រាប់សមត្ថភាពខ្សែចង្វាក់ផលិតកម្មនៅកម្ពុជា គឺមិនថយចុះនៅឡើយ»។
ទោះយ៉ាងណា លោកបញ្ជាក់ថា នេះគឺគ្រាន់តែជាតួលេខក្នុងខែដំបូងឆ្នាំ ២០២៣ ប៉ុណ្ណោះ ដោយអ្វីៗអាចនឹងមានភាពល្អប្រសើរឡើងវិញ ប្រសិនបើវិបត្តិដែលកំពុងកើតមានពេលនេះ ពិសេសជម្លោះប្រដាប់អាវុធនៅប្រទេសអ៊ុយក្រែនអាចបញ្ចប់ទៅវិញឆាប់រហ័ស។
អនុប្រធានសភាពាណិជ្ជកម្មកម្ពុជា លោក លឹម ហេង មិនអាចទាក់ទងបានទេ ប៉ុន្តែលោកធ្លាប់លើកឡើងថា កម្ពុជាកំពុងធ្វើពិពិធកម្មទំនិញនាំចេញជាបន្តបន្ទាប់ ដោយមិនពឹងផ្អែកខ្លាំងលើការនាំចេញសម្លៀកបំពាក់ ស្បែកជើង និងកាបូបធ្វើដំណើរ ដូចទសវត្សរ៍មុនទៀតទេ ព្រោះពេលនេះក្រៅពីផលិតផលវាយនភណ្ឌ កម្ពុជាក៏បាននាំចេញផលិតផលជាច្រើនមុខទៀតដូចជា គ្រឿងបង្គុំអគ្គិសនីអេឡិចត្រូនិក, កង់ និងផលិតផលកសិកម្ម ជាដើម។
លោកអះអាងថា៖ «ក្នុងឆ្នាំ ២០២៣ នេះ ទំហំពាណិជ្ជកម្មអន្តរជាតិរបស់កម្ពុជានឹងបន្តកើនឡើងធៀបនឹងឆ្នាំ ២០២២ ដោយក្នុងនោះផលិតផលនាំចេញរបស់កម្ពុជាកាន់តែមានលក្ខណៈចម្រុះជាងមុន ខណៈការនាំចូល ភាគច្រើនគឺជាវត្ថុធាតុដើម ឬធាតុផ្សំសម្រាប់ដំណើរការផលិត ដើម្បីនាំចេញទៅទីផ្សារអន្តរជាតិ»។
ការព្យាករចុងក្រោយបំផុតរបស់រាជរដ្ឋាភិបាលបង្ហាញថា ក្នុងឆ្នាំ ២០២៣ នេះ សេដ្ឋកិច្ចកម្ពុជានឹងបន្តនិន្នាការកើនក្នុងរង្វង់ ៥,៦ភាគរយ ដោយធ្លាក់ចុះពី ៦,៦ ភាគរយនៃការព្យាករកាលពីខែខែតុលា ឆ្នាំ ២០២២ ដោយសារតែភាពមិនប្រាកដប្រជានៃកំណើនសេដ្ឋកិច្ចសកលដែលបណ្តាលមកពីសង្គ្រាមរុស្ស៊ីអ៊ុយក្រែន ការប្រែប្រួលអាកាសធាតុ និងការបន្តអូសបន្លាយពេលនៃការឆ្លងរាលដាលជំងឺកូវីដ ១៩។
ធនាគារពិភពលោក (WB) កាលពីថ្ងៃទី ៧ ខែធ្នូ ឆ្នាំ ២០២២ បានព្យាករថា កំណើនសេដ្ឋកិច្ចកម្ពុជានឹងកើនដល់ ៤,៨ ភាគរយក្នុងឆ្នាំ ២០២២ និងនៅឆ្នាំ ២០២៣ កំណើនសេដ្ឋកិច្ចនឹងកើនដល់ ៥,២ ភាគរយ៕