ភ្នំពេញៈ គម្រោងវិនិយោគចំនួន ៣ ក្នុងនោះ ២ ជាគម្រោងវិនិយោគលើរោងចក្រកាត់ដេរសម្លៀកបំពាក់ និង ១ ជាគម្រោងបង្កើតរោងចក្រផលិតសម្ភារវេចខ្ចប់ ដែលមានទុនវិនិយោគសរុប ១៧,៦ លានដុល្លារ និងបង្កើតការងារបាន ៦ ៤៨២ កន្លែងត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តឱ្យចាប់ផ្តើមដំណើរការសាងសង់។
បណ្តាញសង្គមផ្លូវការរបស់ CDC កាលពីថ្ងៃទី២២ ខែកុម្ភៈ បានឱ្យដឹងថា យោងតាមសំណើសុំវិនិយោគរបស់ក្រុមហ៊ុន គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ឱ្យក្រុមហ៊ុនចំនួន ៣ ដែលរួមមាន គម្រោងបង្កើតរោងចក្រកាត់ដេរសម្លៀកបំពាក់របស់ក្រុមហ៊ុន Pengjiao (Cambodia) Industrial Co., Ltdមានទីតាំងវិនិយោគនៅស្រុកបាទី ខេត្តតាកែវ ក្រោមទុនវិនិយោគប្រមាណ ៧លានដុល្លារ អាចបង្កើតការងារបាន ៣ ២៥៨ កន្លែង គម្រោងបង្កើតរោងចក្រកាត់ដេរសម្លៀកបំពាក់ របស់ SshCb Sustainable Fashion Co., Ltd នៅក្នុងស្រុកសំរោងទង ខេត្តកំពង់ស្ពឺ មានទុនវិនិយោគ ៥,១ លានដុល្លារ អាចបង្កើតការងារបាន ២ ១៤៨ កន្លែង និងគម្រោងបង្កើតរោងចក្រផលិតសម្ភារវេចខ្ចប់ របស់ក្រុមហ៊ុន Zhong Shan TengFei (Cambodia) Packaging Material Co., Ltd នៅស្រុកឧដុង្គ ខេត្តកំពង់ស្ពឺ ក្នុងទុនវិនិយោគ ៥,៥ លានដុល្លារ និងអាចបង្កើតការងារបាន ១ ០៧៦ កន្លែង។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ភ្នំពេញប៉ុស្តិ៍ក្នុងថ្ងៃទី២៣ ខែកុម្ភៈថា បើទោះបីស្ថានភាពនយោបាយ និងសេដ្ឋកិច្ចពិភពលោក នៅពេលនេះនៅមិនទាន់ល្អប្រសើរដូចមុនមានវិបត្តិកូវីដ១៩ ក៏កម្ពុជានៅតែអាចទទួលបាននូវកំណើននៃការចូលមកបណ្តាក់ទុនជាបន្តបន្ទាប់។
កត្តាសំខាន់ៗដែលកំពុងជួយបង្កើនភាពទាក់ទាញឱ្យវិនិយោគិនក្នុងស្រុក និងបរទេសឱ្យសម្រេចបញ្ចេញទុនវិនិយោគនៅកម្ពុជា ដែលមានដូចជា កត្តាស្ថិរភាពនយោបាយ កំណើនសេដ្ឋកិច្ចរឹងមាំ ច្បាប់វិនិយោគមានលក្ខណៈអំណោយផល មានប្រព័ន្ធអនុគ្រោះពន្ធគយពីប្រទេសធំៗ មានច្បាប់វិនិយោគអំណោយផល និងសម្បូរកម្លាំងពលកម្មជំនាញ និងមានតម្លៃសមរម្យ ជាដើម។
លោកបន្ថែមថា ក្រៅពីនោះកម្ពុជាក៏ទទួលបានភាពចំណេញពីជម្លោះភូមិសាស្ត្រនយោបាយរបស់ប្រទេសមហាអំណាច តាមរយៈការប្តូរទីតាំងរចេញពីប្រទេសទាំងអស់នោះ មកបើកដំណើរការនៅកម្ពុជាផងដែរ។
លោកលើកឡើងថា៖«ជាមួយនឹងអ្វីដែលកម្ពុជាកំពុងបាននៅពេលនេះ ខ្ញុំរំពឹងថានឹងមានក្រុមហ៊ុនធំៗលំដាប់អន្តរជាតិជាច្រើនទៀតចូលមកវិនិយោគនៅកម្ពុជា។ ការមកបើករោងចក្រ ឬអាជីវកម្មដោយផ្ទាល់បែបនេះ គឺបាននាំមកនូវចំណុចវិជ្ជមានជាច្រើនសម្រាប់សេដ្ឋកិច្ចជាតិដូចជាការបង្កើតឱកាសការងារ កាត់បន្ថយការធ្វើចំណាយស្រុកទៅធ្វើការនៅប្រទេសក្រៅ និងក៏បាននាំចំណូលពន្ធគយ និងពន្ធដារផងដែរ»។
អគ្គលេខាធិការដ្ឋាននៃក្រុមប្រឹក្សាអភិវឌ្ឍន៍កម្ពុជា លោក សុខ ចិន្តាសោភា ក្នុងអំឡុងកិច្ចប្រជុំលើកទី២៥ នៃគណៈកម្មាធិការចម្រុះកម្ពុជា-ជប៉ុន កាលពីថ្ងៃទី២១ ខែកុម្ភៈ បានលើកឡើងថា រាជរដ្ឋាភិបាលកម្ពុជាបានប្តេជ្ញាចិត្តក្នុងការពន្លឿនការស្តារសេដ្ឋកិច្ចឡើងវិញ និងការពង្រឹងភាពធន់នៃមូលដ្ឋានសេដ្ឋកិច្ចជាតិតាមរយៈការបង្កើតបរិស្ថានអនុគ្រោះសម្រួលដល់ការវិនិយោគ។
លោកបានថ្លែងថា៖ «ក្នុងនាមតំណាងក្រសួង ស្ថាប័នពាក់ព័ន្ធនឹងការងារពាណិជ្ជកម្ម និងវិនិយោគ យើងប្ដេជ្ញាកែលម្អនីតិវិធីរដ្ឋបាលទាំងឡាយក្នុងគោលបំណងឱ្យកម្ពុជាក្លាយទៅជាផ្នែកមួយនៃខ្សែចង្វាក់ផ្គត់ផ្គង់ក្នុងតំបន់»។
ទិន្នន័យធនាគារជាតិនៃកម្ពុជា (NBC) ឱ្យដឹងថា គិតត្រឹមចុងឆ្នាំ២០២១ ការវិនិយោគផ្ទាល់ពីបរទេសនៅក្នុងប្រទេសកម្ពុជាមានទឹកប្រាក់សរុប ៤១ ពាន់លានដុល្លារ៕