ចាប់តាំងពីដើមឆ្នាំ ២០២៣ តម្លៃប្រេងឆៅបានជួញដូរក្នុងចន្លោះពី ៧២ ទៅ ៨២ ដុល្លារ (ក្នុង ១ បារ៉ែល)។ ជាមួយនឹងខ្សែចង្វាក់ផ្គត់ផ្គង់លើសពីការរំពឹងទុក និងការប្រើប្រាស់ថាមពលឡើងវិញទាបជាងការរំពឹងទុកនៅក្នុងប្រទេសចិន តម្លៃប្រេងឆៅទំនងជាប្រែប្រួលក្នុងទិសដៅធ្លាក់ចុះ។
គេហទំព័រ Bloomberg បានឱ្យដឹងថា៖ «តម្លៃប្រេងបាននៅទ្រឹងក្នុងសប្តាហ៍នេះ នៅពេលដែលប្រឈមមុខនឹងទិសដៅធ្លាក់ចុះ ដោយសារការកើនឡើងនៃស្តុកប្រេងនៅសហរដ្ឋអាមេរិក និងការស្ទុះងើប ឡើងវិញនៃតម្រូវការប្រើប្រាស់ដែលតិចជាងការរំពឹងទុក។
ស្តុកប្រេងឆៅរបស់អាមេរិកបានកើនឡើងជិត ២៤ លានបារ៉ែល ក្នុងរយៈពេល ២ សប្តាហ៍ចុងក្រោយនេះ ដោយបន្ថែមទៅលើទីផ្សារដែលផ្គត់ផ្គង់លើសតម្រូវការរួចទៅហើយ។ ម្យ៉ាងទៀត OILPRICE.com ក៏បានរាយការណ៍ថា ប្រទេសចិន បានបើកទ្វាររបស់ខ្លួនឡើងវិញ បន្ទាប់ពីការអនុវត្ដគោលនយោបាយ Zero-Covid ដ៏យូររបស់ខ្លួន។ ប៉ុន្តែឥឡូវនេះ រដ្ឋាភិបាល និងក្រុមហ៊ុនថាមពលជុំវិញពិភពលោកកំពុងរង់ចាំមើលថា តើវានឹងទៅជាយ៉ាងណាទាំងសម្រាប់ឧស្សាហកម្មថាមពល និងខ្សែចង្វាក់ផ្គត់ផ្គង់ពិភពលោក។
ផ្អែកលើការវិភាគបច្ចេកទេសវាបង្ហាញថា តម្លៃប្រេងនៅតែប្រែប្រួលក្រោមកម្រិតមធ្យមនៃតម្លៃក្នុងរយៈពេល ២០០ ថ្ងៃ ហើយវគ្គជួញដូរពេលព្រឹកថ្ងៃចន្ទ គឺលើសពី ៧៥ ដុល្លារ ដែលនៅជិតកម្រិតទាបប្រចាំសប្តាហ៍នៃតម្លៃ ៧២ ដុល្លារ។ សម្រាប់ការវិភាគជួញដូរក្នុងសប្តាហ៍នេះ អ្នកជួញដូរប្រេងឆៅអាចបន្តលក់ក្នុងរយៈពេលខ្លី នៅពេលដែលតម្លៃដល់ ៧៦ ដុល្លារ ដោយកំណត់មុខងារការពារហានិភ័យនៅតម្លៃ ៧៨ ដុល្លារ និងមុខងារទាញយកប្រាក់ចំណេញនៅតម្លៃ ៧២ ដុល្លារ៕