ភ្នំពេញៈ ផ្នែកឯកជនក្នុងវិស័យទេសចរណ៍បានលើកឡើងថា ការអនុញ្ញាតឱ្យភ្ញៀវបរទេសតាមនាវា យន្តហោះ ឬរថភ្លើង ចូលមកកម្សាន្តនៅកម្ពុជារយៈពេលខ្លី ដោយប្រើទិដ្ឋាការឆ្លងកាត់ប្រភេទ D នឹងជួយបង្កើនភាពទាក់ទាញទេសចរអន្តរជាតិឱ្យមកកម្សាន្តនៅកម្ពុជាកាន់តែច្រើន ខណៈកម្ពុជាកំពុងខិតខំយ៉ាងខ្លាំងក្នុងការស្តារវិស័យទេសចរណ៍របស់ខ្លួនឡើងវិញពីការធ្លាក់ចុះយ៉ាងគំហុកប្រមាណ ៣ ឆ្នាំដោយសារវិបត្តិជំងឺកូវីដ ១៩។
សេចក្តីជូនដំណឹងក្រសួងទេសចរណ៍ ចុះកាលបរិច្ឆេទថ្ងៃទី ២៤ ខែកុម្ភៈ ដែលជូនដំណឹងដល់ក្រុមហ៊ុនទេសចរណ៍ ភ្ញៀវអន្តរជាតិ និងសាធារណជនទាំងអស់ បានរៀបរាប់ថា ស្របតាមការសម្រេចរបស់ក្រសួងមហាផ្ទៃ ទេសចរអន្តរជាតិ ដែលធ្វើដំណើរឆ្លងកាត់កម្ពុជាតាមរយៈនាវាទេសចរណ៍ ហើយចូលមកទស្សនកិច្ចក្នុងរយៈពេលខ្លី គឺត្រូវបានអនុញ្ញាតឱ្យស្នើសុំប្រភេទទិដ្ឋាការឆ្លងកាត់ (D) ចាប់ពីថ្ងៃជូនដំណឹងនេះតទៅ។
សេចក្តីជូនដំណឹងបញ្ជាក់ថា៖ «ប្រភេទទិដ្ឋាការឆ្លងកាត់ (D) ត្រូវបានផ្តល់ជូនសម្រាប់ជនបរទេសមិនមែនអន្តោប្រវេសន៍ដែលជាអ្នកដំណើរឆ្លងកាត់ អ្នកបើកបរ បុគ្គលិក និយោជិត និងកម្មករលើយានយន្ត រថភ្លើង នាវា ឬយន្តហោះ និងអាចស្នាក់នៅព្រះរាជាណាចក្រកម្ពុជារយៈពេល ៥ (ប្រាំ)ថ្ងៃ ស្របតាមអនុក្រឹត្យលេខ ១២៣ អនក្រ.បក ចុះថ្ងៃទី ១០ ខែមិថុនា ឆ្នាំ ២០១៦ ស្តីពីបែបបទសម្រាប់អនុវត្តចំពោះការអនុញ្ញាតឱ្យជនបរទេសមិនមែនអន្តោប្រវេសន៍ចូល ចេញ និងស្នាក់អាស្រ័យ នៅព្រះរាជាណាចក្រកម្ពុជា»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានប្រាប់ ភ្នំពេញ ប៉ុស្តិ៍ នៅថ្ងៃទី ១ ខែមីនាថា ការសម្រេចរបស់រដ្ឋាភិបាលចំពោះការផ្តល់ទិដ្ឋាការឆ្លងកាត់ប្រភេទ D ដល់អ្នកបើកបរ បុគ្គលិក និយោជិត និងកម្មករលើយានយន្ត រថភ្លើង នាវា ឬយន្តហោះសម្រាប់ការស្នាក់នៅរយៈពេលខ្លី (៥ថ្ងៃ) នឹងជួយឱ្យកម្ពុជាកាន់តែអាចទាក់ទាញភ្ញៀវបរទេសឱ្យចូលមកកម្សាន្តនៅកម្ពុជាកាន់តែច្រើន។
លោកថ្លែងថា៖ «ការសម្រេចបន្ធូរបន្ថយរបស់រដ្ឋាភិបាលនៅពេលនេះ នឹងរួមចំណែកបន្ថែមទៀតក្នុងការទាក់ទាញភ្ញៀវឱ្យធ្វើដំណើរមកកម្ពុជាកាន់តែច្រើន»។ លោកបន្តថា៖«ទោះយ៉ាងណាខ្ញុំមិនអាចវាយតម្លៃថា កម្ពុជានឹងទទួលបានកំណើនភ្ញៀវកម្រិតណាទេព្រោះកន្លងមកកម្ពុជា គឺមិនមែនជាគោលដៅចម្បងដែលភ្ញៀវធ្វើដំណើរតាមនាវាចូលមកកម្សាន្តដូចប្រទេសថៃ វៀតណាម និងសិង្ហបុរី ឡើយ»។
ប្រធានសមាគមទីភ្នាក់ងារទេសចរណ៍កម្ពុជា អ្នកស្រី ឆាយ ស៊ីវលីន បានប្រាប់ថា ការសម្រួលនីតិវិធីសម្រាប់ការមកដល់នៃភ្ញៀវបរទេសរយៈពេលខ្លី ដោយប្រើត្រឹមទិដ្ឋាការប្រភេទ D ព្រមទាំងការប្រកាសរបស់រដ្ឋាភិបាលចិនស្តីពីការអនុញ្ញាតឱ្យជនជាតិខ្លួនអាចធ្វើដំណើរចេញក្រៅប្រទេស (រួមទាំងកម្ពុជា) នឹងជួយឱ្យកម្ពុជាទាក់ទាញភ្ញៀវទេសចរបរទេសកាន់តែច្រើន។
លោកស្រីលើកឡើងថា៖ «នៅពេលសាមីប្រទេសបង្កភាពងាយស្រួល ការធ្វើដំណើររបស់ភ្ញៀវបរទេសទៅកម្សាន្ត ក៏មានកាន់តែច្រើនដែរ»៕