គោនៅកសិដ្ឋានគិរីសួគ៌ត្រូវបានបំពាក់ឈីបនៅកជើង។ ហុង រស្មី
តាកែវ: សត្វគោពូជ Holstein Heifer ចិញ្ចឹមយកទឹកដោះជាង ៥០០ ក្បាល បានជិះយន្ដហោះពីអូស្ដ្រាលីមកកាន់កសិដ្ឋានគិរីសួគ៌ ស្ថិតក្នុងភូមិឱភាសាំង ឃុំកណ្ដឹងស្រុកបាទី ខេត្តតាកែវ កាលពីអំឡុងសម័យកូវីដឆ្នាំ ២០២០ ហើយសព្វថ្ងៃនេះ សត្វគោទាំងនេះ កើតបានកូនចៅរហូតដល់ជំនាន់ទី ៣ ដែលមានចំនួនសរុបជាង ១ ពាន់ក្បាល។
សត្វគោទាំងនេះត្រូវបានចិញ្ចឹមដើម្បីយកទឹកដោះគោជាមួយការប្រើប្រាស់បច្ចេកវិទ្យាទំនើបចាប់ពីការប្រើប្រាស់គ្រឿងចក្រដាំដុះ ច្រូតកាត់ ចម្ការពោត ចម្ការស្មៅម៉ុមបាសា ប្រព័ន្ធស្រោចទឹក អាងស្ដុកទឹក និងស្ថានីយបូមទឹក រហូតដល់ការបំពាក់នូវបន្ទះឈីបនៅកជើងគោនីមួយៗដើម្បីតាមដានពីសុខភាព។
លោកឈរ រិទ្ធីនាយកប្រតិបត្ដិក្រុមហ៊ុន Khmer Fresh Milk (Kirisu Farm) បានឱ្យដឹងថា៖ «គ្រប់សត្វគោទាំងអស់ដែលមានអាយុពី ១២ ខែឡើង ត្រូវបានបំពាក់ឈីបនៅកជើង ដើម្បីតាមដានសុខភាពគោរៀងរាល់ពេលវេលា។ ឧទាហរណ៍គោណាមិនសូវស្រួលខ្លួន ដែលមនុស្សមិនអាចមើលដឹង តែបច្ចេកវិទ្យាឈីបអាចដឹងអំពីការដើរតិច ឈរយូរពេក ដេកច្រើនពេក ស៊ីមិនគ្រប់គ្រាន់ និងខុសប្រក្រតី»។
លោកបន្ដថា បញ្ហាទាំងនេះនឹងបង្ហាញសារព្រមានលើប្រព័ន្ធគ្រប់គ្រងភ្លាម ហើយនៅពេលពួកវាទៅមុជទឹកនិងត្រឡប់មកវិញ គោសុខភាពមិនល្អនោះនឹងជាប់នៅត្រង់ទ្វារមន្ទីរពេទ្យ និងបើកឱ្យពួកវាចូលពេទ្យដោយស្វ័យប្រវត្ដិ។
លោករិទ្ធីនិយាយថា៖ «អ៊ីចឹងចំពោះចំនួនសត្វគោរាប់រយរាប់ពាន់ អ្នកថែទាំ មិនចាំបាច់ទៅរកវានៅឯណាទេ អញ្ជើញវាទៅពេទ្យ ហើយទៅដល់នោះមានពេទ្យត្រួតពិនិត្យសុខភាពរបស់ពួកវា»។
ការបំពាក់សេនស័រ នៅលើកជើងនេះបានផ្ដល់នូវដំណោះស្រាយ ៥ យ៉ាង គឺស្វែងរកកម្ដៅអត្ដសញ្ញាណសត្វ ការប្រាប់ឱ្យដឹងពីការកើតកូន សម្រាក និងសុខុមាលភាពរបស់ពួកវា។ នេះបើយោងតាមវេបសាយដែលបំពាក់បច្ចេកវិទ្យានេះ។ វាបង្កើនអត្រាមានផ្ទៃពោះតាមរយៈការកំណត់សម្គាល់ពីសត្វដែលដល់ពេលវេលាត្រូវបង្កាត់ពូជ ដែលធ្វើការតាមដានរយៈពេល ២៤ ម៉ោង ក្នុង ១ ថ្ងៃ និង ៧ ថ្ងៃ ក្នុង ១ សប្ដាហ៍។
បច្ចេកវិទ្យាទំនើបនេះ ក៏បានកត់សម្គាល់ពីអត្ដសញ្ញាណសត្វនីមួយៗនៅតាមជួរច្របាច់ទឹកដោះ និងនៅរងបែងចែកពពួកសត្វតាមប្រភេទផ្សេងៗ។
ការប្រាប់អំពីការបង្កើតកូន ដែលផ្ដល់ព័ត៌មានពេលគោចាប់ផ្ដើមកើតកូន និងនៅពេលការកើតកូនដោយប្រើរយៈពេលយូរ។ ការប្រើប្រាស់បច្ចេកវិទ្យាគឺក្នុងបំណងផ្ដល់កិច្ចអន្ដរាគមន៍ទាន់ពេលវេលា ដែលបញ្ចៀសរាល់បញ្ហាស្មុគស្មាញ និងការងាប់កូនគោ។
លោក ជី សិលា សហស្ថាបនិកនៃក្រុមហ៊ុនខ្មែរ ហ្រ្វេសមីល ឯ.ក កសិដ្ឋានគិរីសួគ៌ប្រាប់ភ្នំពេញប៉ុស្ដិ៍ថា៖ «ចំពោះការពពោះរបស់សត្វគោចិញ្ចឹមយកទឹកដោះទាំងនេះ មានរយៈពេលជាង ៩ ខែដូចមនុស្សដែរ»។ លើសពីនេះ ប្រព័ន្ធតាមដានសុខភាព បានកំណត់សម្គាល់នូវបញ្ហាសុខភាព និងកត្ដាសុខុមាលភាពមួយចំនួនដូចជាហ្វូងគោជួបជុំច្រើនពេកមិនសូវដេកធ្វើសកម្មភាពច្រើនពេក ឬបញ្ហាផ្សេងៗ ដែលរំខានសេចក្ដីសុខរបស់គោនិងអាចប៉ះពាល់ផលិតផលរបស់ពួកវា។
អ្នកនាង ឆែម ភីណា ជាជំនួយការអ្នកគ្រប់គ្រងកសិដ្ឋានគិរីសួគ៌ បានប្រាប់ ភ្នំពេញ ប៉ុស្ដិ៍ថា៖ «ចំពោះការបំពាក់បន្ទះឈីប នៅកជើងគោនៅអាយុ ១២ ខែពួកវាឈានដល់ពេញវ័យ ដែលអាចបង្កាត់ពូជ ពីព្រោះកជើងនេះ មានអត្ថប្រយោជន៍សំខាន់សម្រាប់តាមដានសកម្មភាពគោដែលត្រូវការរកឈ្មោល និងធ្វើការបង្កាត់ពូជត្រឹមត្រូវតាមទិន្នន័យឈីបផ្ដល់ព័ត៌មានទៅកាន់កុំព្យូទ័រ»។
លោក រិទ្ធី បានឱ្យដឹងថា ចំពោះការបឺតទឹកដោះគោចេញមកដែលបច្ចុប្បន្ននេះទទួលបានបរិមាណជាង ១ ម៉ឺនលីត្ រក្នុង ១ ថ្ងៃ កសិដ្ឋានមានមីនីឡេប ហើយពេលវារកឃើញថា ទឹកដោះគោមានបញ្ហាវានឹងច្រានចេញដោយមិនអនុញ្ញាតឱ្យហូរចូលធុងឡើយ។
លោកបន្ដថា មុនពេលចេញជាផលិតផលទឹកដោះគោផ្សេងៗ ដូចជាទឹកដោះគោស្រស់ ទឹកដោះគោគ្មានជាតិស្ករ ទឹកដោះគោសូកូឡា ទឹកដោះគោកាហ្វេ ក៏ដូចជាយ៉ាអួរសជាតិផ្សេងៗត្រូវឆ្លងកាត់ការធ្វើតេស្ដរហូតដល់ ៥ ដង។ ទី១ ទឹកដោះគោត្រូវឆ្លង-កាត់មីនីឡេប ទី២ មុនចូលកម្ដៅសម្លាប់មេរោគ (pasteurize) វាត្រូវធ្វើតេស្ដជារួមម្ដងទៀតហើយដល់ដំណាក់ទី៣ ពេលសម្លាប់មេរោគត្រូវធ្វើតេស្ដម្ដង។ មុនច្រកដបត្រូវធ្វើតេស្ដម្ដងហើយ ៤៨ ម៉ោងធ្វើតេស្ដម្ដងទៀត។
នាយកប្រតិបត្ដិគិរីសួគ៌រូបនេះ លើកឡើងថា៖ «បើសិនឆ្លងកាត់តេស្ដទាំង ៥ ដងជាប់ យើងអាចនាំផលិតផលទាំងនោះទៅកាន់ទីផ្សារបាន។ យើងអាចធានានូវអនាម័យ និងគុណភាពទាំងការវេចខ្ចប់ដែលទទួលបានការគាំទ្រពីសំណាក់ប្រជាជនលើផលិតផលខ្មែរ»។
លោក ជី សិលា បានរំឭកថា តាំងពីការសាងសង់រហូតដល់ទទួលបានទឹកដោះគោ ១ តំណក់ដំបូង មានរយៈពេល ៤ ឆ្នាំជាងនិងបានចែកចាយនៅលើទីផ្សាររួមទាំងផ្សារទំនើប ផ្សារធម្មតាចន្លោះពី ២ ពាន់ ទៅ ៣ ពាន់កន្លែង។ លោកបន្តថា៖ «ក្នុងន័យនេះក៏យើងគិតថា វាជាការជោគជ័យជំហានទី ១ ដែលយើងបានឈរក្នុងនាមជាក្រុមហ៊ុនក្នុងស្រុក ១ ហើយក៏ជាកសិដ្ឋានផលិតទឹកដោះគោទី ១ ដែលយើងមានទំហំចែកចាយធំហើយមានការផលិតធំ»។
សហស្ថាបនិករូបនេះបានឱ្យដឹងថា ក្រោយវិបត្ដិកូវីដ ១៩ បានធូរស្រាល កសិដ្ឋានបានបើកទ្វារទទួលសិស្សសាលា ទទួលភ្ញៀវជាច្រើន ដើម្បីទៅទស្សនកិច្ច ក៏ដូចជាសិក្សា ដោយសារកសិដ្ឋានគិរីសួគ៌ ជាកសិដ្ឋានប្រើបច្ចេកវិទ្យាទំនើប Big Data Technology មិនត្រឹមតែគ្រឿងចក្រម៉ាស៊ីននិងបច្ចេកវិទ្យា AI ក្នុងការតាមដានសុខភាពសត្វគោ ទាំងការផឹកទឹក ឬមិនផឹកទឹក សូម្បីតែការស្រោចស្រពដំណាំ ក៏ប្រើប្រាស់បច្ចេកវិទ្យាតាម IoT (Internet of Things)។
លោក រិទ្ធី នាយកប្រតិបត្ដិក្រុមហ៊ុន Khmer Fresh Milk បានបន្ថែមថា៖ «យើងនាំមនុស្សម្នាក់ទៅមើលកសិដ្ឋាន ហើយមនុស្សម្នាក់នោះ បន្ដផ្សព្វផ្សាយទៅកាន់មនុស្សយ៉ាងតិច ១០ នាក់ទៀត»។
លោកនិយាយថា ចំពោះការរក្សាទុកទឹកដោះគោ កសិដ្ឋានផលិតទឹកដោះគោក្នុងស្រុកនេះ ចង់កែទម្លាប់របស់ប្រជាពលរដ្ឋដោយសារទឹកដោះគោនេះ ជាប្រភេទទឹកដោះគោស្រស់សុទ្ធដែលមិនអាចទុកនៅបរិយាកាសខាងក្រៅបានយូរនោះទេ។
រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានថ្លែងនៅពេលលោកធ្វើទស្សនកិច្ចទៅកាន់កសិដ្ឋានគិរីសួគ៌ កាលពីថ្ងៃទី ២៤ ខែកុម្ភៈថា ការចិញ្ចឹមគោយកទឹកដោះ ដោយមានកិច្ចសហការជាមួយអ្នកបច្ចេកទេសអ៊ីស្រាអែលមួយនេះ បានជួយពង្រីកនូវអាហារូបត្ថម្ភសម្រាប់កុមារតាមរយៈការទទួលទានទឹកដោះគោល្អ ដែលមានជីវជាតិគ្រប់គ្រាន់ឱ្យអាចក្លាយជាកីឡាករមានសមត្ថភាព និងក្លាយជាអ្នកស្រាវជ្រាវដែលមានខួរក្បាលល្អ។
ទាំងនេះបានធ្វើឱ្យកសិដ្ឋានគិរីសួគ៌ ឈ្នះពានសហគ្រិនភាពថ្នាក់ជាតិ ឆ្នាំ ២០២២ និង GREEN AWARD ពីកម្មវិធី ASEAN Young Entrepreneur Awards ២០២២៕
