.jpg)
ទីតាំងគម្រោងអភិវឌ្ឍន៍កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំង។ រូបថត ក្រសួងសាធារណការ
ភ្នំពេញៈ លោក ស៊ុន ចាន់ថុល ទេសរដ្ឋមន្ត្រី និងជារដ្ឋមន្ត្រីក្រសួងសាធារណការនិងដឹកជញ្ជូនបានណែនាំដល់គ្រប់ភាគីពាក់ព័ន្ធ សូមជួយគាំទ្រ និងជំរុញគម្រោងអភិវឌ្ឍន៍កំពង់ផែពហុបំណង និងមជ្ឈមណ្ឌលភ័ស្តុភារកម្មកំពង់ឆ្នាំង ឱ្យស្របតាមបទដ្ឋានច្បាប់ និងជំរុញឱ្យគម្រោងនេះអាចដំណើរការបានឆាប់រហ័ស ដើម្បីផលប្រយោជន៍សេដ្ឋកិច្ចជាតិ។
លោកទេសរដ្ឋមន្ត្រី បានធ្វើការណែនាំបែបនេះក្នុងកិច្ចប្រជុំពិភាក្សាអំពីវឌ្ឍនភាពគម្រោងអភិវឌ្ឍន៍កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំង ដើម្បីជំរុញការនាំចេញកសិផលតាមផ្លូវទឹក បង្កើនការងារ និងជំរុញកំណើនសេដ្ឋកិច្ចជាតិកាលពីថ្ងៃទី២ មីនា ឆ្នាំ២០២៣។
កិច្ចប្រជុំនានេះ ត្រូវបានរៀបចំឡើងដើម្បីពិនិត្យពិភាក្សាលើវឌ្ឍនភាពការងារ ត្រួតពិនិត្យវាយតម្លៃការខូចខាត និងផលប៉ះពាល់នានា ជុំវិញគម្រោងអភិវឌ្ឍន៍កំពង់ផែពហុបំណង និងមណ្ឌលភ័ស្តុភារកម្មកំពង់ឆ្នាំង របស់ក្រុមហ៊ុន KLP.T TRANSPORTATION Co.,Ltd ។
បើតាមក្រសួងសាធារណការ ការរៀបចំឱ្យមានជាកំពង់ផែ និងមជ្ឈមណ្ឌលភ័ស្តុភារកម្មនេះ គឺក្នុងគោលបំណងជំរុញការដឹកជញ្ជូនតាមផ្លូវគោក និងផ្លូវទឹកក្នុងប្រទេស ព្រមទាំងការដឹកជញ្ជូន និងនាំចេញកសិផលពីខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ ទៅក្រៅប្រទេស។
ម្យ៉ាងវិញទៀតការសាងសង់កំពង់ផែ និងមជ្ឈមណ្ឌលភ័ស្តុភារកម្មនេះ ក៏បានផ្ដល់ការងារដល់ប្រជាពលរដ្ឋដែលរស់នៅក្នុងខេត្តកំពង់ឆ្នាំងបានមួយចំនួន។
បន្ទាប់ពីបានចុះត្រួតពិនិត្យ វាយតម្លៃលើផលប៉ះពាល់ពាក់ព័ន្ធនឹងគម្រោង ក្រុមការងារគម្រោងក៏បានស្ថាបនាផ្លូវភ្ជាប់ពីផ្លូវ 50C ទៅកាន់មណ្ឌលភ័ស្តុភារកម្ម និងភ្ជាប់ទៅកាន់កំពង់ផែពហុបំណងកំពង់ឆ្នាំង។
ក្រសួងសាធារណការ បានឱ្យដឹងទៀតថា គម្រោងនេះក៏កំពុងត្រូវបានបំពាក់ប្រព័ន្ធបច្ចេកវិទ្យា STM (Smart Truck Monitoring System) សម្រាប់គ្រប់គ្រងការដឹកជញ្ជូនចេញចូល ដែលរួមមានការបំពាក់កាមេរ៉ាត្រួតពិនិត្យរថយន្ដដោយស្វ័យប្រវត្តិ និងស្ថានីយជញ្ជីងថ្លឹងរថយន្តដឹកជញ្ជូន។
ប្រព័ន្ធ STM នេះ នឹងជួយជំរុញការតាមដាន គ្រប់គ្រងប្រតិបត្តិការ និងការគ្រប់គ្រងសកម្មភាពដឹកជញ្ជូនយ៉ាងមានប្រសិទ្ធភាពផងដែ៕
