សៀមរាបៈ ក្រសួងទេសចរណ៍កម្ពុជាបានឱ្យដឹងថា មន្ត្រីជាន់ខ្ពស់ក្រសួងទេសចរណ៍នៅយប់ ថ្ងៃទី៣ ខែមីនា បានរៀបចំកម្មវិធីស្វាគមន៍ជើងហោះហើរដំបូងរបស់ក្រុមហ៊ុនអាកាសចរណ៍ China Eastern Airlines លេខ MU2091 ចេញពីទីក្រុងសៀងហៃប្រទេសចិន ហោះហើរត្រង់មកកាន់ខេត្តសៀមរាប។
ក្រសួងទេសចរណ៍បានឱ្យដឹងថា នៅយប់ថ្ងៃទី ៣ ខែមីនា លោក តុប សុភ័ក រដ្ឋលេខាធិការក្រសួងទេសចរណ៍បានដឹកនាំមន្ត្រីជំនាញ រួមជាមួយរដ្ឋបាលខេត្តសៀមរាប ក្រុមហ៊ុនព្រលានយន្តហោះកម្ពុជា និងអង្គភាពពាក់ព័ន្ធ បានរៀបចំកម្មវិធីស្វាគមន៍ជើងហោះហើរដំបូងរបស់ក្រុមហ៊ុនអាកាសចរណ៍ China Eastern Airlines លេខ MU2091 ចេញពីទីក្រុងសៀងហៃប្រទេសចិន ហោះហើរត្រង់មកកាន់ខេត្តសៀមរាប តាមយន្តហោះប្រភេទ A320 ផ្ទុកអ្នកដំណើរជនជាតិចិនចំនួន ១៣២ នាក់។
លោក តុប សុភ័ក ថ្លែងថា៖«ក្រុមហ៊ុនអាកាសចរណ៍ China Eastern Airlines នឹងធ្វើការហោះត្រង់មកកាន់ខេត្តសៀមរាបជាលក្ខណៈ Regular Flight ដោយហោះហើរក្នុង ១ សប្តាហ៍ចំនួន ៣ ជើង គឺនៅថ្ងៃអង្គារ ថ្ងៃសុក្រ និងថ្ងៃអាទិត្យ។
តាមការព្យាករណ៍ ឆ្នាំ២០២៣នេះ កម្ពុជាអាចនឹងទទួលទេសចរអន្តរជាតិប្រមាណ ៤លាន នាក់ ក្នុងនោះមានទេសចរចិនប្រមាណ ៨០ ម៉ឺន ទៅ ១លាននាក់ ហើយខេត្តសៀមរាបអាចទទួលទេសចរចិន ៣០% នៃទេសចរចិនសរុបមកកម្ពុជា។ បច្ចុប្បន្នអាកាសយានដ្ឋានអន្តរជាតិសៀមរាបមានជើងហោះហើរជាមធ្យម ២៥០ ជើង ក្នុង ១ សប្តាហ៍ និងមានទេសចរអន្តរជាតិជាមធ្យមចំនួនប្រមាណ ១ ៧០០ នាក់ទៅ ១ ៨០០០ នាក់ ក្នុង ១ ថ្ងៃ៕