ភ្នំពេញៈ វិស័យទេសចរណ៍ខេត្តសៀមរាបរំពឹងទទួលបានភ្ញៀវទេសចរចិន លើសពីជាង ២០ ម៉ឺននាក់ ក្នុងចំណោមភ្ញៀវជនជាតិចិនប្រមាណជាង ៨០ ម៉ឺននាក់ ដែលអាចនឹងមកដល់កម្ពុជាក្នុងឆ្នាំ ២០២៣ ខណៈនៅក្នុងឆ្នាំនេះកម្ពុជានឹងធ្វើជាម្ចាស់ផ្ទះរៀបចំព្រឹត្តិការណ៍កីឡាក្នុងតំបន់ (ស៊ីហ្គេម និងប៉ារ៉ាហ្គេម) និងព្រឹត្តិការណ៍ក្នុងស្រុកជាច្រើន ពិសេសអង្គរសង្ក្រាន្ត។ នេះបើយោងតាមរដ្ឋលេខាធិការនៃក្រសួងទេសចរណ៍។
បន្ទាប់ពីស្ថានភាពនៃការឆ្លងរាលដាលជំងឺកូវីដ ១៩ នៅលើពិភពលោកមានភាពធូរស្រាល គេឃើញចំនួនជើងហោះហើរអន្តរជាតិមកកម្ពុជាកើនឡើងជាលំដាប់។ សម្រាប់ជើងហោះហើរត្រង់ឡើងវិញពីប្រទេសចិន (បិទដោយសារតែវិបត្តិជំងឺកូវីដ ១៩) គឺថ្នាក់ដឹកនាំក្រសួងទេសចរណ៍កម្ពុជាបានធ្វើពិធីទទួលស្វាគមន៍ការមកដល់នៅអាកាសយានដ្ឋានអន្តរជាតិទាំង ៣ របស់កម្ពុជាជាបន្តបន្ទាប់។ បច្ចុប្បន្នអាកាសយានដ្ឋានអន្តរជាតិសៀមរាប មានជើងហោះហើរជាមធ្យម ២៥០ ជើងនៅក្នុង ១ សប្តាហ៍ និងមានទេសចរអន្តរជាតិជាមធ្យម ១ ៧០០-១ ៨០០ នាក់ ក្នុង ១ ថ្ងៃ។
រដ្ឋលេខាធិការ និងជាអ្នកនាំពាក្យក្រសួងទេសចរណ៍ លោក តុប សុភ័ក ដែលបានដឹកនាំមន្ត្រីជំនាញ រួមជាមួយរដ្ឋបាលខេត្តសៀមរាប និងអង្គភាពពាក់ព័ន្ធទៅស្វាគមន៍ជើងហោះហើរដំបូងរបស់ក្រុមហ៊ុនអាកាសចរណ៍ China Eastern Airlines លេខ MU2091 ពីក្រុងសៀងហៃមកកាន់ខេត្តសៀមរាប តាមយន្តហោះប្រភេទ A320 កាលពីរាត្រីថ្ងៃទី ៣ ខែមីនា បានប្រាប់ភ្នំពេញប៉ុស្តិ៍ នៅថ្ងៃទី ៥ ខែមីនាថា ចំនួនភ្ញៀវទេសចរចិនធ្វើដំណើរមកកម្ពុជាបានកើនជាបន្តបន្ទាប់ ជាក់ស្តែងនៅក្នុងខែមករា ឆ្នាំ ២០២៣ គឺភ្ញៀវចិនចូលមកកម្ពុជាមានប្រមាណ ២៥ ០០០ នាក់ ខណៈកាលពីខែមករា ឆ្នាំ ២០២២ មានជិត ២ ៥០០ នាក់។ លោកបន្តថា China Eastern Airlines នឹងហោះត្រង់ពីសៀងហៃមកកាន់ខេត្តសៀមរាបជាលក្ខណៈ Regular Flight ដោយហោះហើរក្នុង ១ សប្តាហ៍ចំនួន ៣ ជើង គឺនៅថ្ងៃអង្គារ/សុក្រ/អាទិត្យ។
លោកថ្លែងថា៖ «តាមការព្យាករក្នុងឆ្នាំ ២០២៣ នេះកម្ពុជាអាចនឹងទទួលបានទេសចរអន្តរជាតិប្រមាណ ៤ លាននាក់ ក្នុងនោះទេសចរចិនអាចមានពី ៨០ ម៉ឺន ទៅ ១ លាននាក់ ហើយខេត្តសៀមរាបអាចទទួលទេសចរចិន ៣០ ភាគរយនៃចំនួនទេសចរចិន»។
យោងតាមលោក សុភ័ក អាជ្ញាធរកម្ពុជាបានធ្វើពិធីទទួលស្វាគមន៍ជើងហោះហើរចិនចំនួន ៣ លើកហើយ គឺលើកទី ១ នៅព្រលានយន្តហោះអន្តរជាតិកងកេង ខេត្តព្រះសីហនុ (មកពីទីក្រុងគួនមីង) កាលពីថ្ងៃទី ២៧ ខែមករា ឆ្នាំ ២០២៣, លើកទី ២ នៅព្រលានយន្តហោះអន្តរជាតិភ្នំពេញ (មកពីទីក្រុងប៉េកាំង) កាលពីថ្ងៃទី ៧ ខែកុម្ភៈ, និងលើកទី ៣ នៅព្រលានយន្តហោះអន្តរជាតិខេត្តសៀមរាប (មកពីក្រុងសៀងហៃ) កាលពីថ្ងៃទី ៣ ខែមីនា ឆ្នាំ ២០២៣។
លោក ធៀម ធឿង ប្រធានសមាគមមគ្គុទេ្ទសក៍ទេសចរណ៍ភាសាចិនកម្ពុជា (ខេត្តសៀមរាប) និយាយថា ទោះបីពេលនេះ (ថ្ងៃទី ៥ មីនា) ការមកដល់របស់ភ្ញៀវទេសចរចិនក្នុងខេត្តសៀមរាបមិនទាន់មានចំនួនច្រើន ប៉ុន្តែសញ្ញាវិជ្ជមានតាមរយៈការសាកសួរព័ត៌មានរបស់ក្រុមអ្នកទេសចរ និងក្រុមហ៊ុន/ទីភ្នាក់ងារទេសចរណ៍នៅប្រទេសចិន បានកើនឡើងគួរឱ្យកត់សម្គាល់ ស្របពេលដែលចំនួនមគ្គុទ្ទេសក៍ទេសចរចិនដែលបោះបង់មុខរបរនេះ (អំឡុងវិបត្តិកូវីដ ១៩) ក៏បានចូលក្នុងវិស័យនេះជាបណ្តើរៗវិញហើយ។ បច្ចុប្បន្នក្រសួងទេសចរណ៍បានបើកវគ្គបណ្តុះបណ្តាលជាបន្តបន្ទាប់ទៅដល់អ្នកក្នុងវិស័យទេសចរណ៍កម្ពុជាផងដែរ។
លោកបន្តថា ព្រឹត្តិការណ៍អង្គរសង្ក្រាន្តក្នុងខេត្តសៀមរាបនាពេលចូលឆ្នាំខ្មែរខាងមុខ ប្រាកដជាទាក់ទាញភ្ញៀវក្នុងស្រុក និងអន្តរជាតិជាច្រើនធ្វើដំណើរទៅកាន់ខេត្តសៀមរាប។
លោកអះអាងថា៖ «រូបខ្ញុំផ្ទាល់ ក៏ដូចជាសមាជិកក្នុងសមាគមសុទ្ធតែសង្ឃឹមថា ភ្ញៀវចិននឹងមកកម្សាន្តខេត្តសៀមរាបច្រើនចាប់ពីពេលនេះតទៅ ខណៈចំនួនជើងហោះហើរកំពុងកើនឡើងនាពេលនេះ។ ជាមធ្យមភ្ញៀវចិនស្នាក់នៅកម្ពុជាចំនួន ៣ យប់»។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ថា ការសម្រេចរបស់រដ្ឋាភិបាលចិនឱ្យប្រជាជនរបស់ខ្លួនអាចធ្វើដំណើរចេញក្រៅប្រទេសកំពុងផ្តល់ផលវិជ្ជមានសម្រាប់វិស័យទេសចរណ៍កម្ពុជា ប៉ុន្តែចំនួនភ្ញៀវនឹងមិនឡើងខ្ពស់ទេ ព្រោះវិបត្តិកូវីដរយៈពេលជាង ៣ ឆ្នាំមកនេះបានធ្វើឱ្យសេដ្ឋកិច្ចពិភពលោក រួមទាំងប្រទេសចិនមិនល្អឡើយ។
លោកប្រាប់ថា៖ «ទោះបីរដ្ឋាភិបាលកម្ពុជាដាក់ចេញយុទ្ធសាស្ត្រក្នុងការទាក់ទាញភ្ញៀវទេសចរចិន (China Ready) ហើយក៏ដោយ ក៏ក្នុងឆ្នាំនេះ កម្ពុជាមិនអាចទទួលបានកំណើនភ្ញៀវទេសចរចិនឡើងខ្ពស់ទេ ដោយវាអាចត្រូវការពេល ២-៣ ឆ្នាំទៅមុខទៀត»។
បើតាមលោក ខៀវ ធី ទោះយ៉ាងណាខេត្តសៀមរាប នឹងមិនអាចទាក់ទាញភ្ញៀវចិនបានច្រើនដូចក្រុងព្រះសីហនុឡើយ ព្រោះកន្លងមកមានអ្នកវិនិយោគចិនជាច្រើនបានទៅបណ្តាក់ទុននៅខេត្តមាត់សមុទ្រមួយនេះ។
អ្នកនាំពាក្យក្រសួងទេសចរណ៍ខាងលើបានបញ្ជាក់ថា ក្រសួងទេសចរណ៍នឹងធ្វើពិធីទទួលស្វាគមន៍ជើងហោះហើរលើកដំបូងពីគ្រប់ប្រទេស/តំបន់ នៅពេលពួកគេចាប់ផ្តើមធ្វើប្រតិបត្តិការឡើងវិញបន្ទាប់ពីផ្អាកមួយរយៈដោយសារវិបត្តិជំងឺកូវីដ ១៩៕