ស្ថាន​ភាព​បច្ចុប្បន្ន​តម្លៃ​មាស​បាន​ឡើង​ដល់​កម្រិត​ខ្ពស់​រយៈពេល​ ១ ខែ​ ​នៅ​ពីថ្ងៃ​ចន្ទ ដោយបាន​ស្ទុះ​ងើប​ឡើងវិញ​យ៉ាង​ខ្លាំង​​ពី​ការធ្លាក់ចុះ​នាពេល​ថ្មីៗ​នេះ ខណៈ​ទីផ្សារ​រំពឹងថា វិបត្តិ​ធនាគារ​នៅ​សហរដ្ឋអាមេរិក​នឹង​ជំរុញ​ឱ្យ​ធនាគារ​កណ្តាល​​​អាមេរិក​បន្ធូរ​ការអះអាង​ខ្ពស់​របស់ខ្លួន​សម្រាប់​ពេល​ខាងមុខ​។

នៅ​ថ្ងៃ​ចន្ទ តម្លៃ​មាស​បាន​ធ្លាក់​ចុះក្រោម​កម្រិត​តម្លៃ​ទាប​នៅ​តម្លៃ​ប្រហែល ១ ៨០៨ ទៅ ១ ៨៩៤ ដុល្លារ (​ក្នុង​ ១​ អោន​ស៍​)។ ​តាម​បច្ចេកទេស វា​បង្ហាញថា តម្លៃ​មាស​កំពុង​ខិត​ដល់​កម្រិត​តម្លៃ​ខ្ពស់​នៃ ១ ៩០០ ដុល្លារ ចាប់តាំងពី​ខែមេសា ឆ្នាំ​​២០២២ មក​។

នៅក្នុង​ក្រាហ្វតម្លៃ​រយៈពេល​ ១​ ម៉ោង​វិញ​ ទម្រង់ Descending Triangle បង្ហាញ​ការ​ប្រែប្រួល​​ក្នុង​ចន្លោះ​ពី ១ ៨៥០ ទៅ ១ ៩០០ ដុល្លារ​ ដែល​បង្កើតបាន​តម្លៃ​មធ្យម​ប្រហែល ១ ៨៦៥ ដុល្លារ​។​

សប្តាហ៍​នេះ​ទិន្នន័យ​សេដ្ឋកិច្ច​សំខាន់ៗ​មួយចំនួន​ដែល​វិនិយោគិន​ត្រូវ​យកចិត្តទុកដាក់ និង​តាមដាន មានដូចជា​៖ Customer Price Index (៦,៤% កាលពី​ខែ​មុន និង ៦,០% សម្រាប់​ការព្យាករខែ​ថ្មី​)​ដែលជា​ទិន្នន័យ​បង្ហាញ​ពី​ស្ថានភាព​អតិផរណា​សហរដ្ឋអាមេរិក ទិន្នន័យ Producer Price Index (០,៧% កាលពី​ខែ​មុន និង ០,៣% សម្រាប់​ការ​ព្យាករខែ​ថ្មី​)​ ដែល​បង្ហាញ​ពី​កម្រិត​តម្លៃ​ទំនិញ​លក់ដុំ និង​ទិន្នន័យ Retail Sale (០,៣% កាលពី​ខែ​មុន និង-០,៣% សម្រាប់​​ការព្យាករខែ​ថ្មី​) ដែលជា​ការ​វាស់វែង​លើ​ការផ្លាស់ប្តូរ​តម្លៃ​សរុប​នៃ​ការ​លក់​នៅ​កម្រិត​លក់រាយ ដែល​វា​ជា​រង្វាស់​​​សំខាន់​នៃ​ការចំណាយ​របស់​អ្នកប្រើប្រាស់​ ដែល​រាប់បញ្ចូល​ភាគច្រើន​នៃ​សកម្មភាព​សេដ្ឋកិច្ច​ទាំងមូល​។​​ សម្រាប់​​ការវិនិយោគ អ្នកជួញដូរ​គួរតែ​រង់ចាំ​ទិន្នន័យ​ទាំងអស់នេះ​ចេញផ្សាយ​សិន​ មុននឹង​សម្រេច​ចិ​ត្ដ​ជួញដូរ​៕