ភ្នំពេញៈ លោកនាយករដ្ឋមន្ត្រី ហ៊ុន សែន បានថ្លែងថា កម្ពុជាចាំបាច់បង្កើនប្រភពថាមពលអគ្គិសនីបន្ថែមទៀត ដើម្បីបំពេញតម្រូវការដែលកំពុងកើនឡើងពីមួយឆ្នាំទៅមួយឆ្នាំនៅក្នុងវិស័យឧស្សាហកម្ម ដែលបានរួមចំណែកយ៉ាងសំខាន់ក្នុងការជំរុញកំណើនសេដ្ឋកិច្ចជាតិ។
លោក ហ៊ុន សែន ថែ្លងដូចនេះនៅក្នុងកម្មវិធីសំណេះសំណាលជាមួយប្រជាពលរដ្ឋដែលបានផ្លាស់ប្តូរទីតាំងថ្មី និងត្រួតពិនិត្យការដ្ឋានសាងសង់វារីអគ្គិសនីស្ទឹងពោធិ៍សាត់ ១ នៅថ្ងៃទី ១៤ ខែមីនា ឆ្នាំ ២០២៣។
វារីអគ្គិសនីស្ទឹងពោធិ៍សាត់ ១ គឺមានទំហំ ៨០ មេហ្គាវ៉ាត់ ស្ថិតនៅឃុំប្រមោយ ស្រុកវាលវែង ខេត្តពោធិ៍សាត់។ គម្រោងនេះត្រូវបានវិនិយោគដោយក្រុមហ៊ុនកូរ៉េខាងត្បូង SPHP (Cambodia) Co Ltd ជាមួយទឹកប្រាក់ប្រមាណ ២៣១ លានដុល្លារ ដោយគ្រោងនឹងដាក់ឱ្យដំណើរការនៅក្នុងឆ្នាំ ២០២៦។
លោក ហ៊ុន សែន បានថ្លែងថា សព្វថ្ងៃ កម្ពុជាមានតម្រូវការប្រើប្រាស់ថាមពលអគ្គិសនីសរុបជាង ២ ២០០ មេហ្គាវ៉ាត់នៅទូទាំងប្រទេស ក្នុងនោះគ្រាន់តែទីក្រុងភ្នំពេញតែមួយមានតម្រូវការថាមពលអគ្គិសនីជាង ១ ពាន់មេហ្គាវ៉ាត់។
លោកថ្លែងដូច្នេះថា៖ «ឥឡូវមានតម្រូវការចំនួន ២ ២០០ មេហ្គាវ៉ាត់ទៅហើយ ប៉ុន្តែការព្យាករទៅមុខទៀត តម្រូវការអគ្គិសនីនឹងកាន់តែច្រើនដែលយើងត្រូវរកប្រភពដើម្បីបង្កើតឱ្យមានអគ្គិសនីសម្រាប់ឱ្យប្រជាជនយើងប្រើប្រាស់»។
លោកបន្ថែមថា៖ «ប្រភពអគ្គិសនីនេះ នឹងផ្តល់ឱកាសឱ្យយើងជំរុញវិស័យឧស្សាហកម្ម និងវិស័យដទៃទៀតដែលមានតម្រូវការប្រើប្រាស់អគ្គិសនី។ ប៉ុន្តែវា ធ្ងន់ជាងនេះគឺសេវាកម្មទាក់ទងនឹងសេវាទេសចរណ៍ បានប្រើប្រាស់ថាមពលអគ្គិសនីធំណាស់ សណ្ឋាគារមួយ ដែលមានពី ៤០០ ទៅ ៥០០ បន្ទប់ តើត្រូវការតើត្រូវការអគ្គិសនីប៉ុន្មាន? នៅពេលដែលយើងមានអគ្គិសនីនោះ ការងារធ្វើ និងផលិតកម្មវាបានចេញមក រោងចក្រត្រូវការអគ្គិសនី ដើម្បីផលិតចេញនូវផលិតផល អ៊ីចឹងបានជាតម្រូវការរបស់យើងបានកើនឡើងពី ១ ឆ្នាំទៅ ១ ឆ្នាំ»។
របាយការណ៍របស់អាជ្ញាធរអគ្គិសនីកម្ពុជា បានឱ្យដឹងថា អាជីវកម្មធុនធំ មធ្យម ពាណិជ្ជកម្ម និងឧស្សាហកម្មដែលមានអ្នកប្រើប្រាស់ចំនួន ២១ ៨៩៥ អតិថិជន ដែលមានអានុភាពជាង ៥ ២៣៦GWh ឬស្មើនឹង ៣៧,៦០ ភាគរយ គិតត្រឹមចុងឆ្នាំ ២០២២។
លោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា (EAC) ថ្លែងក្នុងកម្មវិធីបូកសរុបរបាយការណ៍លទ្ធផលការងារបញ្ចប់ឆ្នាំ ២០២២ និងលើកទិសដៅការងារសម្រាប់អនុវត្តឆ្នាំ ២០២៣ កាលពីខែកុម្ភៈ ឆ្នាំ ២០២៣ នេះថា អគ្គិសនី គឺជាវិស័យអាទិភាពមួយ ដែលរាជរដ្ឋាភិបាលកម្ពុជាបានយកចិត្តទុកដាក់ជំរុញការអភិវឌ្ឍជាបន្តបន្ទាប់ ព្រោះថាមពលអគ្គិសនីមិនត្រឹមតែជាផលិតផលមួយដែលត្រូវការសម្រាប់បម្រើជីវភាពរស់នៅរបស់ប្រជាពលរដ្ឋប៉ុណ្ណោះទេ ប៉ុន្តែវាក៏ជាផលិតផលមួយដែលត្រូវការចាំបាច់សម្រាប់ជំរុញការអភិវឌ្ឍវិស័យឧស្សាហកម្ម សិប្បកម្ម ពាណិជ្ជកម្ម កសិកម្ម ទេសចរណ៍ និងវិស័យផ្សេងៗទៀត ក្នុងផ្នែកសេដ្ឋកិច្ច។
លោកនិយាយថា៖ «ក្នុងនីតិកាលទី ៦ នៃរដ្ឋសភានេះ ការអភិវឌ្ឍការផ្គត់ផ្គង់ថាមពលអគ្គិសនី និងការកែលម្អការផ្តល់សេវាអគ្គិសនីឱ្យអ្នកប្រើប្រាស់ ត្រូវបានចាត់ទុកជាការងារអាទិភាពរបស់ភាគីពាក់ព័ន្ធទាំងអស់ក្នុងវិស័យអគ្គិសនី ដើម្បីឱ្យគ្រប់ទីកន្លែងមានការផ្គត់ផ្គង់អគ្គិសនីគ្រប់គ្រាន់ មានស្ថិរភាព អាចជឿទុកចិត្តបាន និងមានតម្លៃសមរម្យ»។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោក តែ តាំងប៉ ធ្លាប់ប្រាប់ ភ្នំពេញប៉ុស្តិ៍ថា តម្លៃអគ្គិសនី និងតម្លៃប្រេង គឺជាកត្តាគួបផ្សំដ៏សំខាន់ក្នុងការទាក់ទាញវិនិយោគិនក្រៅប្រទេស ព្រោះថាប្រេង និងអគ្គិសនីជាធាតុផ្សំដ៏សំខាន់សម្រាប់ផ្នែកផលិតកម្ម ក្រៅពីការចំណាយទៅលើវត្ថុធាតុដើម និងកម្លាំងពលកម្ម។
លោក តាំង ប៉ បានប្រាប់ទៀតថា៖ «កាលណាតម្លៃប្រេង រួមទាំងតម្លៃ អគ្គិសនីមានស្ថិរភាព និងតម្លៃទាប អ្នកវិនិយោគិនក្រៅស្រុកនឹងមើលឃើញឱកាសផ្សេងៗចេញពីកត្តា ទាំងអស់នោះ»។
បច្ចុប្បន្ន អានុភាពសរុបនៃប្រភពអគ្គិសនីដែលត្រូវបានអភិវឌ្ឍកើនឡើងពី ៣ ៩៩០ មេហ្គាវ៉ាត់ នៅចុងឆ្នាំ ២០២១ ដល់ ៤ ៤៩៥មេហ្គាវ៉ាត់ នៅចុងឆ្នាំ ២០២២។ ក្នុងនោះ ប្រភពថាមពលស្អាត ដែលមានប្រភពពីវារីអគ្គិសនី ថាមពលពន្លឺព្រះអាទិត្យ និងថាមពលជីវម៉ាស់ មានចំនួនជាង ៦២ ភាគរយ ត្រូវបានតភ្ជាប់ចូលបណ្តាញជាតិ។ រីឯបរិមាណថាមពលដែលត្រូវបានប្រើប្រាស់ចេញពីប្រភពអគ្គិសនីបានកើនឡើងពី ១៣ ០៩៧ លានគីឡូវ៉ាត់ម៉ោងនៅឆ្នាំ ២០២១ ដល់ ១៥ ៤៥៥ លានគីឡូវ៉ាត់ម៉ោងនៅឆ្នាំ ២០២២។ នេះបើតាមលោក វិសិដ្ឋ។
ទិន្នន័យពីអាជ្ញាធរអគ្គិសនីកម្ពុជា (EAC) បានបង្ហាញថា កម្ពុជាមានអានុភាពដំឡើងថាមពលអគ្គិសនីទាំងប្រភពអគ្គិសនីក្នុងស្រុក និងនាំចូលសរុបចំនួន ៤ ៤៩៥ មេហ្គាវ៉ាត់ នៅក្នុងឆ្នាំ ២០២២ កន្លងទៅដែល ក្នុងនោះប្រភពអគ្គិសនីក្នុងស្រុកមានចំនួនជាង ៣ ៤៦៤ មេហ្គាវ៉ាត់។
ដើម្បីបំពេញតម្រូវការថាមពលប្រើប្រាស់ កម្ពុជាបាននាំចូលថាមពលអគ្គិសនីពីប្រទេសវៀតណាម ប្រទេសថៃ និងប្រទេសឡាវ សរុបចំនួនជាង ១ ពាន់មេហ្គាវ៉ាត់ គិតត្រឹមខែធ្នូ ឆ្នាំ ២០២២។ នេះបើយោងតាមអគ្គិសនីកម្ពុជា៕