.jpg)
ការិយាល័យធនាគារ Silicon Valley ត្រូវបានគេមើលឃើញនៅទីក្រុង Tempe រដ្ឋ Arizona នៅថ្ងៃទី ១៤ ខែមីនា ឆ្នាំ ២០២៣។ AFP
រដ្ឋាភិបាលម៉ាឡេស៊ីកាលពីថ្ងៃពុធ បាននិយាយថា ធនាគាររបស់ប្រទេសនេះមានការប៉ះពាល់តិចតួចបន្ទាប់ពីធនាគារ Silicon Valley នៅក្នុងសហរដ្ឋអាមេរិកបានដួលរលំកាលពីសប្តាហ៍មុន។ លោក Steven Sim អនុរដ្ឋមន្ត្រីក្រសួងហិរញ្ញវត្ថុម៉ាឡេស៊ីនិយាយនៅក្នុងសភាថា៖ «ផ្អែកលើការវាយតម្លៃរបស់អាជ្ញាធរក្នុងប្រទេសម៉ាឡេស៊ី ឃើញថាធនាគារក្នុងស្រុកម៉ាឡេស៊ីប្រឈមបញ្ហាតិចតួច ចំពោះវិបត្តិដែលបានកើតឡើងនៅសហរដ្ឋអាមេរិក» ។
លោក Sim បាននិយាយនៅក្នុងការឆ្លើយតបទៅនឹងសំណួររបស់សមាជិកសភាអំពីផលប៉ះពាល់ក្នុងស្រុកណាមួយពីវិបត្តិនេះ។ លោកបន្តថា អាជ្ញាធរបានត្រួតពិនិត្យ និងតាមដានជាទៀងទាត់នៅក្នុងប្រព័ន្ធធនាគារ ដើម្បីធានាថាម៉ាឡេស៊ីត្រៀមខ្លួន ដើម្បីទប់ទល់នឹងសម្ពាធទីផ្សារណាមួយ។
ធនាគារ Silicon Valley របស់អាមេរិក បានដួលរលំកាលពីថ្ងៃសុក្រ។ បញ្ហានេះជាវិបត្តិធំជាងគេបំផុតក្នុងវិស័យធនា គារសហរដ្ឋអាមេរិកក៏ដូចជាពិភពលោក ចាប់តាំងពីវិបត្តិហិរញ្ញវត្ថុកាលពីឆ្នាំ ២០០៨។ អ្នកកាន់ប្រាក់បញ្ញើរបស់សហរដ្ឋអាមេរិកកំពុងស្វែងរកកន្លែងមានសុវត្ថិភាព ដើម្បីទុកដាក់ប្រាក់របស់ពួកគេ ខណៈដែលអាជ្ញាធរហិរញ្ញវត្ថុនៅជុំវិញពិភពលោកកំពុងប្រុងជើងការទប់ទល់នឹងចំហាយវិបត្តិធនាគារនេះ។
ទាក់ទងនឹង ការដួលរលំធនាគារ ឈ្មោះ SVB (Silicon Valley Bank) ដែលជាធនាគារដ៏ធំមួយ នៅអាមេរិក កាលពីថ្ងៃសុក្រ សប្តាហ៍មុន បានធ្វើឱ្យអាជ្ញាធរអាមេរិកសម្រេចចិត្តបិទធនាគា រនិងយកទ្រព្យរបស់ធនាគារមកដាក់ក្រោមការចាត់ចែងបណ្តោះអាសន្ន ដើម្បីស្តារទំនុកចិត្ត និងដើម្បីរំងាប់ក្តីបារម្ភរបស់សាធារណជន។ លោក ចូ បៃដិន បានប្រកាសចេញមុខធានាលើលុយតម្កល់របស់អតិថិជនធនាគារនេះកាលពីថ្ងៃចន្ទទី ១៣ មីនា។
សារព័ត៌មានជាច្រើនដែលសរសេរបញ្ហាវិបិត្តធនាគារ បានស្រង់សម្ដីរបស់អ្នកជំនាញវាយតម្លៃថាធនាគារ SVB ស្ថិតក្នុងក្រុមធនាគារមធ្យមនិងធ្វើជំនួញសំខាន់តែជាមួយក្រុមហ៊ុនបច្ចេកវិទ្យា Startup ជាហេតុធ្វើឱ្យវិបត្តិធនាគារនៅអាមេរិកទំនងនឹងមិនបង្កហានិភ័យធំដុំឬឆ្លងរាលដាលទៅដល់ធនាគារធំៗនៅប្រទេសដទៃទៀត ដែលមានប្រព័ន្ធគ្រប់គ្រងរឹងមាំនោះទេ។ទោះជាយ៉ាងណាក្ដីគ្មានទេពាក្យថា គ្មានហានិភ័យក្នុងវិបត្តិធនាគារ ព្រោះថានៅពេលគេនិយាយពីធនាគារគេនិយាយពីទំនុកចិត្តពីសំណាក់សាធារណជន៕
