ភ្នំពេញៈ កម្ពុជាបានប្រកាសដាក់ឱ្យអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ «គណនេយ្យភាពសមិទ្ធកម្ម» (២០២៣-២០២៧) ខណៈកម្មវិធីនេះត្រូវបានរដ្ឋាភិបាលចាត់ទុកជាសមាសភាគដ៏សំខាន់សម្រាប់ធានាបានវឌ្ឍនភាពជាតិតាមបង្គោលចរឆ្នាំ ២០៣០ និងឆ្នាំ ២០៥០។
ថ្លែងនៅក្នុងពិធីប្រកាសដាក់ឱ្យអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដំណាក់កាលទី៤ «គណនេយ្យភាពសមិទ្ធកម្ម» នៅសណ្ឋាគារសុខាភ្នំពេញ កាលពីថ្ងៃទី ២០ ខែមីនា លោក ហ៊ុន សែន បានឱ្យដឹងថា ការរស់រានរបស់កម្ពុជាឈានមកដល់ពេលនេះ គឺបានមកដោយការធ្វើកំណែទម្រង់ ក្នុងនោះមានកំណែទម្រង់ចំនួន ២ សំខាន់ (ក្នុងពេលលោកដឹកនាំ) គឺការកែទម្រង់ខាងនយោបាយ (ដោះស្រាយជម្លោះតាមរយៈការចរចារកសន្តិភាព) និងកំណែទម្រង់ខាងសេដ្ឋកិច្ច (ការកែទម្រង់ការគ្រប់គ្រងហិរញ្ញវត្ថុសាធារណៈ)។ លោកបន្តថា ការកែទម្រង់ការគ្រប់គ្រងហិរញ្ញវត្ថុសាធារណៈ រយៈពេលប្រមាណ ២ ទសវត្សរ៍មកនេះបានជួយឱ្យកម្ពុជាអាចបង្កើតសមិទ្ធផលជាប្រវត្តិសាស្ត្រជាច្រើនទាំងសមិទ្ធផលក្នុងការកែលម្អអភិបាលកិច្ចនៃការគ្រប់គ្រងហិរញ្ញវត្ថុសាធារណៈ និងសមិទ្ធផលក្នុងទិដ្ឋភាពនៃការរីកចម្រើនផ្នែកសង្គមសេដ្ឋកិច្ចកម្ពុជា។
លោកថ្លែងថា៖ «ការរីកចម្រើនផ្នែកសេដ្ឋកិច្ច និងសង្គម មានទំនាក់ទំនងយ៉ាងស្អិតល្មួតជាមួយនឹងសមិទ្ធកម្មនៃការគ្រប់គ្រងហិរញ្ញវត្ថុសាធារណៈ ឬថវិកាជាតិរយៈពេល ២០ ឆ្នាំក្រោយ ចំណូលថវិកាជាតិក្នុងឆ្នាំ ២០២៣ ត្រូវបានប៉ាន់ស្មានថា នឹងមានរហូតដល់ ៣២,៩៣៦ ប៊ី (ពាន់) លានរៀល រីឯចំណាយថវិកាជាតិសរុបមានប្រមាណ ៤១,៥៣៧ ប៊ីលានរៀល។ សូចនាករសមិទ្ធកម្មដ៏ល្អប្រសើរនេះ គឺជាឃ្នាស់សេដ្ឋកិច្ចដ៏សំខាន់បំផុតមួយដែលធ្វើឱ្យកម្ពុជាទទួលបានកំណើន និងបន្តស្ថិរភាពនៃកំណើនសេដ្ឋកិច្ចជាបន្តបន្ទាប់រហូតដល់សម្រេចបានចំណាត់ថ្នាក់ជាប្រទេសមានចំណូលមធ្យមកម្រិតទាបនៅឆ្នាំ ២០១៥ និងកំពុងបោះជំហានប្រកបដោយភាពជឿជាក់ទៅកាន់ឋានៈជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានចំណូលកម្រិតខ្ពស់នៅឆ្នាំ ២០៥០»។
លោកបញ្ជាក់ថា៖ «សម្រាប់ដំណាក់កាលទី៤ ដែលយើងកំពុងប្រកាសឱ្យចាប់ផ្តើមអនុវត្តនាពេលនេះ ត្រូវបានគ្រោងចាប់អនុវត្តពីឆ្នាំ ២០២៣ នេះរហូតដល់ឆ្នាំ ២០២៧ ដែលមានគោលដៅគន្លឹះសំដៅលើការបង្កើនគណនេយ្យភាពសមិទ្ធកម្ម។ បុព្វហេតុឯករាជ្យ និងអធិបតេយ្យជាតិ សមិទ្ធកម្មដ៏ល្អនៃកម្មវិធីកែទម្រង់ការគ្រប់គ្រង ហិរញ្ញវត្ថុសាធារណៈបានពង្រឹងឱ្យកាន់តែមាំមួនឡើងនូវភាពជាម្ចាស់ និងតួនាទីរបស់រាជរដ្ឋាភិបាលកម្ពុជាក្នុងការទទួលខុសត្រូវលើជោគវាសនារបស់ប្រទេសជាតិ ដោយបានកាត់បន្ថយការពឹងពាក់លើការខ្ចីពីក្រៅប្រទេស ដែលបច្ចុប្បន្នការខ្ចីពីក្រៅប្រទេសប្រចាំឆ្នាំមានទំហំមិនស្មើនឹង ២០ ភាគរយនៃថវិកាជាតិសរុបនោះទេ»។
បើតាមលោក ហ៊ុន សែន កាលពី ៣០ ឆ្នាំមុន ចំណូលនៅក្នុងស្រុកដែលកម្ពុជារកបានដោយខ្លួនឯង មានត្រឹមប្រមាណ ១/៣ នៃថវិកាជាតិសរុប នេះមានន័យថា តម្រូវការប្រមាណ ២/៣ នៃថវិកាជាតិត្រូវបានដោះស្រាយដោយប្រភពធនធានជាជំនួយហិរញ្ញវត្ថុពីក្រៅប្រទេស។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលើកឡើងថា សមិទ្ធផលរយៈពេលជិត ២០ ឆ្នាំមកនេះ គឺបង្ហាញថារាជរដ្ឋាភិបាលកម្ពុជាកំពុងធ្វើដំណើរនៅលើមាគ៌ាត្រឹមត្រូវក្នុងការឆ្ពោះទៅសម្រេចបាននូវចក្ខុវិស័យដែលបានកំណត់។ ជោគជ័យនៃការកែទម្រង់ប្រព័ន្ធហិរញ្ញវត្ថុសាធារណៈបានផ្ដល់ផលជាបណ្តើរៗ លើការពង្រឹងគុណភាព «អភិបាលកិច្ចល្អ» និងការកសាងប្រព័ន្ធហិរញ្ញវត្ថុសាធារណៈរឹងមាំមួយ ដែលអនុញ្ញាតឱ្យរដ្ឋាភិបាលអាចលើកកម្ពស់ជីវភាព និងបម្រើសេវាសាធារណៈជូនប្រជាជនកាន់តែប្រសើរ តាមរយៈការអភិវឌ្ឍធនធានមនុស្សឱ្យកាន់តែមានគុណភាព, ការកសាងហេដ្ឋារចនាសម្ព័ន្ធរូបន្តចាំបាច់នានាដូចជា ប្រព័ន្ធគមនាគមន៍, ប្រព័ន្ធធារាសាស្ត្រ និងអគ្គិសនី, ការកសាងសាលារៀន និងមន្ទីរពេទ្យ បានកាន់តែច្រើន និងមានគុណភាពកាន់តែប្រសើរឥតឈប់ឈរ។
លោកអះអាងថា៖ «យើងនឹងទទួលបានជោគជ័យថ្មីៗថែមទៀតនៅក្នុងការអនុវត្តដំណាក់កាលទី ៤ នេះដើម្បីឈានទៅសម្រេចបាននូវចក្ខុវិស័យនៃការប្រែក្លាយប្រព័ន្ធគ្រប់គ្រងហិរញ្ញវត្ថុសាធារណៈកម្ពុជា ឱ្យឆ្លើយតបតាមស្តង់ដា និងឧត្តមានុវត្តន៍អន្តរជាតិ ដែលជាសមាសភាគដ៏សំខាន់មួយសម្រាប់ធានាបានវឌ្ឍនភាពជាតិតាមបង្គោលចរឆ្នាំ ២០៣០ និង ២០៥០»។
បើតាមលោក អូន ព័ន្ធមុនីរ័ត្ន កម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ បានឈានមកដល់ដំណាក់កាលទី ៤ ដែលជាដំណាក់កាលចុងក្រោយ បន្ទាប់ពីដំណាក់កាលទី ១ ត្រូវបានអនុវត្តពីចុងឆ្នាំ ២០០៤ ដល់ឆ្នាំ ២០០៨ ដោយផ្តោតលើ «ការពង្រឹងភាពជឿទុកចិត្តបាននៃថវិកា, ដំណាក់កាលទី ២ អនុវត្តពីឆ្នាំ ២០០៩ ដល់ឆ្នាំ ២០១៥ «ការពង្រឹងគណនេយ្យភាពហិរញ្ញវត្ថុ» និងដំណាក់កាលទី ៣ ត្រូវបានអនុវត្តចាប់ពីឆ្នាំ ២០១៦ ដល់ឆ្នាំ ២០២២ «ការផ្សារភ្ជាប់ថវិកាទៅនឹងគោលនយោបាយ»៕