.jpg)
លោក ស៊ូ សុជាតិ ក្នុងកិច្ចប្រជុំប្រធានវេទិកាទីផ្សារមូលធនអាស៊ានលើកទី ៣៨។ សហការី
ភ្នំពេញៈ កម្ពុជាកំពុងទទួលបានការសាទរពីបណ្តាប្រទេសជាសមាជិកអាស៊ានលើដំណើរវិវឌ្ឍន៍ល្អជុំវិញការសម្រេចបាននូវការបោះផ្សាយសញ្ញាបណ្ណបៃតងដែលជាវឌ្ឍនភាពថ្មីមួយទៀតនៃការអភិវឌ្ឍវិស័យមូលបត្ររបស់កម្ពុជារួមទាំងអាស៊ានផងដែរ។ នេះបើយោងតាមមន្ត្រីជាន់ខ្ពស់នៃនិយតករមូលបត្រកម្ពុជា។
លោក ស៊ូ សុជាតិ អគ្គនាយកនិយតករមូលបត្រកម្ពុជា (SERC) ដែលកំពុងចូលរួមកិច្ចប្រជុំប្រធានវេទិកាទីផ្សារមូលធនអាស៊ាន លើកទី ៣៨ (38th ACMF Chairs Meeting) នៅទីក្រុងយ៉ូយ៉ារកាតា ប្រទេសឥណ្ឌូនេស៊ី បានថ្លែងមកប្រាប់ភ្នំពេញប៉ុស្តិ៍នៅថ្ងៃទី២១ ខែមីនាថា ប្រទេសអាស៊ានទាំងអស់សាទរចំពោះកម្ពុជាក្នុងការជំរុញការបោះផ្សាយសញ្ញាបណ្ណអាស៊ានបៃតងសង្គម ឬនិរន្តរភាព (Green Social and Sustainable Bond) គឺជាអ្វីដែលបណ្តាប្រទេសជាសមាជិកកំពុងធ្វើ ដែលនេះគឺជាទិសដៅរួម ហើយកម្ពុជានឹងជំរុញ និងបន្តការណ៍នេះទាំងអស់គ្នាបន្ថែមទៀតដើម្បីទាក់ទាញក្រុមហ៊ុនក៏ដូចជាលើកទឹកចិត្តក្រុមហ៊ុនឱ្យធ្វើការបោះផ្សាយក្នុងគោលដៅនេះទាំងអស់ ព្រោះការបោះផ្សាយនេះគឺបានប្រយោជន៍ទាំងក្រុមហ៊ុន បរិស្ថាន និងសង្គមជាតិរបស់មនុស្សជារួម។
លោកបន្តថា បណ្តាប្រទេសសមាជិកទាំង ១០ បានជជែកគ្នាច្រើនក្នុងការជំរុញការបោះផ្សាយមូលបត្របៃតងនេះ ក្នុងការចូលរួមក្នុងការកាត់បន្ថយការបញ្ចេញកាបូនក្នុងបរិយាកាស។ ពេលនេះកម្ពុជាមានក្រុមហ៊ុន Golden Tree មួយដែលបោះផ្សាយសញ្ញាបណ្ណបៃតង និងទទួលបានស្តង់ដាសញ្ញាបណ្ណបៃតង សង្គម និងនិរន្តរភាពអាស៊ាន (Asean Label)។ កម្ពុជានឹងមានក្រុមហ៊ុនផ្សេងទៀតនឹងធ្វើការបោះផ្សាយសញ្ញាបណ្ណបៃតង។
លោកថ្លែងថា៖ «ក្នុងកិច្ចប្រជុំនេះ យើងក៏ទទួលបានការសាទរពីបណ្តាថ្នាក់ដឹកនាំអាស៊ានទាំងអស់ចំពោះសមិទ្ធផលដែលយើងសម្រេចបានថ្មីៗ ទោះបីទំហំនៃការបោះផ្សាយតូច ប៉ុន្តែវាជាគោលដៅនៃការចូលរួមធ្វើទាំងអស់គ្នា។ នៅឆ្នាំ ២០២៣ នេះ យើងក៏មានការបោះផ្សាយសញ្ញាបណ្ណបៃតងដែរ គឺធនាគារអេស៊ីលីដាកំពុងរៀបចំបោះផ្សាយ»។
លោកឱ្យដឹងទៀតថា កម្ពុជាក៏កំពុងធ្វើការបន្ថែមជាមួយនឹង UNESCAP និង GGI ដែលខ្លួនទើបចុះហត្ថលេខាថ្មីៗដើម្បីជំរុញការបោះផ្សាយខាងផ្នែកក្រោមស្លាកសញ្ញាបណ្ណអាស៊ាន បៃតង សង្គម ឬនិរន្តរភាព។
Golden Tree បានក្លាយជាក្រុមហ៊ុននៅក្នុងស្រុកដំបូងគេបង្អស់ដែលបានបោះផ្សាយសញ្ញាបណ្ណបៃតងនៅលើផ្សារមូលបត្រកម្ពុជា (CSX) ដោយបានកៀរគរមូលធនប្រមាណជា ១,៤៦ លានដុល្លារដើម្បីពង្រីកអាជីវកម្មរបស់ខ្លួនកាលពីថ្ងៃទី ១៩ ខែមករា។
យោងតាមសេចក្តីប្រកាសរួមនៃ 38th ACMF Chairs Meeting បណ្តាប្រទេសអាស៊ានទាំង ១០ បានអនុម័តឱ្យដាក់ដំណើរការមជ្ឈមណ្ឌលចំណេះដឹងហិរញ្ញវត្ថុនិរន្តរភាព ដែលកំពុងអភិវឌ្ឍដើម្បីបម្រើជាមជ្ឈមណ្ឌល «ច្រកតែមួយ» សម្រាប់បង្កើនការយល់ដឹង និងអប់រំអ្នកចូលរួមអំពីបញ្ហាទាក់ទងនឹងហិញ្ញវត្ថុនិរន្តរភាពនៅចុងខែមីនា ឆ្នាំ ២០២៣ នេះ។
ជាមួយគ្នានេះ ក្រោមស្តង់ដាសញ្ញាបណ្ណបៃតងសង្គម និងនិរន្តរភាពអាស៊ាន ដែលត្រូវបានដាក់ឱ្យដំណើរការក្នុងឆ្នាំ ២០១៧ និង២០១៨ គិតត្រឹមថ្ងៃទី ១៥ ខែមីនា ឆ្នាំ ២០២៣ ទឹកប្រាក់ចំនួន ៣៨,០៦ ពាន់លានដុល្លារត្រូវបានបោះផ្សាយក្រោមស្លាកសញ្ញាបណ្ណអាស៊ាន បៃតង សង្គម ឬនិរន្តរភាព។
បើយោងតាមលោក សុជាតិ គិតមកត្រឹមថ្ងៃទី ១៩ ខែមករា CSX មានក្រុមហ៊ុនចុះបញ្ជីចំនួន ១៨ ដែលរួមមានក្រុមហ៊ុនចំនួន ៩ បានចុះបញ្ជីជាភាគហ៊ុន និង ៩ ទៀតចុះបញ្ជីជាសញ្ញាបណ្ណសាជីវកម្ម។ ក្រុមហ៊ុនទាំង ១៨ នេះបានប្រមូលទុនពីផ្សារមូលបត្រប្រមាណ ៣១៧ លានដុល្លារ។
ទន្ទឹមនឹងការកើនឡើងនៃចំនួនក្រុមហ៊ុនចុះបញ្ជី បរិមាណ និងទំហំជួញដូរភាគហ៊ុនប្រចាំថ្ងៃជាមធ្យមក៏មានការកើនឡើងជាលំដាប់។ ជាក់ស្តែងក្នុងឆ្នាំ ២០២២ ទំហំជួញដូរប្រចាំថ្ងៃជាមធ្យមមានប្រមាណ ៥០ ម៉ឺនដុល្លារ និងចំនួនគណនីជួញដូរកើនឡើងដល់ ៣៦ ០០០ គណនី៕
