​ភ្នំពេញៈ អ្នក​ក្នុង​វិស័យ​ទេស​ចរណ៍​កម្ពុជា បាន​លើកឡើងថា ការតភ្ជាប់​ជើងហោះហើរ​ត្រង់​រវាង​កម្ពុជា​-​ឥណ្ឌូនេស៊ី នឹង​រួម​ចំណែក​ជំរុញ​កំណើនសេដ្ឋកិច្ច​កម្ពុ​ជាតា​មរយៈ​ចរន្ត​ភ្ញៀវ​ទេស​​ចរ និង​វិនិយោគ ខណៈ​ឥណ្ឌូ​នេ​ស៊ី គឺជា​ប្រទេស​ក្នុង​តំបន់​អា​ស៊ាន​ដែលមាន​ទំហំ​សេដ្ឋកិច្ច និង​ប្រជាជន​ច្រើនជាងគេ​។​

​ការលើកឡើង​នេះ​បាន​ធ្វើឡើង​បន្ទាប់ពី​ជំនួប​រវាង​រដ្ឋមន្ត្រីក្រសួង​ពាណិជ្ជកម្ម​កម្ពុជា លោក ប៉ាន សូរ​ស័ក្តិ ជាមួយ លោក Enggartiasto Lukita អតីតរដ្ឋមន្ត្រី​ពាណិជ្ជកម្ម​ប្រទេស​ឥណ្ឌូនេស៊ី នៅ​ទីក្រុង​ហ្សា​ការ​តា កាលពី​ល្ងាច​ថ្ងៃទី​ ២០ ខែ​​មីនា ឆ្នាំ ២០២៣​។​

​ក្នុងជំនួប​នោះ លោក សូរ​ស័ក្តិ ស្នើឱ្យ​លោក Enggartiasto Lukita ជួយ​ជំរុញ​សកម្មភាព​ពាណិជ្ជកម្ម វិនិយោគ និង​ទេស​​ចរណ៍​ទ្វេភាគី​ឱ្យ​បោះជំហាន​ទៅមុខ​កាន់តែ​លឿន ដោយ​លោក​ចង់ឃើញ​ក្រុមហ៊ុន​អាកាសចរ​ណ៍​ឥណ្ឌូនេស៊ី​ភ្ជាប់​ជើង​ហោះ​​ហើរ​ត្រង់​ពី​ឥណ្ឌូនេស៊ី​មកកាន់​កម្ពុជា​ឱ្យបាន​ឆាប់​ដើម្បី​ជួយ​សម្រួល​ដល់​លំហូរ​វិនិយោគ និង​ទេសចរណ៍​។​

​ទីប្រឹក្សា​សមាគម​ទីភ្នាក់ងារ​ទេសចរណ៍​កម្ពុជា លោក ហូ វណ្ឌី បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​ ២៣ ខែមីនា ថា ការតភ្ជាប់​ជើងហោះហើរ​ត្រង់​នឹង​ផ្តល់​ផល​វិជ្ជមាន​ច្រើន​សម្រាប់​វិស័យ​ទេសចរណ៍ ក៏ដូចជា​សេដ្ឋកិច្ច​ជាតិ​ទាំងមូល​។

​សម្រាប់​ឥណ្ឌូ​នេ​ស៊ី ដែលមាន​ប្រជាជន​ច្រើន និង​ជា​ប្រទេស​មាន​សេដ្ឋកិច្ច​ធំជាងគេ​ទាំង ២០​ លើ​ពិភពលោក ការតភ្ជាប់​នេះ​នឹង​អាចជួយ​ឱ្យ​កម្ពុជា​ទទួលបាន​ភ្ញៀវទេសចរ​ជនជាតិ​ឥណ្ឌូនេស៊ី និង​តាម​​រយៈ​ប្រទេស​ឥណ្ឌូនេស៊ី​ជាច្រើន​ផងដែរ​។ ជើងហោះហើរ​ផ្ទាល់ ក៏​ជួយ​ធ្វើឱ្យ​ទំនាក់ទំនង​ផ្នែក​នយោបាយ និង​ពាណិជ្ជកម្ម​កាន់តែ​ល្អ​ផងដែរ​។ លោក​បន្តថា កន្លងមក​ក្រុមហ៊ុន​អាកាស​ចរណ៍​ជាតិ​ឥណ្ឌូនេស៊ី Garuda Airlines ក៏​ធ្លាប់មាន​ជើង​ហោះ​ហើរ​ត្រង់​មក​កម្ពុជា​ដែរ ប៉ុន្តែ​វត្ត​មាន​ជំងឺ​កូ​វីដ ​១៩ បានធ្វើឱ្យ​ការហោះហើរ​ក៏ត្រូវ​ផ្អាក​រហូតមក​ដល់ពេលនេះ​។​

​លោក​ថ្លែងថា​៖ «​ជើង​ហោះ​​ហើរ​ត្រង់​រវាង​ហ្សា​ការ​តា​-​ភ្នំពេញ នឹង​ផ្តល់នូវ​ភាព​វិជ្ជមាន​ជាច្រើន ខណៈ​ទេសចរ​ឥណ្ឌូនេស៊ី​ចូល​​ចិត្ត​ទៅ​ទស្សនា​តំបន់​ប្រាសាទ​​អង្គរវត្ត​ក្នុង​ខេត្តសៀមរាប និង​រាជធានី​ភ្នំពេញ ចំណែក​ទេស​ចរ​កម្ពុជា​ចូលចិត្ត​ទៅ​កម្សាន្ត​នៅ​កោះ​បាលី​»​។​

​លោក​ប្រាប់ទៀតថា បើតាម​លោក​ដឹង គឺ​ចាប់ពី​អំឡុង​ចុង​​ខែមេសា​ទៅ ក្រុមហ៊ុន​អាកាស​​ចរណ៍​ឯកជន AirAsia នឹងធ្វើ​ការហោះហើរ​ត្រង់​រវាង​ទីក្រុង​ហ្សា​ការ​តា មក​រាជធានី​ភ្នំពេញ ក្នុង ​១ ​សប្តាហ៍ ៤ ​ថ្ងៃ​។​

​ប្រធាន​សមាគម​ទេសច​រណ៍​អាស៊ី​ប៉ាស៊ីហ្វិក​កម្ពុជា លោក ធួន ស៊ីណាន បាន​និយាយថា ឥណ្ឌូនេស៊ី ជា​ប្រជាជាតិ​ដែលមាន​ប្រជាជន​ច្រើនជាងគេ​ក្នុង​តំបន់ គឺ​ប្រមាណ ២៧៧ លាន​នាក់​ក្នុង​ឆ្នាំ​ ២០២២ (​លេខ ៤ លើ​ពិភពលោក​) ហេតុនេះ​បើ​កម្ពុជា​អាចមាន​ជើងហោះហើរ​ត្រង់​ជាមួយនឹង​អាច​នាំមក​នូវ​ផលចំណេញ​ច្រើន​។ កន្លងមក​ភ្ញៀវ​ឥណ្ឌូនេស៊ី គឺ​ភាគច្រើន​ទៅ​កម្សាន្ត​នៅ​ខេត្តសៀមរាប និង​ភ្នំពេញ ប៉ុន្តែ​ក៏មាន​មួយចំនួន​តូច​ទៅ​ខេត្ត​ព្រះសីហនុ​ដើម្បី​ធ្វើ​​ការ និង​លេងល្បែង ផងដែរ​។​

​លោក​លើកឡើងថា​៖ «​ឥណ្ឌូ​នេ​ស៊ី​ជាទី​ផ្សារ​សំខាន់​ដែល​ត្រូវ​យកចិត្តទុកដាក់ ខណៈ​កន្លងមក​ថ្នាក់ដឹកនាំ​ក្រសួង​ទេសចរ​ណ៍ រដ្ឋលេខាធិការដ្ឋាន​អាកាស​​ចរ​ស៊ីវិល និង​ផ្នែក​ឯកជន​តែង​​តែ​យកចិត្តទុកដាក់​ខ្លាំង​»​។​

​ជាមួយគ្នា​នោះ លោក​ក៏បាន​ជំ​រុញឱ្យ​ក្រុមហ៊ុន​អាកាសចរ​​ណ៍​កម្ពុជា​សិក្សា​ទីផ្សារ​ដើម្បី​ភ្ជាប់​ជើងហោះហើរ​ទៅ​ប្រទេស​ឥណ្ឌូនេស៊ី​វិញ​ផងដែរ​។​

​ក្នុង​ឆ្នាំ​ ២០២២ កម្ពុជា​ទទួល​បាន​ភ្ញៀវទេសចរ​អន្តរជាតិ ២ ២៧៦ ៦២៦​ នាក់ ក្នុងនោះ​ភ្ញៀវ​ជនជាតិ​ឥណ្ឌូនេស៊ី នៅ​ចំណាត់ថ្នាក់​ទី ៦ ដែលមាន​ចំនួន​សរុប ៧៥ ៦៥៣ ​នាក់ កើនឡើង ៧៩៩,៦​ ភាគរយ​បើ​ធៀប​នឹង​ឆ្នាំ​ ២០២២៕