.jpg)
សៀមរាបៈ ប្រធានសភាពាណិជ្ជកម្មមណ្ឌលសៀមរាប-ឧត្តរមានជ័យ លោកហ៊ុយ ភៀវ បានបញ្ជាក់ថា អគ្គកុងស៊ុលចិន ប្រចាំខេត្តសៀមរាប បានសន្យាថា នឹងធ្វើសហប្រតិបត្តិការជាមួយសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ ដើម្បីធ្វើឱ្យប្រសើរឡើងនូវកំណើនសេដ្ឋកិច្ចក្នុងតំបន់មួយនេះ។ នេះបើយោងតាមមន្ទីរព័ត៌មានខេត្តសៀមរាប។
ការលើកឡើងនេះត្រូវបានធ្វើឡើងក្រោយពេលដែលដឹកនាំសមាជិកជ្រើសតាំងសភាពាណិជ្ជកម្មមណ្ឌលសៀមរាប-ឧត្តរមានជ័យ ដើម្បីជួបសម្តែងការគួរសម និងពិភាក្សាការងារជាមួយ លោកលី ជីជៀ (Lui Zhi Jie) អគ្គកុងស៊ុលចិន ប្រចាំខេត្តសៀមរាប នៅព្រឹកថ្ងៃទី ២៣ ខែមីនានេះ។
ក្នុងឱកាសនោះ លោកហ៊ុយ ភៀវបានលើកឡើងពីសក្តានុពលជាច្រើនរបស់ខេត្តសៀមរាប ដូចជាវិស័យទេសចរណ៍ និងវិស័យកសិកម្ម ជាដើម ដែលជាសក្តានុពលស្នូលរបស់ខេត្តសៀមរាប។ នៅសៀមរាប វិស័យកសិកម្ម មានដំឡូងមី និងស្វាយចន្ទី ហើយត្រូវបានស្នើសុំខាងភាគីចិនឱ្យមកវិនិយោគវិស័យកសិកម្មនេះផង ប្រសិនបើមានអ្នកវិនិយោគិនមក។
ចំពោះវិស័យទេសចរណ៍វិញ គឺសុំជួយឱ្យអ្នកទេសចរចិនមកទស្សនាខេត្តសៀមរាប និងបង្កើតមជ្ឈមណ្ឌលសម្រាប់អ្នកទេសចរឱ្យបានច្រើនផងដែរ។
លោកហ៊ុយ ភៀវបានបញ្ជាក់ថា៖ «និយាយឱ្យចំខាងភាគីចិនគាត់គាំទ្រ និងទទួលយកអ្វីដែលយើងចង់សហការ។ គាត់និងជំរុញសហការជាមួយយើង”។ ក្រៅពីវិស័យទេសចរណ៍ដ៏មានវិស័យកសិកម្ម ក៏ជាផ្នែកមួយយ៉ាងសំខាន់នៅក្នុងការជំរុញកំណើនសេដ្ឋកិច្ចផងដែរ។ អភិបាលខេត្តសៀមរាប លោកទៀ សីហា ក៏ធ្លាប់បានជំរុញដល់វិស័យឯកជនស្វែងយល់បន្ថែមអំពីឱកាសវិនិយោគលើវិស័យការងារ ដូចជាការបង្កើតរោងចក្រផ្សេងៗជាដើមផងដែរ។ នេះបើយោងតាមប្រភពដដែលនេះ៕
