ភ្នំពេញៈ រាជរដ្ឋាភិបាលកំពុងមានមហិច្ឆតាប្រែក្លាយកម្ពុជាឱ្យទៅជាប្រទេសដែលផ្គត់ផ្គង់គ្រាប់ស្វាយចន្ទីឈានមុខគេលើទីផ្សារអន្តរជាតិ ដោយបានស្នើឱ្យក្រសួងសេដ្ឋកិច្ច និងហិរញ្ញវត្ថុ និងធនាគារជាតិនៃកម្ពុជា រៀបចំកញ្ចប់ថវិកាដើម្បីផ្តល់ទៅវិស័យនេះក្នុងការជំរុញការផលិត និងការនាំចេញ។
ផែនការនេះត្រូវបានលោកនាយករដ្ឋមន្ត្រី ហ៊ុន សែន ប្រកាស កាលពីថ្ងៃទី ២៤ ខែមីនា ក្នុងពិធីបិទសន្និបាតប្រចាំឆ្នាំរបស់ក្រសួងកសិកម្ម។ លោកបានស្នើក្រសួងសេដ្ឋកិច្ច និងហិរញ្ញវត្ថុ ឱ្យរៀបចំថវិកាដើម្បីជំរុញ និងលើកកម្ពស់ការផលិត និងនាំចេញ។
លោកលើកឡើងអំពីរបាយការណ៍របស់លោក ទិត ឌីណា រដ្ឋមន្ត្រីក្រសួងកសិកម្មថា វិស័យនេះនៅខ្វះទុនតែ ៦ លានដុល្លារទៀតនោះ ការផលិតគ្រាប់ស្វាយចន្ទីនឹងសម្រេច ១ ១០០ តោនថែមទៀត ខណៈមានជាង ១ ១៨០ ០០០ តោនរួចហើយ។
លោកបានបន្តថា កម្ពុជាមានសមត្ថភាពប្រជែងយកលេខ ១ លើពិភពលោកក្នុងការនាំគ្រាប់ស្វាយចន្ទីទៅប្រទេសក្រៅ។ សព្វថ្ងៃកម្ពុជាបានវិវឌ្ឍហួសពីប្រទេសកូតឌីវ័រហើយក្នុងការនាំចេញគ្រាប់ស្វាយចន្ទី ខណៈកូតឌឺវ័រ មានគ្រាប់ស្វាយចន្ទីត្រឹម ១ ១០០ ០០០ តោន ប៉ុន្តែកម្ពុជាមានគ្រាប់ស្វាយចន្ទីជាង ១ ១៨០ ០០០ តោន។
លោកនាយករដ្ឋមន្ត្រីបញ្ជាក់ថា៖ «ខ្ញុំមានក្ដីសង្ឃឹមថា ក្រសួងសេដ្ឋកិច្ច និងហិរញ្ញវត្ថុ ធនាគារជាតិនឹងសហការជំរុញការងារនេះ។ ត្រូវតែទម្លាក់ទុនបន្ថែមលើការកែច្នៃគ្រាប់ស្វាយចន្ទីក្នុងប្រទេស ដើម្បីសម្រេចឱ្យបាននូវគោលនយោបាយស្វាយចន្ទី ដែលយើងបានអនុម័តកន្លងមកឱ្យបានជោគជ័យ ឱ្យក្លាយទៅជាអ្នកផ្គត់ផ្គង់»។
លោក មាស សុខសេនសាន្ត អ្នកនាំពាក្យក្រសួងសេដ្ឋកិច្ច បានប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែមីនាថា ក្រសួងសេដ្ឋកិច្ចបានត្រៀមថវិការួចរាល់ហើយដោយនឹងធ្វើតាមរយៈធនាគារកសិកម្ម និងអភិវឌ្ឍន៍ជនបទ។
លោកឱ្យដឹងថា៖ «សម្រាប់កញ្ចប់ថវិកាទៅស្វាយចន្ទីយើងក៏បានគិតគូររួចរាល់ហើយដែរ ដូច្នេះយើងមិនមានបញ្ហាឡើយរឿងថវិកាដែលប្រមុខរាជរដ្ឋាភិបាលបានលើកឡើង។ ដូច្នេះពេលនេះគឺយើងនឹងរៀបចំនីតិវិធីនានាដែលធនាគារកសិកម្មនិងអភិវឌ្ឍន៍ជនបទនឹងចាត់ចែងលើការងារនេះ»។
លោក ហ៊ុន សែន បានលើកឡើងដែរថា រហូតមកដល់ពេលនេះ ផ្ទៃដីដាំដុះស្វាយចន្ទីដែលមិនទាន់ទទួលផលក៏កំពុងកើនឡើងដែលទាមទារឱ្យមានការវិនិយោគលើរោងចក្រកែច្នៃ និងការមានទុនបង្វិលគ្រប់គ្រាន់ នោះវិស័យនេះនឹងកាន់តែរីកចម្រើន ខណៈតម្រូវការនៅលើពិភពលោកក៏មានច្រើន។
រដ្ឋាភិបាលកម្ពុជាបានដាក់ឱ្យដំណើរការគោលនយោបាយជាតិស្វាយចន្ទី ឆ្នាំ ២០២២-២០២៧ សំដៅជំរុញការនាំចេញគ្រាប់ស្វាយចន្ទីឱ្យមានកំណើនរង្វង់ ២៥ ភាគរយត្រឹមឆ្នាំ ២០២៧។
របាយការណ៍របស់សមាគមស្វាយចន្ទីកម្ពុជាបានបង្ហាញថា នៅឆ្នាំ ២០២២ កម្ពុជានាំចេញគ្រាប់ស្វាយចន្ទីឆៅចំនួន ៦៧ ម៉ឺនតោនទៅទីផ្សារអន្តរជាតិ មានតម្លៃ ១,០៧៧ ពាន់លានដុល្លារឈរនៅលំដាប់ទី២ បន្ទាប់ពីអង្ករ។ គ្រាប់ស្វាយចន្ទីភាគច្រើនត្រូវបាននាំទៅវៀតណាម ជប៉ុន និងចិន៕