The Phnom Penh Post Search

Search form

Logo of Phnom Penh Post newspaper Phnom Penh Post - អគ្គ​លេខាធិការ​នៃ​មជ្ឈមណ្ឌល​អាស៊ាន-ជប៉ុន ចាប់​អារម្មណ៍​ចំពោះ​ការដាំដុះ​នៅ​កម្ពុជា

អគ្គ​លេខាធិការ​នៃ​មជ្ឈមណ្ឌល​អាស៊ាន-ជប៉ុន ចាប់​អារម្មណ៍​ចំពោះ​ការដាំដុះ​នៅ​កម្ពុជា

Content image - Phnom Penh Post
អគ្គ​លេខាធិការ​នៃ​មជ្ឈមណ្ឌល​អាស៊ាន-ជប៉ុន ចាប់​អារម្មណ៍​ចំពោះ​ការដាំដុះ​នៅ​កម្ពុជា។ រូបថត ក្រសួងពាណិជ្ជកម្ម

អគ្គ​លេខាធិការ​នៃ​មជ្ឈមណ្ឌល​អាស៊ាន-ជប៉ុន ចាប់​អារម្មណ៍​ចំពោះ​ការដាំដុះ​នៅ​កម្ពុជា

អគ្គ​លេខាធិការ​នៃ​មជ្ឈមណ្ឌល​អាស៊ាន-ជប៉ុន លោក Kunihiko HIRABAYASHI បានបង្ហាញ​ការចាប់អារម្មណ៍​ចំពោះ​ការដាំដុះ​នៅ​កម្ពុជា ដោយបាន​លើកឡើង​ថា ព្រោះ​មានភាព​សម្បូរ​បែប​ប្រកប​ដោយ​សក្តានុពល​ខ្ពស់ និង​ធម្មជាតិ ដោយ​រក្សា​ទុក​រសជាតិ​ដើម និងក្លិន ពិសេស (ស្វាយ ស្វាយចន្ទី និងម្រេច) ជាដើម។

ការបង្ហាញ​ការចាប់​អារម្មណ៍​របស់​លោក Kunihiko HIRABAYASHI ខាងលើ​នេះ ធ្វើ​ឡើងក្នុង​ពេល​លោក​ឡើង​ថ្លែង​ក្នុង​សិក្ខាសាលា ស្តីពី «ផលិតផល​ផ្លែ​ឈើ​ក្រៀម និង​ផលិតផលកសិកម្ម​កម្ពុជា​សម្រាប់​ទីផ្សារ​ប្រទេស​ជប៉ុន» ដែលរៀបចំ​ឡើង​ដោយ​ផ្ទាល់​និង​តាម​ប្រព័ន្ធវីដេអូ កាលពី​ថ្ងៃទី៣១ ខែមីនា ឆ្នាំ ២០២៣ តាមរយៈ​កិច្ចសហ​ការរៀបចំ​របស់​អគ្គ​នាយកដ្ឋាន​ជំរុញ​ពាណិជ្ជកម្ម នៃ​ក្រសួង​ពាណិជ្ជកម្ម ជាមួយនឹង​មជ្ឈមណ្ឌល​អាស៊ាន-ជប៉ុន។

បើតាម​ក្រសួង​ពាណិជ្ជកម្ម​ក្នុង​ពិធី​នោះ លោក Kunihiko បានថ្លែង​ថា «ប្រទេស​កម្ពុជា​មានការអភិវឌ្ឍ​ខ្ពស់ ផ្តោត​សំខាន់​លើ​វិស័យ​វាយនភណ្ឌ សំណង់ និងទេស​ចរណ៍ ជាពិសេស​ វិស័យ​កសិកម្ម​មានការដាំដុះ​គិតគូរ​ដល់​និរន្តរភាព វិបុលភាព និងសុខភាព ប្រកបដោយ​សុវត្ថិភាព និង​គុណភាព»។

លោកបញ្ជាក់​ទៀត​ថា មជ្ឈមណ្ឌល​អាស៊ាន-ជប៉ុន នឹង​បន្ត​កិច្ចសហ​ប្រតិបត្តិការ​ជាបន្តបន្ទាប់​ជាមួយនឹង​រាជរដ្ឋាភិបាល​កម្ពុជា ក្នុងការជំរុញ​ការធ្វើ​ពាណិជ្ជកម្ម និងវិនិយោគ​ឱ្យកាន់តែ​ច្រើនឡើង ដើម្បី​ពង្រឹង​កិច្ចសហ​ប្រតិបត្តិការ​រវាង​កម្ពុជា និង​ប្រទេស​ជប៉ុន ព្រមទាំង​លើក​កម្ពស់​សន្តិភាព​ក្នុងតំបន់​នៃ​សមាជិក​អាស៊ាន​ទាំង ១០ និង​ប្រទេស​ជប៉ុន​ផងដែរ។

លោក កៅ កោសល ប្រតិភូ​រាជរដ្ឋាភិបាល​កម្ពុជា ទទួលបន្ទុក​ជាអគ្គ​នាយក​នៃ​អគ្គ​នាយកដ្ឋាន​ជំរុញ​ពាណិជ្ជកម្ម បានលើកឡើង​ថា ប្រទេស​ជប៉ុន​ដែលជា​ទីផ្សារ​ធំ​មួយ​ក្នុង​តំបន់ ហើយ​ការរៀបចំ​សិក្ខាសាលា​នៅពេល​នេះ ក្នុង​គោលបំណង​ធ្វើការ​ផ្សព្វផ្សាយ និង​ផ្ដល់ចំណេះដឹង បទ​ពិសោធន៍ អំពី​ការជំរុញ​នាំចេញ​ផលិតផល​ផ្លែ​ឈើ​ក្រៀម និង​ផលិតផលកសិកម្ម​កម្ពុជា​សម្រាប់​ទីផ្សារ​ប្រទេស​ជប៉ុន ក្រោយ​វិបត្តិ​ជំងឺ​កូវីដ១៩។

ពាក់ព័ន្ធនឹង​ទំហំ​ពាណិជ្ជកម្ម​ទ្វេភាគី​រវាង​កម្ពុជា-ជប៉ុន វិញ លោក កៅ កោសល បញ្ជាក់ ក្នុងឆ្នាំ២០២២ មាន​ទឹកប្រាក់​ប្រមាណជាង ១,៩៤៨ លានដុល្លារ​អាមេរិក ក្នុងនោះ កម្ពុជា​បាននាំចេញ​ទៅ​ជប៉ុន មាន​ទឹកប្រាក់​ប្រមាណ​ជាង ១,១៧៣ លានដុល្លារ​អាមេរិក និង​ជប៉ុន​បាននាំចូល​មក​កម្ពុជា​មាន​ទឹកប្រាក់​ប្រមាណជាង ៧៧៥ លានដុល្លារ​អាមេរិក។

គម្រោង​វិនិយោគ​សំខាន់ៗ​របស់​ជប៉ុន​នៅ​កម្ពុជា រួមមាន វិស័យ​បង្គុំ​រថយន្ដ និង​បរិក្ខារបច្ចេក​ទេសកសិ-ឧស្សាហកម្ម ការកែច្នៃ​ម្ហូបអាហារ សណ្ឋាគារ ទេសចរណ៍ មន្ទីរ​ពេទ្យ និង​ផ្សារទំនើប។

លោក កៅ កោសល បន្ថែម​ថា​ក្រៅពី​គម្រោង​វិនិយោគ​ដែលបាន​ចុះ​បញ្ជី​នៅ​ក្រុម​ប្រឹក្សាអភិវឌ្ឍន៍​កម្ពុជា ក៏មាន​នូវ​វត្តមាន​នៃធុរកិច្ច​ជប៉ុន​តូច​ធំ ប្រមាណ ១៧០០ ក្រុមហ៊ុន ដែលមាន​សកម្មភាព​ក្នុង​វិស័យ​ធនាគារ អាកាសចរណ៍ និងភោជនីយដ្ឋាន​ផងដែរ៕ យុត្ថារ៉ូ

អត្ថបទគួរចាប់អារម្មណ៍