.jpg)
កូរ៉េ ចាប់អារម្មណ៍ការវិនិយោគលើវិស័យសក្តានុពលនៅកម្ពុជា។ ហេង ជីវ័ន
ភ្នំពេញៈ វិនិយោគិនកូរ៉េ មកពីទីក្រុងឈុនឈ័ង បានចំណាប់អារម្មណ៍ចំពោះសក្តានុពលនៃឱកាសវិនិយោគនៅកម្ពុជា ព្រមទាំងមានគម្រោងរៀបចំឱ្យមានជំនួបពាណិជ្ជកម្មរវាងធុរជននៃប្រទេសទាំង២ ខណៈទំហំពាណិជ្ជកម្មប្រទេសទាំង២ កាលពីឆ្នាំ២០២២ សម្រេចបានជិត ៧៧៩ លានដុល្លារ កើនឡើងតិចតួច ធៀបនឹងឆ្នាំ២០២១។
កាលពីថ្ងៃទី៣០ ខែមីនា ឆ្នាំ២០២៣ នៅទីស្នាក់ការសភាពាណិជ្ជកម្មកម្ពុជា លោក ងួន ម៉េងតិច អគ្គនាយកនៃសភាពាណិជ្ជកម្មកម្ពុជា (CCC) បានទទួលជួបពិភាក្សាការងារជាមួយគណៈប្រតិភូកូរ៉េ ដឹកនាំដោយ លោក Go Kwangman ប្រធានសភាពាណិជ្ជកម្មទីក្រុងឈុនឈ័ន ប្រទេសកូរ៉េ។
សេចក្តីប្រកាសព័ត៌មានរបស់ CCC ឱ្យដឹងថា ជំនួបពិភាក្សានេះ ផ្តោតសំខាន់លើកិច្ចសហប្រតិបត្តិការរវាងសភាពាណិជ្ជកម្មទាំង២ និងសិក្សាលទ្ធភាពចុះអនុស្សរណៈនាពេលអនាគត។ គណៈប្រតិភូធុរកិច្ចទីក្រុងឈុនឈ័ង ដែលអញ្ជើញចូលរួមក្នុងកិច្ចពិភាក្សានេះ មាននៅក្នុងវិស័យវិស្វកម្ម និងសំណង់ បណ្តុះបណ្តាលវិជ្ជាជីវៈ អប់រំ និងវប្បធម៌ និងទេសចរណ៍។
ក្នុងឱកាសនោះភាគីទាំង២ ក៏បានពិភាក្សាគ្នាអំពីការជំរុញពាណិជ្ជកម្មផលិតផលសំខាន់ៗ របស់តំបន់ឈុនឈ័ង និងផលិតផលសក្តានុពលកម្ពុជា តាមរយៈការផ្សព្វផ្សាយ និងការតាំងផលិតផលនៅប្រទេសទាំង២ ព្រមទាំងរៀបចំព្រឹត្តិការណ៍ជំនួបពាណិជ្ជកម្មរវាងធុរជនប្រទេសទាំង២។ ភាគីទាំង២ នឹងបន្តសិក្សាលម្អិតទៅលើគម្រោងសហការនាពេលអនាគត។ នេះបើយោងតាម CCC។
របាយការណ៍របស់អគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ក្នុងឆ្នាំ២០២២ ការធ្វើពាណិជ្ជកម្មរវាងប្រទេសទាំង២ មានទឹកប្រាក់សរុប ៧៧៨,៩២៤ លានដុល្លារ កើនឡើង ០,៦ ភាគរយបើធៀបឆ្នាំ២០២១ ក្នុងនោះការនាំទំនិញពីកម្ពុជាទៅកូរ៉េ មានទឹកប្រាក់ ២៣៣,៦៣៨ លានដុល្លារ កើន ២០,៤ ភាគរយ និងទំនិញពីកូរ៉េ មកកម្ពុជា មាន ៥៤៥,២៨៦លានដុល្លារ ធ្លាក់ចុះ ៦ភាគរយ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២ ខែមេសា ថា ទំនាក់ទំនងល្អផ្នែកការទូតបានធ្វើឱ្យសកម្មភាពនៃការពាណិជ្ជកម្មរវាងប្រទេសកម្ពុជា-កូរ៉េ កើនឡើងជាបន្តបន្ទាប់ ខណៈប្រទេសទាំង២ ក៏មានកិច្ចព្រមព្រៀងពាណិជ្ជកម្មសេរីទ្វេភាគី (CKFTA) ដែលចូលជាធរមានហើយផងដែរ។ ការកើនឡើងនៃសមត្ថភាពផលិតកម្មនៅកម្ពុជា នឹងជួយធ្វើឱ្យការនាំចេញទំនិញពីកម្ពុជាទៅទីផ្សារអន្តរជាតិ រួមទាំងប្រទេសកូរ៉េ កើនឡើងខ្ពស់ ដែលកំណើនសេដ្ឋកិច្ចពិភពលោកមានភាពល្អប្រសើរឡើងវិញ។
លោកបន្ថែមថា ក្រៅពីការការផ្លាស់ប្តូរពាណិជ្ជកម្មជាមួយគ្នា ប្រទេសកូរ៉េក៏បានបើកទទួលប្រជាជនកម្ពុជាឱ្យទៅធ្វើការនៅប្រទេសរបស់ខ្លួនផងដែរ។ លោកថ្លែងថា៖«កូរ៉េ គឺជាទីផ្សារនាំចេញសំខាន់មួយរបស់កម្ពុជា ដោយមានផលិតផលចម្រុះជាច្រើនត្រូវបាននាំទៅទីនោះ។ បច្ចុប្បន្នក្រៅពីផលិតផលវាយនភណ្ឌ ការនាំចេញផលិតផលកសិកម្មពីកម្ពុជាទៅកូរ៉េ ក៏មានបរិមាណកាន់តែច្រើនផងដែរ»។
ព្រឹត្តិបត្រពាណិជ្ជកម្ម (iTrade Bulletin) ដែលរៀបចំដោយវិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ (TTRI) នៃក្រសួងពាណិជ្ជកម្ម សម្រាប់ខែមីនា ឆ្នាំ២០២៣ បានបង្ហាញថា សាធារណរដ្ឋកូរ៉េ បានក្លាយជាដៃគូពាណិជ្ជកម្មធំជាងគេទី១៤ របស់កម្ពុជា នៅក្នុងឆ្នាំ២០២២។ ការវិនិយោគផ្ទាល់របស់កូរ៉េនៅកម្ពុជា ក្នុងឆ្នាំ២០២១ ស្ថិតនៅលេខ៣ ដោយមានទឹកប្រាក់ ២៨៣,៥ លានដុល្លារ។
ផលិតផលកម្ពុជានាំចេញទៅកូរ៉េ ក្នុងឆ្នាំ២០២២ ភាគច្រើនគឺជា ស្បែកជើង ស្រោមជើង និងវត្ថុប្រហាក់ប្រហែល, សម្លៀកបំពាក់ និងគ្រឿងបន្ទាប់បន្សំធ្វើពីក្រណាត់ចាក់, ម៉ាស៊ីន និងឧបករណ៍អគ្គិសនី, និងអាលុយមីញ៉ូម និងវត្ថុធ្វើពីអាលុយមីញ៉ូម ជាដើម។ ចំណែកទំនិញនាំពីកូរ៉េ មានដូចជា យានយន្ត ភេសជ្ជៈស្រា និងទឹកខ្មេះ, ស្បែកឆៅ, ម៉ាស៊ីន និងឧបករណ៍អគ្គិសនី និងផលិតផលបានពីការចាក់ដោយម្ជុល។
យោងតាម iTrade Bulletin សម្រាប់ច្រកទីផ្សារកូរ៉េ កម្ពុជាទទួលបានអត្រាពន្ធអនុគ្រោះសម្រាប់ការនាំចេញទៅកាន់កូរ៉េ ក្រោមក្របខ័ណ្ឌចំនួន៣ រួមមាន កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ (CKFTA) កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់( RCEP) និងកិច្ចព្រមព្រៀងពាណិជ្ជកម្មសេរីអាស៊ាន និងកូរ៉េ (AKFTA)៕
