ភ្នំពេញៈ ប្រេងសាំង ​លក់រាយ​នៅតាម​ស្ថានីយ​ប្រេង​ ចាប់ពី​ថ្ងៃទី​១-១០ ខែមិថុនា ឆ្នាំ​២០២៣ ត្រូវបាន​លក់​ក្នុងតម្លៃ ៤១៥០ ​រៀល ​ក្នុង ​១ លីត្រ ដោយ​កើនឡើង ៥០ ​រៀល​ បើ​ធៀប​នឹង​រយៈពេល ១០ ​ថ្ងៃ​កន្លង​មក ខណៈ​ប្រេងម៉ាស៊ូត ត្រូវបាន​លក់​ក្នុងតម្លៃ​ដដែល គឺ ៣៨៥០​ រៀល​។​

​សេចក្តីជូនដំណឹង​រប​ស់​ក្រសួងពាណិជ្ជកម្ម ស្តីពី​ថ្លៃ​លក់រាយ​ប្រេងឥន្ធនៈ ​នៅតាម​ស្ថានីយ ចេញផ្សាយ​ក្នុង​ថ្ងៃទី​១ ខែមិថុនា ឆ្នាំ​២០២៣ បានឱ្យដឹងថា យោងតាម​ការប្រែប្រួល​នៃ​តម្លៃ​ប្រេងឥន្ធនៈ ​លើ​ទីផ្សារ​ក្នុង​តំបន់ និង​អន្តរជាតិ តម្លៃ​ប្រេងសាំង​ធម្មតា ​(EA92) ដែល​ត្រូវដាក់​លក់រាយ​ចាប់ពី​ថ្ងៃទី​១-១០ ខែមិថុនា ឆ្នាំ​២០២៣ គឺ ៤១៥០​ រៀល​ក្នុង ​១​ លីត្រ ដោយ​កើនឡើង ៥០​ រៀល ​បើ​ធៀប​នឹង​តម្លៃ​ចន្លោះ​ពីថ្ងៃ​ទី​២១-៣១ ខែឧសភា ខណៈ​ប្រេងម៉ាស៊ូត មានតម្លៃ ៣៨៥០ ​រៀល ដែល​តម្លៃ​នេះ​ស្ថិតនៅ​ថេរ​។​

​យោងតាម​ក្រសួងពាណិជ្ជកម្ម តម្លៃ​ប្រេងសាំង និង​ម៉ា​ស៊ូ​ត ក្នុង​ពេលនេះ​ ធៀប​នឹង​ដើមឆ្នាំ​២០២៣ គឺ​ធ្លាក់ចុះ​បន្តិចបន្តួច ដោយ​កាលពី​ថ្ងៃទី​១ ខែមករា ឆ្នាំ​២០២៣ ប្រេងសាំង​លក់រាយ​នៅតាម​ស្ថានីយ មានតម្លៃ ៤៥៥០​រៀល​​ក្នុង ​១ លីត្រ ខណៈ​ប្រេងម៉ាស៊ូត មានតម្លៃ ៤២០០​ រៀល​។​

​លោក ហុង វណ្ណៈ អ្នកជំនាញ​សេដ្ឋកិច្ច​ នៅ​រាជបណ្ឌិត្យសភាកម្ពុជា បាន​ប្រាប់​ភ្នំពេញ​ប៉ុស្តិ៍​នៅ​ថ្ងៃទី​១ ខែមិថុនា ថា ដោយសារ​កម្ពុជា ​ជា​ប្រទេស​នាំចូល​ប្រេង ដូច្នេះ​តម្លៃ​របស់​វា​តែង ​ប្រែប្រួល​ទៅតាម​និន្នាការ​ទីផ្សារ និង​នយោបាយ​​ពិភពលោក​។ បើ​គេ​ពិនិត្យ​ពិនិត្យមើល​ទៅលើ​តម្លៃ​ប្រេងឥន្ធនៈ​ ចាប់តាំងពី​ដើមឆ្នាំ​២០២៣ រហូតមកដល់​ពេលនេះ គឺ​មិនសូវមាន​ការប្រែប្រួល​ច្រើន​ដូច​កាលពី​ឆ្នាំ​២០២១-២០២២ ឡើយ​។ លោក​បន្តថា តម្លៃ​ប្រេងឥន្ធនៈ​ទាប ក៏បាន​ចូលរួមចំណែក​ក្នុងការ​កាត់បន្ថយ​ភាពក្រីក្រ​របស់​ប្រជាជន​បាន ១ ​កម្រិត ​ផងដែរ​។​

​លោក​បញ្ជាក់ថា​៖«​តម្លៃ​ប្រេងឥន្ធនៈ​កាន់តែ​ទាប គឺ​កាន់តែ​ប្រសើរ​ល្អ​ សម្រាប់​សេដ្ឋកិច្ច​ប្រទេស​នាំចូល​ប្រេង​»​។​

​ទោះយ៉ាងណា​លោក​លើកឡើងថា ប្រសិនបើ​រដ្ឋាភិបាល​អាច​ចូលរួមចំណែក​ក្នុងការ​ឧបត្ថម្ភ​ធន ​កាន់តែច្រើន​បន្ថែមទៀត​នោះ វា​នឹង​ជួយ​ធ្វើឱ្យ​សកម្មភាព​សេដ្ឋកិច្ចកម្ពុជា​ កាន់តែ​មាន​ដំណើរ​ឆ្ពោះទៅមុខ​កាន់តែ​លឿន​។​

​កាលពី​ខែធ្នូ ឆ្នាំ​២០២២ ប្រធាន​សម្ព័ន្ធ​សមាគម​សហគ្រាស​ធុន​តូច និង​មធ្យម​កម្ពុជា លោក តែ តាំង​ប៉ បាន​ប្រាប់​ភ្នំពេញ​ប៉ុស្តិ៍​ថា បច្ចុប្បន្ន​ប្រទេស​កម្ពុ​ជា មាន​ភាព​ទាក់ទាញ​ច្រើន​ សម្រាប់​ការបណ្តាក់ទុន​ផ្ទាល់ ហើយ​វា​នឹង​កាន់តែ​ពិសេស​បន្ថែមទៀត​ប្រសិនបើ​កម្ពុជា​អាចធ្វើ​យ៉ាងណា​បញ្ចុះតម្លៃ​ថាមពល​ឱ្យបាន​ទាប​ជាង ឬ​ប្រហាក់ប្រហែល​នឹង​ប្រទេសជិតខាង​។​

​លោក​បានឱ្យ​ភ្នំពេញ​ប៉ុស្តិ៍​កាលពី​ខែធ្នូ ឆ្នាំ​២០២២ ថា​៖«​តម្លៃ​ប្រេង និង​តម្លៃ​អគ្គិសនី ជា​កត្តា​ផ្គួប​ផ្សំ​ដ៏​សំខាន់ ​ក្នុងការ​ទាក់ទាញ​វិនិយោគិន​ក្រៅប្រទេស ព្រោះថា ប្រេង និង​អគ្គិសនី​ជា​ធាតុ​ផ្សំ​ដ៏​សំខាន់​ សម្រាប់​ផ្នែក​ផលិតកម្ម ក្រៅ​ពី​ការចំណាយ​ទៅលើ​វត្ថុធាតុដើម និង​កម្លាំង​ពលកម្ម​។ កាលណា​តម្លៃ​ប្រេង រួមទាំង​តម្លៃ​អគ្គិសនី ​មាន​ស្ថិរភាព និង​តម្លៃ​ទាប អ្នកវិនិយោគ​ក្រៅ​ស្រុក ​នឹង​មើលឃើញ​ឱកាស​ផ្សេងៗ​ចេញពី​កត្តា​ទាំងអស់នោះ​»៕