​គណៈកម្មាធិការ​អចិន្ត្រៃយ៍​រួម​ស្តី​ពី​ពាណិជ្ជកម្ម​ ឧស្សាហកម្ម​ និង​ធនាគារ​របស់​ប្រទេស​ថៃ​ (JSCCIB) ​បាន​និយាយ​​ថា​ គ្រោះ​រាំង​ស្ងួត​ ទឹក​ជំនន់​ និង​ធាតុ​​អាកាស​ហួស​ហេតុ​ផ្សេង​ទៀត​ ដែល​កាន់​តែ​អាក្រក់​ទៅ​ៗ ​ដោយ​សារ​​ការ​ប្រែ​ប្រួស​អាកាស​ធាតុ​ អាច​​បង្ក​ការ​ខូច​ខាត​ដល់​សេដ្ឋកិច្ច​ថៃ​​រហូត​ដល់​​ ៣៦ ប៊ីលាន​បាត​ក្នុង​ឆ្នាំ​ ២០២៣​ នេះ​។ ​នេះ​បើ​តាម​ការ​ចុះ​ផ្សាយ​របស់​កាសែត​បាង​កកប៉ុស្តិ៍​កាល​​ពី​ថ្ងៃ​ព្រហស្បតិ៍​​​។

លោក​ Kriengkrai Thiennukul​ ប្រធាន​សហព័ន្ធ​ឧស្សាហកម្ម​ថៃ​ (FTI) ​ដែល​ជា​សមាជិក​សំខាន់​របស់JSCCIB ​បាន​​លើក ​ឡើង​ថា​ កង្វះ​ខាត​ទឹក​ដែល​បណ្តាល​មក​ពី​គ្រោះ​រាំង​ស្ងួត​ គឺ​ជា​កង្វល់​នាំ​មុខ​គេ​របស់​គណៈកម្មាធិការ​ ព្រោះ​វា​អាច​ជះ​ឥទ្ធិពល​យ៉ាង​ធំ​ដល់​ទាំង​វិស័យ​កសិកម្ម​ និង​ផលិត​កម្ម​ដែល​ធ្វើ​ឱ្យ​ស្ទះ​ដំណើរការ​ដល់​ការ​នាំ​ចេញ​ ដែល​​កំពុង​ធ្លាក់​ចុះ​ស្រាប់​ហើយ​។ ​

​លោក​​បាន​​បន្ត​​​ថា​​​៖​«​​​ក្រុម​ហ៊ុន​​ផលិត​ ​មាន​​ការ​​ព្រួយ​​បារម្ភ​​ពី​​គ្រោះ​​រាំង​ស្ងួត​ ​ព្រោះ​​វា​​អាច​​កាត់​​បន្ថយ​​សមត្ថភាព​​ផលិត​ ​និង​​ប៉ះ​ពាល់​​ដល់​​ការ​​នាំ​​ចេញ​»​។​

​យោង​តាម​ទិន្នន័យ​ចុង​ក្រោយ​របស់​ក្រសួង​ពាណិជ្ជកម្ម​ថៃ​ ក្នុង​រយៈ​ពេល​៤​ ខែ​ដំបូង​នៃ​ឆ្នាំ​ ២០២៣ ​​ការ​នាំ​ចេញ​របស់​ថៃ​បាន​ថយ​ចុះ​ ៥,២ ភាគរយ​ បើ​ប្រៀប​ធៀប​នឹង​រយៈ​​ពេល​ដូច​គ្នា​កាល​ពី​ឆ្នាំ​មុន​ មក​ត្រឹម​ ៩២​ ប៊ីលាន​ដុល្លារ​ ខណៈ​ការ​នាំ​ចូល​ធ្លាក់​ចុះ​ត្រឹម​ ២,២ ភាគរយ​ មក​ត្រឹម​ ៩៦,៥ ប៊ីលាន​ដុល្លារ​។

ការ​នេះ​ ​បណ្តាល​ឱ្យ​មាន​ឱន​ភាព​ពាណិជ្ជកម្ម​ចំនួន​ ៤,៥១ ប៊ីលាន​ដុល្លារ​។ ​សញ្ញា​នៃ​ការ​ធ្លាក់​ចុះ​នៃ​ការ​នាំ​ចេញ​ បាន​ចាប់​ផ្តើម​កាល​ពី​ចុង​ឆ្នាំ​មុន​ នៅ​ពេល​ដែល​សូចនាករ​សេដ្ឋកិច្ច​សំខាន់​ៗ ​បាន​បង្ហាញ​ពី​ការ​ធ្លាក់​ចុះ​​នៃ​ការ​នាំ​ចេញ​ ចំ​ពេល​មាន​ការ​ព្រួយ​បារម្ភ​អំពី​លទ្ធភាព​នៃ​ការ​ធ្លាក់​ចុះ​សេដ្ឋកិច្ច​នៅ​ឆ្នាំ ២០២៣​ ​នេះ​។​

​JSCCIB ​បាន​ដាក់​សំណើ​ទៅ​​លោក​នាយក​រដ្ឋ​មន្ត្រី​ ប្រាយុធ​ ចាន់អូចា​ កាល​​ពី​ថ្ងៃ​ទី​៣១​ ឧសភា ​ដើម្បី​ដោះស្រាយ​គ្រោះ​រាំង​ស្ងួត​ ដោយ​សង្ឃឹម​ថា​ នឹង​ធ្វើ​ការ​ជាមួយ​រដ្ឋាភិបាល​ក្នុង​ការ​ទប់​ស្កាត់​ផល​ប៉ះ​ពាល់​ធ្ងន់​ធ្ងរ​ណា​មួយ​ ដែល​បណ្តាល​មក​ពី​កង្វះ​ទឹក​។

​ជុំ​វិញ​បញ្ហា​នេះ​ វិស័យ​ធុរកិច្ច​ ចង់​ឱ្យ​អាជ្ញាធរ​ថៃ​រៀប​ចំ​ដំណោះ​ស្រាយ​រយៈ​ពេល​មធ្យម​ និង​រយៈ​ពេល​វែង​ ដើម្បី​ធានា​ឱ្យ​គម្រោង​វិនិយោគ​ ជា​ពិសេស​គម្រោង​ដែល​ស្ថិត​នៅ​ក្នុង​ច្រក​របៀង​សេដ្ឋកិច្ច​ភាគ​ខាង​កើត​ (EEC) ដ៏​សំខាន់​សម្រាប់​កំណើន​សេដ្ឋកិច្ច​ថៃ​ អាច​បន្ត​ដំណើរ​ការ​បាន​។​ បើ​តាម​លោក​ Kriengkrai​អង្គភាព​អាជីវកម្ម​បាន​រៀប​ចំ​ផែនការ​គ្រប់​គ្រង​ហានិភ័យ​ដើម្បី​ទប់​ទល់​នឹង​បញ្ហា​គ្រោះ​រាំង​ស្ងួត​និង​ទឹក​ជំនន់​។​

​ក្នុង​វិស័យ​ផលិតកម្ម​ ក្រុម​ហ៊ុន​កំពុង​អនុវត្ត​វិធានការ​ចំនួន ​៣ ​រួម​មាន​​ការ​កាត់​បន្ថយ​ ការ​ប្រើ​ប្រាស់ និង​កែច្នៃ​ទឹក​ឡើង​វិញ​ ដើម្បី​​ធានា​ថា​ ពួក​គេ​មាន​ទឹក​គ្រប់​គ្រាន់​សម្រាប់​ប្រើ​ប្រាស់​ក្នុង​ដំណើរ​ការ​ផលិត​របស់​ខ្លួន​។ ​​ក្រុមហ៊ុន​នានា​ ក៏​កំពុង​លើក​ទឹក​ចិត្ត​កសិករ​ឱ្យ​ប្រើ​ប្រាស់​បច្ចេកវិទ្យា​ច្នៃ​ប្រឌិត​បន្ថែម​ទៀត​ផង​ដែរ​ ដើម្បី​ជួយ​ពួក​គេ​រក្សា​ការ​ផ្គត់​ផ្គង់​ទឹក​ឱ្យ​បាន​ល្អ​ប្រសើរ​​។

យ៉ាង​ណា​មិញ​ លោកKriengkraiបាន​បន្ត​ថា​ ក្នុង​​រ​យៈ​​ពេ​ល​​វែង​ រដ្ឋាភិបាល​​​គួរ​​​តែ​​ដើរ​​តួនាទី​​សំខាន់​​ក្នុង​​ការ​​ទប់​ទល់​​នឹ​ង​​គ្រោះ​​រាំង​​ស្ងួត​និង​​បញ្ហា​​ទាក់​​ទង​​នឹង​​ទឹក​​ជំនន់​៕