.jpg)
លោកស៊ុយ សែម នៅពីក្រោយលោកស្រីម៉ែន សំអន ដែលកាន់ដុំមាស ក្នុងពេលចុះទស្សនកិច្ចការដ្ឋានអាជីវកម្ម និងរោងចក្រចម្រាញ់រ៉ែមាស ក្នុងតំបន់អូរខ្វាវ ស្រុកកែវសីមា កាលពីថ្ងៃទី១០មិថុនា។ រូបថត ក្រសួងរ៉ែ និងថាមពល
មណ្ឌលគិរីៈ ក្រសួងរ៉ែ និងថាមពលបានឱ្យដឹងថា គិតត្រឹមដើមខែមិថុនា ឆ្នាំ ២០២៣ នេះ កម្ពុជាបានចម្រាញ់រ៉ែមាសបានចំនួន ៦ ៧២៧ គីឡូក្រាម និងរកចំណូលពីសួយសារ បានជាង ១០ លានដុល្លារ។ នេះបើតាមលោក ស៊ុយ សែម រដ្ឋមន្រ្ដីក្រសួងរ៉ែ និងថាមពល ថ្លែងក្នុងពេលចុះទស្សនកិច្ចការដ្ឋានអាជីវកម្ម និងរោងចក្រចម្រាញ់រ៉ែមាស ក្នុងតំបន់អូរខ្វាវ ស្រុកកែវសីមា ខេត្តមណ្ឌលគិរី។
ដំណើរទស្សនកិច្ចនេះក៏មានការចូលរួមពីលោកស្រី ម៉ែន សំអន ឧបនាយករដ្ឋមន្ត្រី រដ្ឋមន្រ្តីក្រសួងទំនាក់ទំនង ជាមួយរដ្ឋសភា-ព្រឹទ្ធសភា និងអធិការកិច្ច រួមនឹងអាជ្ញាធរខេត្តមណ្ឌលគិរី និងក្រុមហ៊ុន វុឌសង់ អ៊រ៉ល (ខេមបូឌា) លីមីធីតផងដែរ កាលពីថ្ងៃទី ១០ ខែមិថុនា ឆ្នាំ ២០២៣។
តាមរយៈក្រសួងរ៉ែ និងថាមពល បានឱ្យដឹងថា តំបន់អាជីវកម្មរ៉ែមាសអូរខ្វាវ ស្ថិតនៅក្នុងភូមិសាស្ត្រឃុំចុងផ្លាស់ ស្រុកកែវសីមា ខេត្តមណ្ឌលគិរី បានចំណាយពេលវេលាអស់ជិត១៤ឆ្នាំ ក្នុងការសិក្សារុករករ៉ែ ការសិក្សាវាយតម្លៃសមិទ្ធភាពសេដ្ឋកិច្ចនៃជម្រកធនធានរ៉ែ និងការសិក្សាវាយតម្លៃគ្រប់ជ្រុងជ្រោយ លើផលប៉ះពាល់បរិស្ថាន និងសង្គមនៃប្រតិបត្តិការអាជីវកម្មធនធានរ៉ែផងដែរ។
គម្រោងអាជីវកម្មរ៉ែមាសនេះបានផ្តល់ការងារសរុបចំនួន ៤៣៤ នាក់ ក្នុងនោះជនជាតិខ្មែរមានចំនួន ៣៤៧នាក់ (ក្នុងនោះស្រីចំនួន ៦១នាក់) និងជនជាតិបរទេសចំនួន ៨៧នាក់ (ក្នុងនោះស្រីចំនួន ៣នាក់)។ នេះបើតាមក្រសួងរ៉ែ និងថាមពល។
ក្រសួងបានបញ្ជាក់ថា ៖ «បន្ទាប់ពីបានសម្ពោធដាក់ឱ្យដំណើរការការដ្ឋាន និងរោងចក្រចម្រាញ់រ៉ែមាសនេះជាផ្លូវការ រហូតមកទល់នឹងពេលបច្ចុប្បន្ននេះ ក្រុមហ៊ុន រ៉ឺនេសង់ មីនើរ៉ល (ខេមបូឌា) លីមីធីត បានចម្រាញ់មាសដែលមានគុណភាព ៩០% បានចំនួនសរុប ៦ ៧២៧,៧០ គីឡូក្រាមហើយក្រុមហ៊ុនបានបង់សួយសារជូនរដ្ឋសរុបចំនួន១០,២២៨,២៣៩ដុល្លារ»។
លោក ស៊ុយ សែម ធ្លាប់បានបញ្ជាក់ថា ចាប់តាំងពីប្រទេសកម្ពុជាចាប់ផ្តើមបើកដំណើរការអាជីវកម្មរ៉ែមាស នាខែមិថុនា ឆ្នាំ ២០២១ មកដល់ខែវិច្ឆិកា ឆ្នាំ២០២២ មានក្រុមហ៊ុនចំនួន ៤ ដែលបានទទួលអាជ្ញាប័ណ្ណក្នុង ៤ ទីតាំងផ្សេងគ្នា គឺនៅខេត្តចំនួន ៣ គឺព្រះវិហារ, ខេត្តក្រចេះ និងខេត្តមណ្ឌលគិរី។
ការសាងសង់ហេដ្ឋារចនាសម្ព័ន្ធសំខាន់ៗនៃការដ្ឋានអាជីវកម្ម និងរោងចក្រចម្រាញ់រ៉ែមាស ត្រូវបានចាប់ផ្តើមពីពាក់កណ្ដាលឆ្នាំ២០២០ ដោយប្រើប្រាស់ទុនវិនិយោគសរុបប្រមាណ ១២០លានដុល្លារអាមេរិក ហើយត្រូវបានបញ្ចប់ និងប្រកាសដាក់ឱ្យដំណើរការជាផ្លូវការដោយលោកស៊ុយ សែម កាលពីនៅថ្ងៃទី២១ ខែមិថុនា ឆ្នាំ២០២១។ ដំណើរការអាជីវកម្មធនធានរ៉ែនេះ ក៏បាននិងកំពុងបង្កើតបានផងដែរនូវសមត្ថភាពជាតិ និងគំរូថ្មីសម្រាប់ការធ្វើអាជីវកម្មធនធានរ៉ែ ប្រកបដោយការទទួលខុសត្រូវ និងការអភិវឌ្ឍប្រកបដោយចីរភាព។
រដ្ឋលេខាធិការប្រចាំការ ក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានលើកឡើងកាលពីចុងខែមករា ឆ្នាំ២០២៣ ថា ដោយសារតែធនធានរ៉ែមាស ជាឧស្សាហកម្មថ្មីមួយ ដែលកម្ពុជាទើបទទួលបានអត្ថប្រយោជន៍ពីធនធាននេះ គឺបន្ទាប់ពីក្រុមហ៊ុនឯកជនបានធ្វើការវិនិយោគយ៉ាងច្រើន ក្នុងការររុករកដែលធ្វើឱ្យចំណូលពន្ធ និងសួយសារពីធនធាននេះនៅមានកម្រិតតិចតួច។
លោក ហុង វណ្ណៈ អ្នកជំនាញសេដ្ឋកិច្ច នៃរាជបណ្ឌិត្យសភាកម្ពុជា បានថ្លែងនៅថ្ងៃទី១១ ខែមិថុនាថា នេះគឺជាភ័ព្វសំណាងរបស់កម្ពុជា ដែលមានទីតាំងចម្រាញ់រ៉ែមាស ប៉ុន្តែចំនួនដែលផលិតបាននេះ គឺមិនច្រើននោះទេ បើធៀបជាមួយនឹងបណ្តាប្រទេសផ្សេងទៀត ដូចជាប្រទេសឥណ្ឌាជាដើម។
ទោះជាយ៉ាងណា លោកថា ការផលិតបានរបស់កម្ពុជាក្នុងចំនួនប៉ុណ្ណេះ ក៏ចាត់ទុកថា បានរួមចំណែកដល់វិស័យសេដ្ឋកិច្ចរបស់កម្ពុជាបាន១កម្រិតដែរ៕
