.jpg)
ទិដ្ឋភាពទូកុងតឺន័រនៅកំពង់ផែព្រះសីហនុ កាលពីថ្ងៃទី ២៥ ខែមេសា ឆ្នាំ ២០២៣។ រូបថត ហុង មិនា
ភ្នំពេញៈ ការនាំទំនិញពីកម្ពុជាទៅសិង្ហបុរី បានហក់ឡើងយ៉ាងខ្ពស់ក្នុងរយៈពេល ៥ ខែដំបូងឆ្នាំ ២០២៣ ដោយមានទឹកប្រាក់ជាង ៣៤៣ លានដុល្លារ កើនជាង ៥០០ ភាគរយ បើធៀបរយៈពេលដូចគ្នាឆ្នាំ ២០២២។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា (GDCE)។
ទិន្នន័យរបស់ GDCE ឱ្យដឹងថា ពីខែមករា ដល់ខែឧសភា ឆ្នាំ ២០២៣ កម្ពុជាបាននាំចេញទំនិញទៅប្រទេសសិង្ហបុរី ក្នុងទឹកប្រាក់ ជាង ៣៤៣ លានដុល្លារ កើនឡើង ជាង ៥០៨ ភាគរយ បើធៀបនឹងរយៈពេលដូចគ្នាឆ្នាំ ២០២២ ដែលមានចំនួនតែ ៥៦,៤៥ លានដុល្លារ។ ចំណែកទំនិញដែលសិង្ហបុរីនាំមកកម្ពុជាមានចំនួនជាង ៣១៥ លានដុល្លារ ធ្លាក់ចុះ ៨១,១ ភាគរយពីចំនួន ជាង ១,៦ ពាន់លានដុល្លារ។
បើតាមទិន្នន័យខាងលើ គឺទំហំពាណិជ្ជកម្មរវាងប្រទេសទាំង ២ មានទឹកប្រាក់សរុប ជិត ៦៥៩ លានដុល្លារ ធ្លាក់ចុះ ៦១,៨ ភាគរយពីចំនួនជាង ១ ,៧ លានដុល្លារ។ សិង្ហបុរី គឺជាដៃគូពាណិជ្ជកម្មអន្តរជាតិធំជាងគេទី៦ របស់កម្ពុជា ដោយតាមពីក្រោយប្រទេសចិន អាមេរិក វៀតណាម ថៃ និងជប៉ុន។ សម្រាប់ជញ្ជីងពាណិជ្ជកម្មទ្វេភាគី គឺកម្ពុជាមានឧត្តមភាពប្រមាណ ២៧,៨៥ លានដុល្លារ ខណៈរយៈពេលដូចគ្នាក្នុងឆ្នាំ ២០២២ គឺជញ្ជីងពាណិជ្ជកម្មកម្ពុជា មានឱនភាពរហូតដល់ ១ ៦១០,១៩ លានដុល្លារ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ ភ្នំពេញ ប៉ុស្តិ៍ ក្នុងថ្ងៃទី ២៨ ខែមិថុនាថា ការកើនឡើងនៃសមត្ថភាពផលិតកម្មក្នុងស្រុក និងការបង្កើតឱ្យមានផលិតផលថ្មីៗកាន់តែច្រើន គឺកំពុងចូលរួមចំណែកយ៉ាងសកម្មក្នុងការលើកកម្ពស់ សមត្ថភាពនាំចេញរបស់កម្ពុជាទៅទីផ្សារអន្តរជាតិ។
សិង្ហបុរី គឺជាទីផ្សារសំខាន់មួយរបស់កម្ពុជា ព្រោះក្រៅពីទទួលទិញទំនិញពីកម្ពុជាដើម្បីបំពេញតម្រូវការក្នុងប្រទេស សិង្ហបុរីក៏បាននាំទំនិញមួយចំនួនពីកម្ពុជាយកទៅកែច្នៃ និងវេចខ្ចប់ដើម្បីនាំចេញទៅលក់បន្តនៅទីផ្សារអន្តរជាតិ។ លោកបន្តថា ការធ្វើពាណិជ្ជកម្មរវាងប្រទេសទាំង ២ ត្រូវរំពឹងថា នឹងកើនឡើងបន្ថែមទៀតនាពេលខាងមុខ ខណៈកម្ពុជា និងសិង្ហបុរី គឺសុទ្ធតែជាសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) ផងដែរ។
លោកថ្លែងថា៖ «លទ្ធផលនៃការខិតខំរបស់រដ្ឋាភិបាល និងផ្នែកឯកជន បានធ្វើឱ្យកម្ពុជាមានផលិតផលកាន់តែច្រើនប្រភេទសម្រាប់ឆ្លើយតបនឹងគ្រប់តម្រូវការរបស់អ្នកបញ្ជា ទិញ។ ដំណើរការនៃការធ្វើពិពិធកម្មទំនិញផលិតនៅកម្ពុជា កំពុងស្ថិតនៅលើផ្លូវដ៏ល្អ និងមានភាពរស់រវើក»។ លោកបន្តថា៖«កំណើនទឹកប្រាក់នាំចេញទំនិញទៅទីផ្សារអន្តរជាតិ ក៏បញ្ជាក់ពីភាពរឹងមាំនៃខឿនសេដ្ឋកិច្ចរបស់កម្ពុជាផងដែរ»។
ទោះយ៉ាងណា អ្នកជំនាញសេដ្ឋកិច្ចខាងលើអះអាងថា កម្ពុជាត្រូវតែខិតខំបន្ថែមទៀតក្នុងការកែច្នៃធនធានក្នុងប្រទេសរបស់ខ្លួន ដើម្បីកាត់បន្ថយការនាំចូលពីបរទេស និងបង្កើតតម្លៃបន្ថែមសម្រាប់ការនាំចេញ ទំនិញ។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ ធ្លាប់បានលើកឡើងថា ជាទូទៅការដោះដូរពាណិជ្ជកម្ម តែងតែប្រែប្រួលជារឿងធម្មតា ដោយវាអាស្រ័យទៅលើតម្រូវការតិច ឬច្រើន។ ភាគច្រើនមុខទំនិញដែលកម្ពុជានាំទៅប្រទេសសិង្ហបុរី គឺជាផលិតផលកសិកម្ម ខណៈទំនិញនាំពីសិង្ហបុរី មានដូចជា ប្រេងឥន្ធនៈ កៅស៊ូក្រាលថ្នល់ សារធាតុគីមីឧស្សាហកម្ម គ្រឿងអគ្គិសនី និងភេសជ្ជៈ ជាដើម។
លោកថ្លែងថា៖ «មូលហេតុមិនធំដុំទេ ព្រោះការធ្វើពាណិជ្ជកម្មគឺដូចតម្លៃនៅលើទីផ្សារអ៊ីចឹង ថ្ងៃខ្លះលក់ដាច់បានច្រើន ថ្ងៃខ្លះលក់ដាច់បានតិច ហើយវាមិនអាចគ្រប់រឿងសុទ្ធតែជាបញ្ហា ឬរាល់ការប្រែប្រួលសុទ្ធតែជាបញ្ហានោះទេ»។
ធនាគារជាតិនៃកម្ពុជា (NBC) បានឱ្យដឹងថា គិតត្រឹមចុងឆ្នាំ ២០២១ សិង្ហបុរី គឺជាប្រទេសដែលមកវិនិយោគផ្ទាល់នៅកម្ពុជាច្រើនជាងគេលំដាប់ទី ៣ ដោយមានទឹកប្រាក់ ២,៧ ពាន់លានដុល្លារ, តាមពីក្រោយប្រទេសចិន ដែលមានទឹកប្រាក់ ១៨ ពាន់លានដុល្លារ, និងកូរ៉េខាងត្បូង ៤,៩ ពាន់លានដុល្លារ។
ក្នុងឆ្នាំ ២០២២ កន្លងទៅ ការធ្វើពាណិជ្ជកម្មទ្វេភាគីកម្ពុជា-សិង្ហបុរី មានទឹកប្រាក់សរុប ៣,៣២៣ ពាន់លានដុល្លារ ធ្លាក់ចុះ ៣៦,៣ ភាគរយធៀបឆ្នាំ ២០២១ ដែលមានចំនួន ៥ ២១៧ លានដុល្លារ។ ដែលក្នុងនោះកម្ពុជានាំចេញទំនិញទៅ សិង្ហបុរី ៩២,៥៧ លានដុល្លារ ដែលធ្លាក់ចុះ ២២,៨ ភាគរយ ចំណែកសិង្ហបុរីនាំមកកម្ពុជា ជាង ៣,២៣០ លានដុល្លារ ធ្លាក់ចុះ ៣៦,៦ ភាគរយ៕
