វិភាគដោយ៖ លោក ញឹម កុសល អនុប្រធានចាត់ការទូទៅនៃក្រុមហ៊ុន PP Link Securities។
តម្លៃប្រេងឆៅបានបន្តស្ទុះងើបឡើងវិញពីតំបន់ Sideway ក្នុងចន្លោះពី ៦៧ ទៅ ៧៤ ដុល្លារ (ក្នុងមួយបារ៉ែល) ហើយបានជួញដូរនៅកម្រិតខ្ពស់ប្រហែល ៧១ ដុល្លារ នៅដើមសប្តាហ៍នេះ។ តាមលក្ខណៈបច្ចេកទេស ប្រេងឆៅត្រូវបានជួញដូរ ក្នុងកម្រិតតម្លៃមធ្យមរយៈពេល ២០០ ថ្ងៃ ឬនៅតម្លៃ ៧០ ដុល្លារ បើផ្អែកលើក្រាបតម្លៃរយៈពេលមួយម៉ោង។
មានកត្តាមួយចំនួនដែលអាចជំរុញឱ្យតម្លៃប្រេងឆៅមានការប្រែប្រួល។ គេហទំព័រ Reuters បានរាយការណ៍ថា កាលពីថ្ងៃចន្ទ ប្រទេសអារ៉ាប៊ីសាអ៊ូឌីត បាននិយាយថា ខ្លួននឹងបន្តកាត់បន្ថយទិន្នផលរបស់ខ្លួនចំនួន ១ លាន បារ៉ែល ក្នុង ១ ថ្ងៃ ដល់ខែសីហា ខណៈពេលដែលប្រទេសរុស្ស៊ីបានស្ម័គ្រចិត្តកាត់បន្ថយទិន្នផល និងកម្រិតនាំចេញ ៥០០ ០០០ បារ៉ែល ក្នុង ១ ថ្ងៃ ហើយអាល់ហ្សេរីបានស្ម័គ្រចិត្តកាត់ចំនួន ២០ ០០០ បារ៉ែល ក្នុងមួយថ្ងៃ។ ទីផ្សារកំពុងរង់ចាំមើលតួលេខ ជាក់ស្ដែងជាមួយ នឹងការរំពឹងទុកនៃនិន្នាការកើនឡើង។
វាក៏មានចំណុចគាំទ្រសម្រាប់ទំនោរធ្លាក់ចុះក្នុងរយៈពេលវែងផងដែរ។ ការ ព្រួយបារម្ភនៅក្នុងតម្រូវការប្រេងពីការងើបឡើងវិញនៃសេដ្ឋកិច្ចរបស់ចិន គឺជាសូចនាករដំបូង ពីព្រោះថាសកម្មភាពផលិតកម្មរបស់ប្រទេសចិនបានចុះក្នុងរយៈពេល ៣ ខែចុងក្រោយជាប់ៗគ្នារួចមកហើយ។
ម្យ៉ាងវិញទៀត សហរដ្ឋអាមេរិកក៏បានបង្កើនទិន្នផលរបស់ខ្លួនជាមួយការរំពឹងទុកនៃការកើនឡើង ៧២០ ពាន់ ដល់ ១២,៦១ លាន បារ៉ែល ក្នុង ១ ថ្ងៃ ក្នុងឆ្នាំនេះ។ បន្ថែមពីនេះ ធនាគារកណ្តាលឈានមុខគេ រួមទាំងធនាគារ កណ្តាលអាមេរិក កំពុងព្រមានថាការដំឡើងអត្រាការប្រាក់អាចនឹងកើតមានបន្ថែម។ដូច្នេះ សម្រាប់ការវិភាគជួញដូរក្នុងសប្តាហ៍នេះ តម្លៃប្រេងឆៅអាចប្រែប្រួលក្នុងចន្លោះពី ៦៥,៥ ទៅ ៧១,៥ ដុល្លារ៕
