ការវិភាគដោយ៖ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន PP Link Securities
កាលពីថ្ងៃសុក្រ សន្ទស្សន៍ហ៊ុន Nasdaq100 បានកើនឡើងដល់តម្លៃ 15210.63 ខណៈពេល ដែលស្ថិតិការងាររបស់សហរដ្ឋអាមេរិក បានចេញផ្សាយទិន្នន័យ ការងារប្រចាំខែមិថុនា ជាមួយនឹងតួលេខជាក់ស្តែង ដែលមិនសូវល្អសម្រាប់រូបិយប័ណ្ណ ដុល្លារអាមេរិក នោះទេ ដោយកំណើនការងារបានធ្លាក់ចុះ 97 000 បើធៀបនឹងខែមុន។
ជាមួយស្ថានភាពការងាររបស់សហរដ្ឋអាមេរិក ដែលត្រូវបានចាត់ទុកថា ខ្សោយ បានធ្វើឱ្យគូទាំងអស់ ដែលធៀបនឹងប្រាក់ដុល្លារ ស្ទុះងើបឡើងវិញ នៅដើមសប្តាហ៍នេះ រួមទាំងសន្ទស្សន៍ Nasdaq100 ផងដែរ។ កាលពីថ្ងៃចន្ទ Nasdaq100 បានចាប់ផ្តើមបង្កើតទិសដៅកើនឡើង ជាមួយនឹងតម្លៃបិទ 15045.64 ហើយបន្តទៅប្រហែល 15135 នៅថ្ងៃអង្គារ និងអាចប្រែប្រួលក្នុងចន្លោះពី 15250 ទៅ 14940។
បើគិតក្នុងក្រាបរយៈពេល ១ សប្តាហ៍ ឥឡូវនេះ តម្លៃស្ថិតនៅចំណុចខ្ពស់ទៅហើយ។ ដូច្នេះឱកាសធ្លាក់ចុះក៏ខ្ពស់ដែរ ពីព្រោះថាទោះបីជាប្រាក់ដុល្លារ មានភាពទន់ខ្សោយ ដោយសារស្ថានភាពការងារ វាក៏មានកត្តាព័ត៌មានដ៏សំខាន់មួយ ដែលគាំទ្រដល់ប្រាក់ដុល្លារ ផងដែរ។ នៅថ្ងៃទី ២៦ ខែកក្កដា នេះ ធនាគារកណ្តាល សហរដ្ឋអាមេរិក នឹងបើកកិច្ចប្រជុំ ដើម្បីពិភាក្សាអំពីលទ្ធភាពនៃការដំឡើង អត្រាការប្រាក់បន្ថែមទៀត របស់ខ្លួនពីកម្រិតបច្ចុប្បន្ន 5.25% សម្រាប់បន្ថយអតិផរណារបស់ខ្លួន ឱ្យដល់គោលដៅត្រឹម ២%។
ដូច្នេះ វិនិយោគិន ដែលជួញដូរដោយយោងទៅតាមក្រាបតម្លៃ ក្នុងរយៈពេល ១ សប្តាហ៍ អាចពិចារណាលក់ Nasdaq100 ដោយកំណត់មុខងារយកប្រាក់ចំណេញ និងការពារហានិភ័យនៅក្នុងចន្លោះ 15250 ទៅ 14940៕
