ស្ពានមិត្តភាពកម្ពុជា-ថៃ ស្ទឹងបត់-បានណងអៀន។ រូបថត MPWT
បន្ទាយមានជ័យៈ ក្រសួងសាធារណការ និងដឹកជញ្ជូនបានលើកឡើងថា សមិទ្ធផលស្ពានមិត្តភាពកម្ពុជា-ថៃ (ស្ទឹងបត់ បានណងអៀន) ក្នុងក្រុងប៉ោយប៉ែត បានផ្តល់អត្ថប្រយោជន៍យ៉ាងធំធេង ដល់សេដ្ឋកិច្ចជាតិ តាមរយៈការធ្វើពាណិជ្ជកម្មឆ្លងកាត់ព្រំដែន ការបង្កើតការងារ និងការទាក់ទាញភ្ញៀវទេសចរ ក៏ដូចជាការសម្រេចឱ្យបាននូវចក្ខុវិស័យរបស់អាស៊ាន ក្នុងការតភ្ជាប់ប្រទេសនៅក្នុងតំបន់អាស៊ានទាំងមូល (Asean Connectivity)។
បើយោងតាមក្រសួងសាធារណការ ស្ពានស្ទឹងបត់-បានណងអៀន មានប្រវែងស្ពានសរុបចំនួន ៦២០ ម៉ែត្រ (ផ្នែកខាងកម្ពុជា ២១៥ ម៉ែត្រ + ផ្នែកខាងថៃ ៤០៥ ម៉ែត្រ) និងទទឹងស្ពាន ១៧ ម៉ែត្រ។ស្ពានឆ្លងកាត់ព្រំដែននេះចាប់ផ្ដើមពីក្រុងប៉ោយប៉ែត ទៅបញ្ចប់នៅច្រកព្រំដែន ប៉ោយប៉ែត-ថៃ ត្រូវបានបើកការដ្ឋានសាងសង់កាលពីថ្ងៃទី ២០ ខែមីនា ឆ្នាំ ២០-១៧ និងបញ្ចប់ការសាងសង់កាលពីថ្ងៃទី ១៥ ខែមករាឆ្នាំ ២០១៩។
ស្ពាននេះត្រូវបានចំណាយទឹកប្រាក់សាងសង់អស់ប្រមាណ ៦៧០ លានបាត (ស្មើនឹងប្រមាណជាង ១៩ លានដុល្លារអាមេរិក) សាងសង់ដោយ កងវិស្វកម្ម នៃកងទ័ពភូមិន្ទព្រះរាជាណាចក្រថៃត្រួតពិនិត្យដោយ នាយកដ្ឋានហាយវ៉េ (DOH) របស់ក្រសួងដឹកជញ្ជូនថៃ។ ក្រសួងសាធារណការបានឱ្យដឹងទៀតថា បច្ចុប្បន្ន កម្ពុជាកំពុងសាងសង់អគាររដ្ឋបាលនៅច្រកអន្តរជាតិ ស្ទឹងបត់-បាណងអៀន និងខ្សែផ្លូវតភ្ជាប់ ទៅកាន់ផ្លូវជាតិលេខ ៥ និងសម្រេចវឌ្ឍនភាពការងារបានជាង ៨៥% ហើយ៕
