ស្រូវប្រភេទ OM ដែលបច្ចុប្បន្នកំពុងឡើងថ្លៃ។ រូបថត ហ្វេសប៊ុក
ភ្នំពេញៈ ក្រុមហ៊ុននាំចេញអង្ករក្នុងស្រុកបានឱ្យដឹងថា កត្តាដែលធ្វើឱ្យតម្លៃស្រូវនៅទីវាល ពិសេសប្រភេទពូជស្រូវប្រាំង IR និងOM មានតម្លៃខ្ពស់ ដោយសារតែនៅតាមបណ្តាប្រទេសមួយចំនួនក្នុងពិភពលោក ដូចជា ក្នុងតំបន់អឺរ៉ុប និងអាស៊ីមានតម្រូវការខ្ពស់ធ្វើឱ្យអង្ករសឡើងថ្លៃដែលកំពុងជំរុញឱ្យប្រភេទស្រូវ IR និង OM សម្រាប់ផលិតជាអង្ករសក៏មានតម្លៃកើនឡើងផងដែរ។
លោក ចាន់ ពេជ្រ អ្នកគ្រប់គ្រងទូទៅនៃក្រុមហ៊ុន ស៊ីកនេតឈ័រ អហ្វ អេស៊ា បានឱ្យដឹងនៅថ្ងៃទី ២៤ ខែកក្កដាថា បច្ចុប្បន្នទីផ្សារអង្ករនៅលើពិភពលោកពិសេសប្រភេទអង្ករស ឬអង្ករធម្មតាដែលជាប្រភេទអង្ករបាយរឹង និងបាយទន់ ឃើញថា មានតម្រូវការខ្ពស់។
លោកបានឱ្យដឹងថា៖ «មូលហេតុដែលខ្ញុំមើលឃើញបែបនេះ ដោយសារទី១ បញ្ហាប្រែប្រួលអាកាសធាតុ ដោយសារប្រទេសក្នុងតំបន់អឺរ៉ុប អូស្ត្រាលី អាមេរិកជាដើម ជួបគ្រោះរាំងស្ងួតកាលពីដើមឆ្នាំនេះ ដែលធ្វើឱ្យតម្រូវការអង្ករមានការកើនឡើង ជាពិសេសប្រទេសឥណ្ឌា ដោយសារបញ្ហានេះ បានបិទការនាំចេញអង្ករស និងអង្ករបាក់ ដើម្បីបំពេញតម្រូវការក្នុងស្រុករបស់គេ»។
«ចំណែកប្រទេសក្នុងអាស៊ានយើង ដែលរួមមាន ឥណ្ឌូនេស៊ី និងហ្វីលីពីនជាដើម ដែលជាប្រទេសមានប្រជាជនច្រើនបានជួបបញ្ហាកង្វះខាតការផ្គត់ផ្គង់អង្ករនេះដែរដោយបានបញ្ជាទិញអង្ករសនេះជាបន្តបន្ទាប់ពីប្រទេសក្នុងតំបន់អាស៊ានដូចគ្នា ដូចជាទិញពីវៀតណាម និងកម្ពុជាជាដើម»។ លោកចាន់ ពេជ្រ បានបញ្ជាក់បន្ថែម។
លោកបានថ្លែងថា នៅពេលការកាត់បន្ថយថ្លៃដើមចាប់ផ្តើមមានភាពប្រសើរឡើង ឃើញថា ទីផ្សារហ្វីលីពីន នឹងអាចជួយជំរុញឱ្យកម្ពុជានាំអង្ករចេញបានច្រើនរហូតដល់ខ្ទង់លានតោន ដោយសារតែប្រទេសហ្វីលីពីនមានតម្រូវការខ្ពស់មានប្រជាជនច្រើន។
លោក គឹម សាវុធ ប្រធានក្រុមហ៊ុនខ្មែរហ្វ៊ូដគ្រុប ជាក្រុមហ៊ុនក្នុងស្រុកនាំចេញអង្ករដ៏ធំមួយទៅទីផ្សារប្រទេសជាច្រើននៅលើពិភពលោកបានឱ្យដឹងដែរថា បញ្ហាវិបត្តិសង្គ្រាមបានធ្វើឱ្យមានវិបត្តិដឹកជញ្ជូន (ឡើងថ្លៃផង) និងការប្រែប្រួលអាកាសធាតុផង បានធ្វើឱ្យតម្លៃស្បៀងកើនឡើង ពិសេសប្រទេសដែលនាំចូលស្បៀង ជួបបញ្ហាច្រើន ដោយសារតែអង្ករឡើងថ្លៃ។
លោកបានបញ្ជាក់ថា៖ «ស្រូវប្រាំង IR និង OM ហាក់មានតម្លៃខ្ពស់នារយៈប៉ុន្មានឆ្នាំចុងក្រោយនេះ ដោយសារតម្លៃវត្ថុធាតុដើម តម្លៃពលកម្ម និងតម្លៃជីឡើងថ្លៃដែរ។ ម្យ៉ាងវិញទៀត តម្លៃស្បៀងពិភពលោកឡើងថ្លៃដូចគ្នា ជាពិសេសចាប់តាំងពីមានសង្គ្រាមរុស្ស៊ី និងអ៊ុយក្រែន ខណៈបញ្ហាអាកាសធាតុរាំងស្ងួតបានធ្វើឱ្យប្រទេសមួយចំនួនផលិតស្បៀងមិនបានគ្រប់គ្រាន់តាមត្រូវការ»។
ចំណែកអគ្គនាយកប្រតិបត្តិក្រុមហ៊ុន Agribee (Cambodia) លោក យ៉ង ប៉ាក់ បានថ្លែងថា នៅពេលតម្លៃស្រូវនៅទីវាល ជាពិសេសស្រូវប្រាំង IR និងOM មានតម្លៃខ្ពស់បែបនេះ ការបញ្ជាទិញពីរោងម៉ាស៊ីនកិនស្រូវក្នុងស្រុកអាចនឹងធ្លាក់ចុះ ហើយវៀតណាមនឹងប្រមូលទិញវិញ។
លោកថា៖ «ពេលស្រូវឡើងថ្លៃ រោងម៉ាស៊ីនក្នុងស្រុកទិញបានតិចតួចបំផុត ដូចនេះការនាំចេញអង្ករស ក៏មិនបានច្រើនដែរ ហើយកសិករយើងភាគច្រើនលក់ស្រូវសើមឱ្យវៀតណាម ខណៈរោងម៉ាស៊ីនក្នុងស្រុកយើងមិនសូវហ៊ានទិញស្រូវស្តុកទុកដោយសារតែតម្លៃលើទីផ្សារមិនមានភាពច្បាស់លាស់»។
យោងតាមសេចក្តីប្រកាសព័ត៌មានរបស់ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា នៅឆ្នាំនេះ ស្រូវប្រភេទ IR មានតម្លៃ ១ ០៤៧ រៀល ក្នុង ១ គីឡូក្រាម ខណៈស្រូវប្រភេទ OM មានតម្លៃ ១ ០២៩ រៀលក្នុង ១ គីឡូក្រាម។
ក្រសួងបន្តថា ចំណែកស្រូវសែនក្រអូបវិញ គឺមានតម្លៃខ្ពស់ជាងគេបើធៀបនឹងស្រូវ IR និង OM ប៉ុន្តែតម្លៃស្រូវនេះមិនសូវប្រែប្រួលទេ ក្នុងរយៈពេល ៣ ឆ្នាំចុងក្រោយ ដោយជាមធ្យមតម្លៃចន្លោះពី ១ ០០០ ទៅ ១ ២៦០ រៀលក្នុង ១ គីឡូក្រាម៕
