លោក Pierre-Olivier Gourinchas ប្រធានមូលនិធិរូបិយវត្ថុអន្តរជាតិ (IMF)។ AFP
កំណត់ត្រានៃកំណើនបំណុលរបស់រដ្ឋាភិបាល ភាពតានតឹងភូមិសាស្ត្រនយោបាយដែលគំរាមកំហែងដល់ប្រព័ន្ធពាណិជ្ជកម្មសកល និងការបន្តធ្លាក់ចុះនៃខ្សែចង្វាក់ផ្គត់ផ្គង់អាចនឹងធ្វើឱ្យពិភពលោកមានការអភិវឌ្ឍយឺតយ៉ាវ និងទំនងជាកាន់តែលំបាកសម្រាប់ប្រទេសកំពុងអភិវឌ្ឍន៍។
ធនាគារកណ្តាលនៃទីក្រុង Kansas បានរៀបចំការស្រាវជ្រាវមួយដោយផ្ដោតទៅលើសេដ្ឋកិច្ចពិភពលោកក្រោយជំងឺរាតត្បាតកូវីដ ១៩ ដែលបានវាយប្រហារយ៉ាងខ្លាំងលើប្រព័ន្ធសេដ្ឋកិច្ចសកល។ កិច្ចការស្រាវជ្រាវនេះបានផ្ដោតសំខាន់លើបញ្ហាដូចជាទស្សនវិស័យសម្រាប់ការច្នៃប្រឌិតបច្ចេកវិទ្យាបំណុលសាធារណៈ និងស្ថានភាពពាណិជ្ជកម្មអន្តរជាតិក្នុងអំឡុងពេលនៃសង្គ្រាមរុស្សី-អ៊ុយក្រែន និងជម្លោះពាណិជ្ជកម្មរវាងមហាអំណាចចិន និងសហរដ្ឋអាមេរិកជាដើម។
តាមរយៈកិច្ចការស្រាវជ្រាវនេះបានបង្ហាញថា ប្រទេសនានានឹងស្ថិតក្នុងស្ថានភាពកាន់តែផុយស្រួយជាងមុនហើយពួកគេបានប្រើប្រាស់ធនធានធម្មជាតិរបស់ពួកគេអស់ជាច្រើនដើម្បីទប់ទល់ជាមួយវិបត្តិសេដ្ឋកិច្ចដែលពួកគេប្រឈមចំពោះមុខ។
លោក Pierre-Olivier Gourinchas ប្រធានមូលនិធិរូបិយវត្ថុអន្តរជាតិបាននិយាយនៅក្នុងបទសម្ភាសន៍មួយថា៖ «ប្រសិនបើយើងទៅដល់ចំណុចមួយដែលជាផ្នែកមួយនៃពិភពលោកត្រូវបានជាប់គាំងដោយមិនមានដំណោះស្រាយអ្វីសោះវានឹងបង្កើតឱ្យមានសម្ពាធប្រជាសាស្ត្រយ៉ាងខ្លាំងហើយវានឹងរុញឱ្យមានការធ្វើចំណាកស្រុកកាន់តែច្រើន»។
លោក Maurice Obstfeld អតីតប្រធានសេដ្ឋវិទូរបស់ IMF និងបច្ចុប្បន្នជាសហការីនៅវិទ្យាស្ថាន Peterson សម្រាប់សេដ្ឋកិច្ចអន្តរជាតិនៅទីក្រុងវ៉ាស៊ីនតោនបាននិយាយថា ការរស់នៅតាមបរិបទថ្មីនេះ គឺជាបញ្ហាប្រឈមយ៉ាងខ្លាំងសម្រាប់សេដ្ឋកិច្ចពិភពលោក។
ដោយឡែកសម្រាប់ផលប៉ះពាល់នៃបំណុលសាធារណៈនឹងប្រែប្រួលទៅតាមប្រទេសដោយលោកបាននិយាយថា ប្រទេសដែលមានប្រាក់ចំណូលខ្ពស់ ប៉ុន្តែជាប្រទេសដែលមានបំណុលខ្ពស់ដូចគ្នា ដូចជាសហរដ្ឋអាមេរិកជាដើម ទំនងជាអាចប្រឈមនឹងបញ្ហាបំណុលកើនឡើងក្នុងពេលខាងមុខ ខណៈដែលប្រទេសតូចៗដែលមានសេដ្ឋកិច្ចទន់ខ្សោយវិញអាចធ្លាក់ចូលទៅក្នុងវិបត្តិបំណុលធ្ងន់ធ្ងរ និងកាន់តែជ្រៅនាពេលអនាគត។
ក្រុមអ្នកស្រាវជ្រាវផ្សេងទៀតបានកត់សម្គាល់ពីវិបត្តិសង្គ្រាមរុស្ស៊ីលើអ៊ុយក្រែនដែលបណ្ដាលឱ្យមានការផ្ដាច់ទំនាក់ទំនងគ្នាយ៉ាងឆាប់រហ័សនៃបណ្តាញថាមពលអឺរ៉ុបពីថាមពលរុស្ស៊ីដែលនឹងធ្វើឱ្យប៉ះពាល់យ៉ាងខ្លាំងដល់សេដ្ឋកិច្ចជាលក្ខណៈសកល។
យោងតាមរបាយការណ៍ពីក្រុមអ្នកស្រាវជ្រាវរបស់អង្គការសហប្រជាជាតិបានឱ្យដឹងថា សេដ្ឋកិច្ចពិភពលោកក្នុងអំឡុងពេលបច្ចុប្បន្ននេះត្រូវបានព្យាករថា នឹងកើនឡើងត្រឹមតែ ២,៣ ភាគរយនៅឆ្នាំ ២០២៣ និង ២,៥ ភាគរយនៅឆ្នាំ ២០២៤ ដែលជាការកើនឡើងតិចតួច បើធៀបទៅនឹងការព្យាករឆ្នាំមុន ហើយងាយនឹងធ្លាក់ចូលទៅក្នុងវិបត្តិណាមួយ៕
