.jpg)
អាងហែលទឹកក្នុងរីសត ១ កន្លែង នៅខេត្តព្រះសីហនុ។ រូបថត ហេង ជីវ័ន
ភ្នំពេញៈ ប្រាក់ជាង ៥៤ លានដុល្លារ ត្រូវបានធនាគារ SME (SME Bank) អនុម័តទៅឱ្យអាជីវកម្មក្នុងវិស័យទេសចរណ៍ចំនួន ៣៥០ សហគ្រាស ដែលស្មើនឹងទឹកប្រាក់ជាង ៥៤ លានដុល្លារ ឬជាង ៣៦ ភាគរយ នៃគម្រោងសហហិរញ្ញប្បទានចំនួន ១៥០ លានដុល្លារ ដែលរាជរដ្ឋាភិបាលកម្ពុជាទម្លាក់ឱ្យធនាគារ SME ប្រើប្រាស់ដើម្បីផ្តល់កម្ចីក្នុងន័យស្តារ និងជំរុញកំណើនវិស័យទេសចរណ៍ឱ្យងើបចេញពីវិបត្តិបណ្តាលមកពីជំងឺកូវីដ ១៩។
ឯកសារវឌ្ឍនភាពគម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ របស់ធនាគារ SME ឱ្យដឹងថា គិតត្រឹមថ្ងៃទី ៣១ ខែសីហា ឆ្នាំ ២០២៣ មានអាជីវកម្មក្នុងវិស័យទេសចរណ៍ចំនួន ៣៥០ សហគ្រាសទទួលបានហិរញ្ញប្បទានពីគម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ (TRCS) ជាមួយនឹងទំហំហិរញ្ញប្បទានចំនួន ៥៤,១៦ លានដុល្លារ ឬស្មើនឹង ៣៦,១ ភាគរយនៃគម្រោងថវិកាសរុប ១៥០ លានដុល្លារ។ ចំនួនសហគ្រាសដែលទទួលបានការអនុម័តពី SME Bank ក្នុងរយៈពេលចុងក្រោយនេះគឺកើនយឺតបំផុតបើធៀបពេលចាប់ផ្តើមដំបូង ពោលគឺក្នុងខែកក្កដា និងសីហា មានសំណើរបស់សហគ្រាសចំនួន ២ ប៉ុណ្ណោះដែលត្រូវបានអនុម័ត។
ធនាគារ SME ឱ្យដឹងទៀតថា ក្នុងចំណោមហិរញ្ញប្បទានទាំងនោះគឺអាជីវកម្មសណ្ឋាគារ ចំនួន ២៩ ភាគរយ, អាជីវកម្មផ្ទះសំណាក់ ២៥ ភាគរយ, អាជីវកម្មភោជនីយដ្ឋាន ៣១ ភាគរយ និងអាជីវកម្មគាំទ្រវិស័យទេសចរណ៍ ១៥ ភាគរយ។ សហគ្រិនមានម្ចាស់ជាស្ត្រី ៤១ ភាគរយបានទទួលកម្ចីក្នុងគម្រោងខាងលើ។
គម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ របស់ធនាគារ SME ត្រូវបានក្រសួងសេដ្ឋកិច្ច និងហិញ្ញវត្ថុ ប្រកាសដាក់ឱ្យអនុវត្តកាលពីថ្ងៃទី ១៧ ខែឧសភា ឆ្នាំ ២០២២ ក្រោមហិរញ្ញប្បទាន ១៥០ លានដុល្លារដែលបានពីថវិកាបដិភាគរបស់រាជរដ្ឋាភិបាល ៧៥ លានដុល្លារ (តាមរយៈ SME Bank) និងថវិកាបដិភាគរបស់គ្រឹះស្ថានហិរញ្ញវត្ថុចូលរួមចំនួន ៧៥ លានដុល្លារ។ គ្រឹះស្ថានហិរញ្ញវត្ថុឯកជនដែលចូលរួមមានប្រមាណជាង ២០ ដូចជា ធនាគារអេស៊ីលីដា, កាណាឌីយ៉ា, ស្ថាបនា, FTB, ABA, LOLC, Wing, Amret និង CIMB ជាដើម។
គម្រោងសហហិរញ្ញប្បទានស្តារនិងជំរុញកំណើនក្នុងវិស័យទេសចរណ៍ គឺផ្តោតសំខាន់ទៅលើវិស័យទេសចរណ៍ ដោយអនុញ្ញាតឱ្យម្ចាស់អាជីវកម្មអាចស្នើសុំឥណទានពីគ្រឹះស្ថានហិរញ្ញវត្ថុចូលរួមដែលជាដៃគូរបស់ SME Bank ក្នុងអត្រាការប្រាក់អតិបរមា ៦,៥ ភាគរយក្នុង ១ ឆ្នាំ និងខ្ចីបានខ្ពស់បំផុតដល់ ៤០ ម៉ឺនដុល្លារ ហើយអាចខ្ចីបានរហូតដល់ ៧ ឆ្នាំ ហើយអ្វីដែលពិសេសនោះ រយៈពេលអនុគ្រោះនៃការសងត្រឡប់ប្រាក់ដើមមានរហូតដល់ ១២ ខែ។
ប្រធានសមាគមសហព័ន្ធទេសចរណ៍កម្ពុជា លោក ឌិន សុមេធារិទ្ធ បានប្រាប់ ភ្នំពេញ ប៉ុស្តិ៍ នៅថ្ងៃទី ៥ ខែកញ្ញាថា ឥណទានក្នុងគម្រោងសហហិរញ្ញប្បទានស្តារ និងជំរុញកំណើនក្នុងវិស័យទេសចរណ៍ដែលរាជរដ្ឋាភិបាលទម្លាក់តាមរយៈធនាគារ SME ដើម្បីឱ្យវិស័យឯកជនខ្ចីយកទៅប្រើសម្រាប់ស្តារ និងពង្រឹងសេវាកម្មក្នុងវិស័យទេសចរណ៍ គឺពិតជាចូលរួមចំណែកច្រើនក្នុងការធ្វើឱ្យវិស័យនេះងើបឈរឡើងវិញពីការធ្លាក់ចុះយ៉ាងគំហុកនៅក្នុងអំឡុងពេលការរីករាលដាលខ្លាំងនៃជំងឺកូវីដ ១៩ (ឆ្នាំ២០២០-២០២២)។ លោកបានបន្តថា ទោះយ៉ាងណាដោយសារវិស័យទេសចរណ៍នាពេលនេះមិនទាន់មានសកម្មភាពខ្លាំងដូចមុនឆ្នាំ ២០២០ ហេតុនេះចរន្តនៃការដាក់ពាក្យស្នើសុំឥណទានក៏នៅមានកម្រិតដែរ។
លោកបន្ថែមថា៖ «សម្រាប់ចំនួនប្រាក់ដែល SME Bank អនុម័តឱ្យសហគ្រាសក្នុងវិស័យទេសចរណ៍យកទៅប្រើប្រាស់ប្រមាណជាង ៥៤ លានដុល្លាររហូតមកដល់ពេលនេះ គឺហាក់នៅមានកម្រិតទាបនៅឡើយដែលបញ្ហាអាចដោយសារតែវិស័យទេសចរណ៍នៅកម្ពុជានៅមិនទាន់មានសម្ទុះខ្លាំងដូចពេលមុន (មុនកូវីដ ១៩)»។
បើតាមលោក សុមេធារិទ្ធ មូលហេតុដែលការផ្តល់ឥណទានរបស់ SME Bank ក្នុងវិស័យទេសចរណ៍មិនសូវមានសម្ទុះលឿន គឺអាចមកពីហេតុផលមួយចំនួនដូចជា ចំនួនសហគ្រាសដែលត្រូវការកម្ចីបានទទួលកម្ចីរួចអស់ហើយ, សហគ្រាសមួយចំនួនមិនមានទ្រព្យបញ្ចាំសម្រាប់ស្នើឥណទាន, និងម្ចាស់អាជីវកម្មខ្លះមិនចង់យកកម្ចី។
ទាក់ទងចំនួនភ្ញៀវទេសចរបរទេសដែលចូលមកកម្សាន្តនៅកម្ពុជា លោក សុមេធារិទ្ធ បាននិយាយថា ដោយសារស្ថានភាពសេដ្ឋកិច្ចពិភពលោកមិនសូវល្អ ហេតុនេះភ្ញៀវបរទេសដែលមកកម្ពុជា គឺភាគច្រើនជាភ្ញៀវមកពីប្រទេសជិតខាង (តាមផ្លូវគោក) និងមិនសូវចំណាយច្រើនដូចភ្ញៀវមកពីប្រទេសរីកចម្រើននៅឆ្ងាយៗឡើយ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានឱ្យដឹងថា ការកំណត់លក្ខខណ្ឌរបស់ SME Bank ដែលទាមទារឱ្យអ្នកស្នើឥណទានត្រូវមានរបាយការណ៍ហិរញ្ញវត្ថុល្អ, មានទ្រព្យបញ្ចាំសមរម្យ និងមិនសូវមានលក្ខខណ្ឌពិសេសលើសពីធនាគារឯកជន ដែលនេះជាឧបសគ្គដល់អ្នកក្នុងវិស័យទេសចរណ៍ដែលចង់បានកម្ចី។
លោកស្រីអះអាងថា៖ «ប្រសិនបើ SME Bank អាចបន្ធូរបន្ថយលក្ខខណ្ឌឱ្យកាន់តែពិសេសថែមទៀតនោះ វាពិតជានឹងចូលរួមចំណែកច្រើនក្នុងការស្តារ និងជំរុញឱ្យវិស័យទេសចរណ៍កម្ពុជាងើបឡើងវិញកាន់តែលឿនបានមួយកម្រិតទៀត»។
ក្រសួងទេសចរណ៍ឱ្យដឹងថា រយៈពេល ៧ ខែ ឆ្នាំ ២០២៣ កម្ពុជាទទួលបានភ្ញៀវបរទេសសរុប ៣,០៣ លាននាក់ កើនឡើង ៣០៨,៥ ភាគរយបើធៀបនឹងរយៈពេលដូចគ្នាឆ្នាំ ២០២២ ដែលមានចំនួន ៧៤៣ ៤៥៩ នាក់។ ក្នុងចំណោមភ្ញៀវខាងលើ គឺភ្ញៀវមកពីប្រទេសថៃ និងវៀតណាម បានគ្របដណ្តប់ ៥១,៩ ភាគរយនៃចំនួនភ្ញៀវសរុប ដោយភ្ញៀវជនជាតិថៃមានចំនួន ១ ០២៨ ០២០ នាក់ (ស្មើ ៣៣,៨ ភាគរយនៃចំនួនភ្ញៀវបរទេសសរុប) កើនឡើង ៣៣១,២ ភាគរយ និងវៀតណាម មានចំនួន ៥៥១ ១៥៦ នាក់ (១៨,១ភាគរយ) កើនឡើង ១៩០,៤ ភាគរយ។
ទាក់ទងចំនួនភ្ញៀវបរទេសខាងលើ លោកស្រី ស៊ីវលីន ប្រាប់ថា ក្នុងចំនួនខាងលើ គឺមិនមែនភ្ញៀវទេសចរទាំងអស់ទេ ដោយ ១ ផ្នែកជាអ្នកជំនួញ និងអ្នកមានបេសកកម្មផ្សេងៗ៕
