.jpg)
តំបន់សេដ្ឋកិច្ចពិសេសខេត្តកោះកុង។ រូបថត ហេង ជីវ័ន
ភ្នំពេញៈ ប្រទេសកម្ពុជាមានតំបន់សេដ្ឋកិច្ចពិសេសកំពុងដំណើរការចំនួន ២៤ បើគិតចាប់តាំងពីឆ្នាំ ២០០៦ ដល់ដំណាច់ឆមាសទី ១ ឆ្នាំ ២០២៣ ដោយមានទុនវិនិយោគជាង ៨ ពាន់លានដុល្លារ ហើយភាគច្រើនស្ថិតក្នុងវិស័យកាត់ដេរសម្លៀកបំពាក់ ស្បែកជើង សម្ភារធ្វើដំណើរ វិស័យគ្រឿងបង្គុំរថយន្ត គ្រឿងអេឡិចត្រូនិក រោងចក្រផលិតសម្បកកង់ ឧស្សាហកម្មដំឡើងរថយន្ត និងកង់។
យោងតាមរបាយការណ៍ក្រុមប្រឹក្សាអភិវឌ្ឍន៍កម្ពុជា (CDC) គឺក្នុងចំណោមតំបន់សេដ្ឋកិច្ចពិសេសទាំង ២៤ គឺមានរោងចក្រ/ក្រុមហ៊ុនដែលចុះបញ្ជីនៅក្នុងតំបន់សេដ្ឋកិច្ចពិសេសនោះរហូតដល់ ៦៥៥ គម្រោង ដែលស្មើទុនវិនិយោគប្រមាណ ៨,១ ពាន់លានដុល្លារ។ ការនាំចេញចាប់ពីឆ្នាំ ២០១១ រហូតដល់ខែមិថុនា ឆ្នាំ ២០២៣ មានប្រមាណ ២៥,៧ ពាន់លានដុល្លារ បង្កើតការងារបាន ១៧៤ ពាន់កន្លែង។
លោក ជា វុទ្ធី អគ្គលេខាធិការ CDC ដែលទើបត្រូវបានតែងតាំងថ្មីបានលើកឡើងក្នុងវេទិកាមួយកាលពីខែមុនថា ចាប់តាំងពីរដ្ឋាភិបាលកម្ពុជាផ្តួចផ្តើមឱ្យមានការតាក់តែងបទប្បញ្ញត្តិ និងច្បាប់ តាំងពីឆ្នាំ ២០០៥ មក គិតត្រឹមដំណាច់ខែមិថុនា ឆ្នាំ ២០២៣ កម្ពុជាមានតំបន់សេដ្ឋកិច្ចពិសេសកំពុងដំណើរការចំនួន ២៤។
លោកថ្លែងថា៖ «យើងឃើញថា ក្នុងរយៈពេលប្រមាណជាង ១០ ឆ្នាំមកនេះ យើងមានតំបន់សេដ្ឋកិច្ចពិសេសចំនួន ២៤ ដែលដំណើរការ ដែលមានរដ្ឋបាលសេដ្ឋកិច្ចពិសេសប្រចាំការនៅទីនោះ»។
លោកបន្តថា តំបន់សេដ្ឋកិច្ចពិសេសបានដើរតួយ៉ាងសំខាន់ក្នុងការធ្វើពិពិធកម្មសេដ្ឋកិច្ចកម្ពុជា ការធ្វើពិពិធកម្មឧស្សាហកម្ម និងការធ្វើពិពិធកម្មប្រភពទុនវិនិយោគពីប្រទេសនានា។ វិស័យផលិតកម្មសម្លៀកបំពាក់ ស្បែកជើង និងសម្ភារធ្វើដំណើរ មានប្រមាណជាង ៩០ ភាគរយដែលបានវិនិយោគក្នុងតំបន់សេដ្ឋកិច្ចពិសេស។
លោកលើកឡើងថា៖ «ជាក់ស្តែងយើងមើលឃើញហើយថា កំណើននៃការនាំចេញពីតំបន់សេដ្ឋកិច្ចពិសេសមានការកើនឡើងគួរជាទីកត់សម្គាល់ ទោះបីក្នុងដំណាក់កាលការរីករាលដាលកូវីដ ១៩ ក៏បរិមាណការនាំចេញពីតំបន់សេដ្ឋកិច្ចពិសេសមានការកើនឡើងជាលំដាប់។ ក្នុងនោះឃើញថា កាលពីឆ្នាំ ២០១១ ទំហំនៃការនាំចេញពីតំបន់សេដ្ឋកិច្ចពិសេស គឺមានត្រឹម ៤ ភាគរយនៃចំណែកការនាំចេញសរុប លុះដល់ដំណាច់ឆ្នាំ ២០២២ កើនដល់ ២៣ ភាគរយ»។
អ្នកចាំទី Lopez (លើ) របស់ Roma ដោលបាល់ អំឡុងការប្រកួតជាមួយ Inter នៅ Serie A ។ AFP
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា ទោះបីកំណើនសេដ្ឋកិច្ចពិភពលោកទទួលរងផលប៉ះពាល់ជាបន្តបន្ទាប់ពីវិបត្តិជាច្រើនក្នុងរយៈពេលជាង ៣ ឆ្នាំមកនេះ ក៏កម្ពុជានៅតែអាចទទួលបានការមកបណ្តាក់ទុនជាបន្តបន្ទាប់។
លោកបន្ថែមថា ភាពទាក់ទាញដែលកម្ពុជាមាននោះគឺដោយសារតែកម្ពុជារក្សាបានស្ថិរភាពនយោបាយ កំណើនសេដ្ឋកិច្ចរឹងមាំ ច្បាប់វិនិយោគ ទីតាំងភូមិសាស្ត្រ ពលកម្ម និងហេដ្ឋារចនាសម្ព័ន្ធល្អប្រសើរ។ ក្រៅពីនោះផលិតផលកម្ពុជា ក៏ទទួលបានភាពអនុគ្រោះពន្ធនាំទៅប្រទេសធំៗមួយចំនួនដូចជា អាមេរិក តំបន់អឺរ៉ុប ចិន កូរ៉េ និងជប៉ុន ជាដើម។ លោកបន្តថា លើសពីនោះកិច្ចព្រមព្រៀងពាណិជ្ជកម្មដែលកម្ពុជាបានធ្វើជាមួយប្រទេសដៃគូសំខាន់ៗដូចជា ចិន កូរ៉េ និងកិច្ចព្រមព្រៀង RCEP ដែលមានប្រទេស ១៥ ក៏កំពុងរួមចំណែកក្នុងការទាក់ទាញអ្នកវិនិយោគឱ្យមកបណ្តាក់ទុននៅកម្ពុជាកាន់តែច្រើន។
លោកប្រាប់ថា៖«ការវិនិយោគរបស់វិនិយោគិនក្នុងស្រុក និងបរទេសនៅកម្ពុជានឹងកើនឡើងថែមទៀតនៅពេលស្ថានភាពសេដ្ឋកិច្ច និងនយោបាយពិភពលោកប្រសើរ។ ការវិនិយោគផ្ទាល់គឺពិតជាសំខាន់ណាស់សម្រាប់ភាពរឹងមាំនៃសេដ្ឋកិច្ច ព្រោះក្រៅពីជួយបង្កើតការងារ វាក៏ជួយលើកកម្ពស់សមត្ថភាពនាំចេញផលិតផលសម្រេចពីកម្ពុជាទៅទីផ្សារអន្តរជាតិឱ្យកាន់តែខ្លាំង»។
ធនាគារជាតិនៃកម្ពុជា (NBC) ឱ្យដឹងថា គិតត្រឹមចុងឆ្នាំ ២០២១ ការវិនិយោគផ្ទាល់បរទេសនៅកម្ពុជា មានទឹកប្រាក់សរុប ៤១ ពាន់លានដុល្លារ កើនឡើង ១១,២ ភាគរយបើធៀបឆ្នាំ ២០២០។ ក្នុងនោះវិស័យហិរញ្ញវត្ថុ ៩,៤ ពាន់លានដុល្លារ ស្មើ ២២,៩ ភាគរយ, កម្មន្តសាល ៨,៥ ពាន់លានដុល្លារ ស្មើ ២០,៨ ភាគរយ, អចលនទ្រព្យ ៤,៩ ពាន់លានដុល្លារ ស្មើ ១២ ភាគរយ, សណ្ឋាគារ និងភោជនីយដ្ឋាន ៤,៤ ពាន់លានដុល្លារ ស្មើ ១០,៧ ភាគរយ, កសិកម្ម ៤,២ លានដុល្លារ ស្មើ ១០,៣ ភាគរយ, អគ្គិសនី ២,៦ ពាន់លានដុល្លារ ស្មើ ៦,២ ភាគរយ, សំណង់ ១,៦ ពាន់លានដុល្លារ ស្មើ ៤,១ ភាគរយ និងផ្នែកផ្សេងៗ ៥,៣ ពាន់លានដុល្លារ ស្មើនឹង ១៣ ភាគរយ៕
