រដ្ឋមន្ត្រីក្រសួងព័ត៌មាន លោក នេត្រ ថ្លែងក្នុងកម្មវិធីបាឋកថាស្តីពី «កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់៖ទិដ្ឋភាពភូមិសាស្ត្រនយោបាយ និងភូមិសាស្ត្រសេដ្ឋកិច្ច» នាថ្ងៃទី ១៣ ខែកញ្ញា នៅទីស្តីការក្រសួងព័ត៌មាន។ ហេង ជីវ័ន
ភ្នំពេញៈ រដ្ឋមន្ត្រីក្រសួងព័ត៌មាន លោក នេត្រ ភក្ត្រាជំរុញពាណិជ្ជករ និងអ្នកវិនិយោគកម្ពុជាឱ្យយល់ដឹងពីយុទ្ធសាស្ត្រនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ក្នុងតំបន់ (RCEP)ដែលនឹងជួយឱ្យបណ្ដាវិនិយោគិន និងក្រុមហ៊ុនក្នុងស្រុកកម្ពុជា អាចអភិវឌ្ឍខ្លួន និងបង្កើនភាពប្រកួតប្រជែង។
RCEP គឺជាកិច្ចព្រមព្រៀងពាណិជ្ជកម្មសេរី (FTA) ដ៏ធំមួយ ដែលមានសមាជិកចំនួន ១៥ ប្រទេសដែលក្នុងនោះមានរដ្ឋសមាជិកអាស៊ានចំនួន ១០ប្រទេស និងដៃគូ FTA ចំនួន៥ប្រទេសផ្សេងទៀត រួមមាន អូស្ត្រាលី ចិន ជប៉ុន នូវែលសេឡង់ និងកូរ៉េខាងត្បូង។
RCEP បានចូលជាធរមាននៅកម្ពុជានៅថ្ងៃទី ១ ខែមករា ឆ្នាំ ២០២២ ស្របពេលដែលកម្ពុជាបានចាប់ផ្តើមធ្វើជាប្រធានអាស៊ានលើកទី ៣ នាពេលនោះ។ លោក នេត្រ ភក្ត្រា ថ្លែងដូច្នេះ ក្នុងកម្មវិធីបាឋកថាស្តីពី «កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់៖ទិដ្ឋភាពភូមិសាស្ត្រនយោបាយ និងភូមិសាស្ត្រសេដ្ឋកិច្ច» នាថ្ងៃទី ១៣ ខែកញ្ញា នៅទីស្តីការក្រសួងព័ត៌មាន។
លោករដ្ឋមន្ត្រី ថ្លែងថា៖«RCEPមានសារៈសំខាន់ខ្លាំងណាស់សម្រាប់ប្រទេសកម្ពុជាយើង ដែលសាធារណជនទូទៅ ជាពិសេស ពាណិជ្ជករ និងអ្នកវិនិយោគទាំងជាតិនិងអន្តរជាតិចាំបាច់ត្រូវយល់ដឹងអំពីយុទ្ធសាស្ត្រ ក្នុងការទាញយកអត្ថប្រយោជន៍នៃកិច្ចព្រមព្រៀងនេះ។
ហេតុនេះ អ្នកសារព័ត៌មាន មានតួនាទីសំខាន់ណាស់ក្នុងការនាំយកនូវដំណឹងទាំងអស់នេះដើម្បីផ្សព្វផ្សាយបន្តជូនដល់សាធារណជន»។ លោកលើកឡើងថា សក្តានុពលដែលកើតចេញពី RCEP នៅក្នុងដំណាក់កាលស្តារឡើងវិញក្រោយវិបត្តិកូវីដ ១៩ ពិតជាមានសារៈសំខាន់សម្រាប់កម្ពុជាតាមរយៈការពន្លឿនដំណើរការឧស្សាហូបនីយកម្ម និងឌីជីថលូបនីយកម្ម និងការផលិតដែលវៃឆ្លាត ដោយជំរុញ និងពង្រឹងសក្តានុពលវិស័យឧស្សាហកម្ម បច្ចេកវិទ្យាក្នុងស្រុកឱ្យក្លាយជាផ្នែកមួយនៃខ្សែចង្វាក់ផលិតកម្មក្នុងតំបន់ក្នុងការនាំកម្ពុជាឈានឆ្ពោះទៅសម្រេចបានចក្ខុវិស័យដើម្បីក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ និងមានចំណូលខ្ពស់នៅឆ្នាំ ២០៥០។
លោកបន្ថែមថា ការសម្រេចបានកិច្ចព្រមព្រៀងនេះបានបង្ហាញយ៉ាងច្បាស់ពីការវិលត្រឡប់មកវិញនូវពហុភាគីនិយម ដោយបង្ហាញពីការប្ដេជ្ញាចិត្តរបស់តំបន់អាស៊ីប៉ាស៊ីហ្វិកក្នុងការចូលរួម និងលើកកម្ពស់ការធ្វើពាណិជ្ជកម្មដោយសេរី និងការប្រាស្រ័យទាក់ទងគ្នាកាន់តែជិតស្និទ្ធ ដើម្បីជំរុញការងើបឡើងវិញនៃសេដ្ឋកិច្ចសកលនៅក្រោយវិបត្តិនៃជំងឺកូវីដ ១៩។
«ការយល់ច្បាស់គោលបំណងអំពីកិច្ចព្រមព្រៀងនេះនឹងជួយឱ្យបណ្ដាវិនិយោគិននិងក្រុមហ៊ុនក្នុងស្រុករបស់កម្ពុជា អាចអភិវឌ្ឍខ្លួនស្របតាមការវិវត្ត នៃសភាពការណ៍នៅលើសកលលោក និងបង្កើននូវភាពប្រកួតប្រជែងរបស់ខ្លួន»។
លោកមានជំនឿ«យ៉ាងមុតមាំ»ទៅលើអ្នកសារព័ត៌មានទាំងអស់ ក្នុងការជួយផ្សព្វផ្សាយឱ្យបានទូលំទូលាយអំពី RCEP នេះទៅដល់សាធារណជន ជាពិសេស វិនិយោគិន និងធុរជនបរទេសដែលមានបំណងចង់ធ្វើធុរកិច្ចនៅកម្ពុជា ដើម្បីឱ្យកម្ពុជាអាចទាញយកអត្ថប្រយោជន៍ពេញលេញពីកិច្ចព្រមព្រៀងនេះ។
លោក សុក ស៊ីផាន់ណា ទេសរដ្ឋមន្ត្រី ទទួលបន្ទុកបេសកកម្មពិសេសថ្លែងក្នុងកម្មវិធីនេះថា RCEP គឺជាកិច្ចព្រមព្រៀង ដែលនឹងផ្ដល់ប្រភពកំណើនសេដ្ឋកិច្ច សម្រាប់ប្រទេសកម្ពុជា ក្នុងរយៈពេល ១០ ឆ្នាំទៅមុខទៀតយ៉ាងស្រួល។ លោកបន្ថែមថា៖«ខ្ញុំថា យើងមានឱកាសក្នុងរយៈពេល ១០ ឆ្នាំ ទៀត ដើម្បីទាញយកផលប្រយោជន៍នៃ RCEP ហ្នឹងសម្រាប់ជូនសេដ្ឋកិច្ចរបស់យើងហ្នឹង»។
យោងតាមក្រសួងពាណិជ្ជកម្ម កិច្ចព្រមព្រៀង RCEP គ្របដណ្តប់ប្រជាជនប្រមាណ ២,២ ពាន់លាននាក់ ឬ ៣០% នៃប្រជាជនពិភពលោក និងមានទំហំផលិតផលក្នុងស្រុកសរុបប្រមាណ ២៦,២ ទ្រីលានដុល្លារ ឬ ៣០% នៃផលិតផលក្នុងស្រុកសរុបរបស់ពិភពលោក៕
