ភ្ញៀវអន្តរជាតិធ្វើដំណើរតាមជើងហោះហើរមកកម្ពុជា។ ហេង ជីវ័ន
ភ្នំពេញៈ ក្រុមហ៊ុន Capital A ដែលជាក្រុមហ៊ុនមេរបស់ AirAsia មានមូលដ្ឋាននៅប្រទេសម៉ាឡេស៊ី និង Sivilai Asia ជាក្រុមហ៊ុនដៃគូនៅប្រទេសកម្ពុជាបានសហការគ្នាបង្កើតមុខងារអាជីវកម្មថ្មីមួយលើផ្នែកថែទាំ ជួសជុល និងប្រតិបត្តិការ (MR-O) ក្នុងវិស័យអាកាសចរណ៍នៅកម្ពុជា ខណៈវាបានក្លាយជាផ្នែកកាន់តែសំខាន់នៃយុទ្ធសា-ស្ត្រអាកាសចរណ៍ពាណិជ្ជកម្មរបស់ក្រុមហ៊ុន Capital A ក្នុងរយៈពេលប៉ុន្មានឆ្នាំខាងមុខ។
យោងតាម Aviation Week Network ដែលបានដកស្រង់ឯកសាររបស់ក្រុមហ៊ុនផ្ញើទៅផ្សារហ៊ុនម៉ាឡេស៊ី នាថ្ងៃទី២០ខែកញ្ញា ស្ថិតក្រោមការវិនិយោគរួមថ្មីនេះ ក្រុមហ៊ុនបុត្រសម្ព័ន្ធ Capital A Asia Digital Eng-ineering (ADE) នឹងកាន់កាប់ភាគហ៊ុន ៦០ភាគរយក្នុងការវិនិយោគរួម ខណៈក្រុមហ៊ុន Sivilai Asia នឹងកាន់កាប់ភាគហ៊ុននៅសល់ ៤០ភាគរយនៃអាជីវកម្មរបស់ MRO។
ក្រុមហ៊ុន Asia Digital Engineering នឹងចាក់បញ្ចូលប្រាក់ ១,២លានដុល្លារក្នុងការវិនិយោគរួមនេះជាឥណទាន២ ដែលទី១ ក្នុងអំឡុងពេលមុនការចាប់ផ្តើមអាជីវកម្ម និងទី២ បន្ទាប់ពីចាប់ផ្តើមដំណើរការអា-ជីវកម្ម។ នេះបើតាមឯកសារ។
ការបង្កើតក្រុមហ៊ុន Capital A-Sivilai MRO រួមនេះ ផ្នែកថែទាំ ជួសជុល និងប្រតិបត្តិការ (MRO) ធ្វើឡើងបន្ទាប់ពីការ-សម្រេចបានកិច្ចព្រមព្រៀងរវាងក្រុមហ៊ុនទាំង២កាលពីខែធ្នូ ឆ្នាំ២០២២ ដើម្បីបើកដំណើរការក្រុមហ៊ុន AirAsia Cambodia។ ក្រុមហ៊ុន Capital A គ្រប់គ្រងភាគហ៊ុនភាគច្រើនចំ-នួន ៥១ភាគរយក្នុងអាជីវកម្មនោះ ខណៈក្រុមហ៊ុន Sivilai គ្រប់គ្រង ៤៩ ភាគរយ។ ក្រុមហ៊ុន AirAsia Cambodia គ្រោងនឹងហោះហើរលើផ្លូវក្នុងរង្វង់ពេល ៤ម៉ោងនៃប្រទេសកម្ពុជា ហើយនឹងផ្តោតលើការហោះហើរទៅកាន់មជ្ឈមណ្ឌល AirAsia ដែលមានស្រាប់ពីខេត្តសៀមរាប ព្រះសីហនុ និងរាជធានីភ្នំពេញ។
ឯកសារនេះត្រូវបានដកស្រង់ដោយលើកឡើងថា៖«ការណ៍នេះនឹងបង្កើតឱកាសសម្រាប់ ADE [Asia Digital Engineering] ដើម្បីបង្កើតប្រតិបត្តិការរបស់ខ្លួនក្នុងប្រទេសកម្ពុជា ដោយផ្តល់សេវាកម្មដល់ក្រុមហ៊ុន AirAsia Cambodia និងក្រុមហ៊ុនអាកាសចរណ៍ភាគីទី៣ ផ្សេងទៀតដែលប្រតិបត្តិការចូលក្នុងព្រលានយន្តហោះធំៗនៅកម្ពុជា»។ ការវិនិយោគរួមនឹងអាចឱ្យក្រុមហ៊ុន Capital A ទាញយកប្រយោជន៍ពីឱកាសសន្សំថ្លៃដើម និងអាចចាប់យកអតិរេកប្រកបដោយសក្តានុពលពីលំហូរចំណូលថ្មីដែលរកបានពីការបង្កើតនេះ។
នៅក្នុងកិច្ចប្រជុំទូទៅប្រចាំឆ្នាំរបស់ក្រុមហ៊ុន Capital A នាថ្ងៃទី១៥ ខែមិថុនា លោក Tony Fernades អគ្គនាយកក្រុមហ៊ុនបានឱ្យដឹងថា ក្រុមហ៊ុននេះកំពុងពង្រីកនៅទូទាំងអាស៊ីអាគ្នេយ៍ ហើយក្រុមហ៊ុន AirAsia Cambodia ត្រូវបានគេរំពឹងថានឹងចាប់ផ្តើមប្រតិបត្តិការនៅក្នុងត្រីមាសទី៤ ឆ្នាំ២០២៣។
លោក Fernandes បានបន្តថា MRO គឺជា «អាជីវកម្មដែលមានផលចំណេញច្រើន» ហើយក្នុងរយៈពេលពី ៤-៥ឆ្នាំ បើក្រុមហ៊ុននេះ រក្សាបានដូចពេលនេះ Asia Digital Engineering នឹងរួមចំណែកពី ៣០ភាគរយ ទៅ ៤០ ភាគរយនៃប្រាក់ចំណេញរបស់ក្រុមហ៊ុន Capital A។
លោក ស៊ិន ចាន់សេរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល(SSCA) បានប្រាប់ភ្នំពេញប៉ុស្តិ៍កាលពីថ្ងៃទី២៥ ខែកញ្ញា ថា បច្ចុប្បន្នក្រុមហ៊ុនអាកាសចរណ៍នេះដំណើរការជើងហោះហើរ ទៅប្រទេសម៉ាឡេស៊ីចំនួន៣ ជើងក្នុង១ថ្ងៃ ទៅប្រទេសថៃដោយមានជើងហោះហើរ ២ និងទៅកាន់ប្រទេសឥណ្ឌូនេស៊ីមានជើងហោះហើរ ១ ក្នុង១ថ្ងៃ។
លោកប្រាប់ថា៖«បច្ចុប្បន្នក្រុមហ៊ុនអាកាសចរណ៍នេះមិនទាន់បង្កើនជើងហោះហើរណាមួយទេ។ យើងស្វាគមន៍ចំពោះអាជីវកម្មថ្មីរបស់ពួកគេ ព្រោះវាអាចរួមចំណែកដល់ការអភិវឌ្ឍវិស័យអាកាសចរណ៍នៅក្នុងប្រទេសកម្ពុជា»។កាលពីថ្ងៃទី១៥ ខែកញ្ញា ឆ្នាំ ២០២៣ ក្រុមហ៊ុន AirAsia បានប្រកាសសម្រាប់ការហោះហើររបស់ពួកគេនៅខេត្តសៀមរាប ផ្លាស់ប្តូរទីតាំងប្រតិបត្តិការរបស់ខ្លួនទៅកាន់ព្រលានយន្តហោះអន្តរជាតិសៀមរាប-អង្គរ (SAI) ដែលចាប់ផ្ដើមអនុវត្តពីថ្ងៃទី១៦ ខែតុលា តទៅ៕
