ទិដ្ឋភាពពីខាងលើជ្រុង ១ របស់ព្រលានយន្តហោះអន្តរជាតិសៀមរាប-អង្គរ។ រូបថត កម្ពុជាមាតុភូមិខ្ញុំ
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត រួមជាមួយថ្នាក់ដឹកនាំចិន នឹងបើកសម្ពោធជាផ្លូវការអាកាសយានដ្ឋានអន្តរជាតិសៀមរាប-អង្គរ នៅថ្ងៃទី ១ ខែធ្នូខាងមុខ ដែលជាការបើកទំព័រប្រវត្តិសាស្ត្រថ្មីមួយទៀតនៃវិស័យអាកាសចរណ៍កម្ពុជា ក្នុងការទទួលស្វាគមន៍ការហោះហើររយៈចម្ងាយឆ្ងាយមកកាន់ទឹកដីនៃប្រាសាទអង្គរ។
លោក ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរស៊ីវិល បានប្រាប់ ភ្នំពេញ ប៉ុស្តិ៍ នៅថ្ងៃទី ២៧ ខែកញ្ញាថា មុននឹងដាក់ឱ្យដំណើរការផ្លូវការ គឺនៅថ្ងៃទី ៥ ខែតុលា ខាងមុខក្រុមហ៊ុន AIAI នឹងធ្វើតេស្តការហោះបង្ហាញជាចុងក្រោយ (Airport Fight Demonstration) នៅអាកាសយានដ្ឋានអន្តរជាតិសៀមរាបអង្គរ ដើម្បីបញ្ជាក់ពីសមត្ថភាពក្នុងការគ្រប់គ្រងការប្រតិបត្តិការអាកាសយានដ្ឋានសៀមរាបអង្គរទាំងមូល មុននឹងបើកទទួលជើងហោះហើរលើកទី១ នៅថ្ងៃទី ១៦ ខែតុលា និងត្រៀមដាក់ឱ្យដំណើរការជាផ្លូវការនៅថ្ងៃទី ១ ខែធ្នូ ឆ្នាំ២០២៣ ខាងមុខ។
លោកបន្តថា អាកាសយានដ្ឋានអន្តរជាតិសៀមរាបអង្គរនឹងដាក់ឱ្យដំណើរការលើកដំបូងក្រោមអធិបតីភាព លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល ជាមួយតំណាងក្រុមហ៊ុនអង្គរ អ៊ិនធើណេសិនណល អ៊ែរផត អិនវេសម៉ិន ខេមបូឌា ឯ.ក (AIAI) និងស្ថាប័នពាក់ព័ន្ធក្នុងដំណើរការទទួលជើងហោះហើរពាណិជ្ជកម្មទី ១ ជាផ្លូវការ នៅអាកាសយានដ្ឋានអន្តរជាតិសៀមរាបអង្គរ នៅថ្ងៃទី ១៦ ខែតុលា ឆ្នាំ ២០២៣។
លោកថ្លែងថា៖ «ការធ្វើតេស្តហោះបង្ហាញចុងក្រោយបំផុតដើម្បីបញ្ជាក់ពីដំណើររលូននៃប្រតិបត្តិការ និងការគ្រប់គ្រងទាំងមូលនៅក្នុងអាកាសយានដ្ឋានសៀមរាបអង្គរ ដោយថ្ងៃនោះនឹងមានអ្នកដំណើរមក (Check-In) ដើម្បីឡើងយន្តហោះ និងធ្វើដំណើរត្រឡប់មកវិញដោយឆ្លងនីតិវិធីផ្សេងៗ។ ព្រមទាំងតេស្តឧបករណ៍ដើម្បីឱ្យប្រាកដថា រាល់ការធ្វើដំណើរមានសុវត្ថិភាព។ ដូច្នេះនៅថ្ងៃទី ១ ខែធ្នូ ឆ្នាំ ២០២៣ អាកាសយានដ្ឋានអន្តរជាតិសៀមរាប-អង្គរ នឹងដាក់សម្ពោធជាផ្លូវការក្រោមអធិបតីភាពសម្តេចនាយករដ្ឋមន្ដ្រី ហ៊ុន ម៉ាណែត ជាមួយថ្នាក់ដឹកនាំនៃភាគីចិន»។
ប្រធានសមាគមភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន ដែលបានទៅទស្សនាអាកាសយានដ្ឋាននេះកាលពីខែកក្កដាបានសម្តែងក្តីសង្ឃឹមខ្ពស់ចំពោះភាពវិជ្ជមានរបស់អាកាសយានដ្ឋាននេះមកលើវិស័យទេសចរណ៍កម្ពុជា។
លោកស្រីបញ្ជាក់ថា៖ «យើងមានហេដ្ឋារចនាសម្ព័ន្ធរឹងមាំ។ ភារកិច្ចនៅក្នុងដៃ គឺការលើកកម្ពស់គុណភាពសេវាកម្ម និងពង្រីកតំបន់ទេសចរណ៍»។
អាកាសយានដ្ឋានអន្តរជាតិសៀមរាបអង្គរ បានចាប់ផ្តើមសាងសង់កាលពីខែមីនា ឆ្នាំ ២០២០ ដោយក្រុមហ៊ុន AIAI ក្រោមទុនវិនិយោគ ១,១ ពាន់ដុល្លារ។ អាកាសយានដ្ឋាននេះអាចទទួលអ្នកដំណើរតាមផ្លូវអាកាសបាន ៧ លាននាក់ ក្នុង ១ ឆ្នាំ (ឆ្នាំ២០២៣) និងឈានដល់ ១២ លាននាក់ ក្នុង ១ ឆ្នាំ ចាប់ពីឆ្នាំ ២០៤០៕
