.jpg)
ការធ្លាក់ចុះសេដ្ឋកិច្ចសកល និងតំបន់ប៉ះពាល់ដល់ប្រតិបត្តិការអាជីវកម្មរបស់ផែភ្នំពេញ។ ហេង ជីវ័ន
ភ្នំពេញៈកំពង់ផែស្វយ័តភ្នំពេញ (PPAP) ដែលជាក្រុមហ៊ុនរដ្ឋចុះបញ្ជីនៅលើផ្សារមូលបត្រកម្ពុជា (CSX) បានរាយការណ៍ការធ្លាក់ចុះ ប្រាក់ចំណូលពីអាជីវកម្មរបស់ខ្លួន ក្នុងរយៈពេល ៩ ខែ ឆ្នាំនេះដោយសារតែភាពមិនអំណោយផលនៃសេដ្ឋកិច្ចក្នុងតំបន់ និងពិភពលោក ជះឥទ្ធិពលពីការបន្តអូសបន្លាយពេលនៃសង្គ្រាមរវាងរុស្ស៊ី និងអ៊ុយក្រែន ប៉ះពាល់ដល់តម្រូវការសកល។
យោងតាមរបាយការណ៍របស់PPAP ផ្ញើទៅកាន់CSX កាលពីថ្ងៃទី១៦ ខែតុលា ប្រតិបត្តិករកំពង់ផែទន្លេមួយនេះ បានរាយការណ៍ការធ្លាក់ចុះប្រាក់ចំណូល ៧ ភាគរយក្នុងរយៈពេល ៩ខែ ឆ្នាំនេះ ដោយសម្រេចបានជាង ២៦,៤៤០លានដុល្លារ ធ្លាក់ពីជាង ២៨,៤៥៧ លានដុល្លារ អាមេរិក ក្នុងរយៈពេលដូចគ្នាក្នុងឆ្នាំ២០២២។
របាយការណ៍ដដែលបានបង្ហាញថាសម្រាប់ចំណូលសរុបនេះគឺចំណូលពីប្រតិបត្តិការផែ (Port Operation) សម្រេចបានជាង ២២,៤ លានដុល្លារ ថយចុះ ១១ ភាគរយ; ចំណូលពីអាជ្ញាធរផែ (Port Authority) សម្រេចបានជាង៣,៤៨១ លានដុល្លារ កើនឡើង ៩ ភាគរយ; ចំណូលពីសេវាកម្មផ្សេងៗ (Other services) សម្រេចបាន ៥៥១៦៦៣ កើនឡើង ១៦០ ភាគរយ។
លោកស្រីគឹមសុផានីតានាយកផ្នែកទីផ្សារនៃCSX បាននិយាយមកកាន់ភ្នំពេញប៉ុស្តិ៍ថាកំណើនយឺតនៃប្រតិបត្តិការរបស់ផែគឺគ្រាន់តែរយៈពេលខ្លីតែប៉ុណ្ណោះ និងមិនបង្កជះឥទ្ធិពលអវិជ្ជមានដល់ប្រតិបត្តិការទាំងមូលរបស់ផែឡើយ។
លោកស្រីបានលើកឡើងថា៖«ខ្ញុំយល់ឃើញថា វាជាការថមថយនៃប្រាក់ចំណូលរយៈពេលខ្លីតែប៉ុណ្ណោះ ដូច្នេះវិនិយោគិន គួរតាមដាននូវប្រតិបត្តិការជារួមរបស់ក្រុមហ៊ុនទាំងមូលទើបដឹងច្បាស់ ខណៈដែលយើងមិនឃើញមានបញ្ហាអ្វីទេ។ លើសពីនេះទៅទៀត ក្រុមហ៊ុននេះ ក៏គួរបង្ហាញនូវផែនការនិងការរំពឹងទុករបស់ខ្លួន នៅត្រីមាសបន្ទាប់ ឬសម្រាប់ ១ ឆ្នាំនេះ តែម្តងដូច្នេះយើងនឹងមើលឃើញប្រតិបត្តិការកាន់តែប្រសើរជាមិនខាន»។
យោងតាមឯកសាររបស់កំពង់ផែផ្ញើទៅ CSX នៅថ្ងៃទី១៦ ខែមករា បានឱ្យដឹងថាកំពង់ផែនេះ បានទទួលការដឹកជញ្ជូនប្រេងឧស្ម័នចំនួន ៣១៥២៧១៣ តោន ក្នុងរយៈពេលដូចគ្នាកាលពីឆ្នាំមុនកើនឡើង ២,៧៥ ភាគរយនាវាដឹកទំនិញមានចំនួន ៣២៧៨ គ្រឿង កើនឡើង ១៩,៥០ ភាគរយ ពីចំនួន ២៧៤៣ គ្រឿង នាវាដឹកអ្នកដំណើរចំនួន ៣៤២ គ្រឿងធៀបនឹង ១៦ គ្រឿង កើនឡើង ២,០៣៧ ភាគរយ ទូកុងតឺន័រមួយចំនួន ៣០៥០៣៩ TEU ពី៣២៩០៤៣ធ្លាក់ចុះ៣ភាគរយនិងអ្នកដំណើរមួយចំនួន ១៤២៨២ នាក់ ធៀបនឹង ៨៦៨ នាក់កើនឡើង ១,៥៤៥ ភាគរយ។
សម្រាប់រយៈពេល១១ខែដំបូងឆ្នាំ២០២២ក្រុមហ៊ុននេះក៏បានប្រកាសប្រាក់ចំណូលបានពីសកម្មភាពអាជីវកម្មមានចំនួនជាង៣៧លានដុល្លារកើនឡើង២២ភាគរយធៀបនឹងរយៈពេលដូចគ្នាកាលពីឆ្នាំមុន។
បើធ្វើការប្រៀបធៀប PPAP បានរាយការណ៍ពីប្រាក់ចំណេញសុទ្ធចំនួន ១២,៧ លានដុល្លារកាលពីឆ្នាំ២០២១ កើនឡើង ២៩ ភាគរយ ធៀបនឹងឆ្នាំ២០២០និងកុងតឺន័រឆ្លងកាត់មានចំនួន ៣៤៨៨៩៨ TEUs កើនឡើងជិត២០,០ភាគរយពីចំនួន ២៩០៨៥៧ TEUs ក្នុងឆ្នាំ២០២០ ដែលបានកើតឡើងបន្ទាប់ពីមានការកើនឡើង៣,៤៩ភាគរយធៀបនឹងឆ្នាំ២០១៩៕LA
