.jpg)
ឯកអគ្គរាជទូតជប៉ុន លោក UENO Atsushi (ស្ដាំ) និងលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ២៦ ខែតុលា ឆ្នាំ ២០២៣។ រូបថត CDC
ភ្នំពេញៈ កម្ពុជា បានស្នើភាគីជប៉ុន ចូលរួមសហការក្នុងការរៀបចំបង្កើតកម្មវិធីនានា ដើម្បីទាក់ទាញវិនិយោគិន និងផ្សព្វផ្សាយឱ្យបានកាន់តែទូលំទូលាយអំពីភាពវិជ្ជមានលើកិច្ចការងារវិនិយោគ និងការលើកទឹកចិត្តផ្សេងៗរបស់កម្ពុជា ទៅកាន់អ្នកវិនិយោគជប៉ុន ខណៈការផ្លាស់ប្តូរទំនិញរវាងប្រទេសទាំង ២ ក្នុងរយៈពេល ៣ ត្រីមាស ដើមឆ្នាំ ២០២៣ សម្រេចបានជាង ១,៣ ពាន់លានដុល្លារ។
សំណើនេះត្រូវបានលើកឡើងដោយលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី២៦ ខែតុលា ឆ្នាំ២០២៣ នៅទីស្តីការក្រុមប្រឹក្សាអភិវឌ្ឍន៍កម្ពុជានាអំឡុងកិច្ចប្រជុំលើកទី២៦ នៃគណៈកម្មាធិការចម្រុះកម្ពុជា-ជប៉ុន ដោយមានការចូលរួមពីលោក UENO Atsushi ឯកអគ្គរាជទូតជប៉ុនប្រចាំកម្ពុជា តំណាងក្រសួង-ស្ថាប័នពាក់ព័ន្ធ ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) អង្គការពាណិជ្ជកម្មក្រៅប្រទេសជប៉ុន (JETRO) សមាគមធុរកិច្ចជប៉ុននៅកម្ពុជា (JBAC) និងតំណាងក្រុមហ៊ុនជប៉ុន ដែលមានប្រតិបត្តិការវិនិយោគនៅកម្ពុជា សរុបប្រមាណ ២០០ រូប។
លោក ស៊ុន ចាន់ថុល បានសម្តែងការស្វាគមន៍ និងអរគុណវិនិយោគិនជប៉ុន ដែលបានពង្រឹង និងពង្រីកប្រតិបត្តិការធុរកិច្ច និងវិនិយោគនៅកម្ពុជា ដែលទាំងនេះគឺជាការឆ្លុះបញ្ចាំងឱ្យឃើញពីការផ្តល់សេចក្តីទុកចិត្តពីសំណាក់វិនិយោគិនជប៉ុនមកលើរាជរដ្ឋាភិបាលកម្ពុជា ជាពិសេសការចាប់យកឱកាសដ៏អំណោយផលពីច្បាប់វិនិយោគថ្មីរបស់កម្ពុជា និងលក្ខខណ្ឌទីផ្សារនាំចេញដ៏ល្អដែលកម្ពុជាកំពុងមានពីសំណាក់ប្រទេសធំៗជាច្រើនលើពិភពលោក។
លោកបានថ្លែងថា៖«នេះឆ្លុះបញ្ចាំងឱ្យឃើញពីការផ្តល់នូវសេចក្តីទុកចិត្តពីសំណាក់វិនិយោគិនបរទេសនិយាយជារួម និយាយដោយឡែកវិនិយោគិនជប៉ុន មកលើរាជរដ្ឋាភិបាលកម្ពុជា ជាពិសេសការច្បាមយកកាលានុវត្តភាពជាអតិបរមាពីកត្តាសុខសន្តិភាព ស្ថិរភាពម៉ាក្រូសេដ្ឋកិច្ច បរិស្ថានវិនិយោគដែលមានភាពអនុគ្រោះ និងរបបវិនិយោគដែលបើកចំហអំណោយផលសម្រាប់ការវិនិយោគ និងធានាបាននូវភាពប្រកួតប្រជែង»។
ឯកអគ្គរាជទូតជប៉ុន លោក UENO Atsushi ក៏បានថ្លែងអំណរគុណចំពោះក្រុមប្រឹក្សាអភិវឌ្ឍន៍កម្ពុជា និងក្រសួង-ស្ថាប័នពាក់ព័ន្ធទាំងអស់របស់កម្ពុជា ដែលតែងខិតខំប្រឹងប្រែងប្រកបដោយស្មារតីទទួលខុសត្រូវខ្ពស់ ក្នុងការសម្របសម្រួល និងផ្តល់នូវការឆ្លើយតបប្រកបដោយភាពទន់ភ្លន់ចំពោះក្ដីកង្វល់ និងសំណូមពរនានារបស់វិនិយោគិនជប៉ុននាពេលកន្លងមក។
កិច្ចប្រជុំទ្វេភាគីនេះ គឺជាផ្នែកមួយនៃយន្តការថែទាំវិនិយោគដែលត្រូវបានរៀបចំឡើងចាប់តាំងពីថ្ងៃទី១១ ខែសីហា ឆ្នាំ២០០៩ ក្រោមក្របខ័ណ្ឌនៃកិច្ចព្រមព្រៀងរវាងព្រះរាជាណាចក្រកម្ពុជា និងជប៉ុន ស្តីពីសេរីភាវូបនីយកម្ម ការជំរុញ និងការការពារវិនិយោគ ដែលត្រូវបានចុះហត្ថលេខាដោយ អតីតនាយករដ្ឋមន្ត្រីកម្ពុជា លោក ហ៊ុន សែន និងអតីតនាយករដ្ឋមន្ត្រីជប៉ុន ឯកឧត្តម ស៊ីនហ្សូ អាបេ កាលពីថ្ងៃទី១៤ ខែមិថុនា ឆ្នាំ២០០៧។
សម្រាប់ប្រធានបទសំខាន់ៗ ដែលបានលើកមកពិភាក្សាក្នុងកិច្ចប្រជុំលើកទី២៦ នេះមានវិសាលភាពគ្របដណ្តប់លើវិស័យសំខាន់ៗមួយចំនួនដូចជា ពន្ធដារ ភ័ស្ដុភារកម្ម ថាមពល និងពាណិជ្ជកម្ម ជាដើម។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា (GDCE) ឱ្យដឹងថា ការនាំចេញ-នាំចូលទំនិញរវាងកម្ពុជា-ជប៉ុន ក្នុងរយៈពេល ៩ ខែ ដើមឆ្នាំ២០២៣ សម្រេចបានជាង ១,៣៧ ពាន់លានដុល្លារ ធ្លាក់ចុះ ៨,៣ ភាគរយបើធៀបរយៈពេលដូចគ្នាក្នុងឆ្នាំ២០២២ ក្នុងនោះកម្ពុជានាំទៅជប៉ុន ៨៨៥,៧៤ លានដុល្លារ ធ្លាក់ចុះ ១,៣ ភាគរយ និងជប៉ុន នាំចូលមកកម្ពុជា ៤៨១,១ លានដុល្លារ ធ្លាក់ចុះ ១៨,៨ ភាគរយ។ ផ្អែកតាមតួលេខខាងលើ គឺជញ្ជីងពាណិជ្ជកម្មកម្ពុជា មានឧត្តមភាព ៤០៤,៦៤ លានដុល្លារ។ ជប៉ុន គឺជាដៃគូពាណិជ្ជកម្មធំជាងគេទី៥ របស់កម្ពុជា បន្ទាប់ពីប្រទេសចិន អាមេរិក វៀតណាម និងថៃ។
ធនាគារជាតិនៃកម្ពុជា (NBC) បានឱ្យដឹងថា គិតត្រឹមត្រីមាសទី១ ឆ្នាំ២០២៣ ជប៉ុន គឺជាប្រទេសដែលមានវិនិយោគផ្ទាល់នៅកម្ពុជា ច្រើនជាងគេទី ៤ ដោយមានទឹកប្រាក់សរុប ១១,៣ ទ្រីលានរៀល (កើនឡើង ១១,៦ភាគរយធៀបរយៈពេលដូចគ្នាឆ្នាំ២០២២) គឺបន្ទាប់ពីប្រទេសចិន កូរ៉េ និងសិង្ហបុរី។ វិនិយោគិនជប៉ុន ភាគច្រើនវិនិយោគនៅប្រទេសកម្ពុជា ក្នុងវិស័យហិរញ្ញវត្ថុ សំណង់ សណ្ឋាគារ និងអចលនទ្រព្យ ជាដើម។
ក្នុងឆ្នាំ២០២២ពាណិជ្ជកម្មទ្វេភាគីកម្ពុជា ជប៉ុន មានទឹកប្រាក់សរុប ១៩៤៨,០១៩ លានដុល្លារ កើនឡើង ១២,៣ ភាគរយ ធៀបឆ្នាំ២០២១ ក្នុងនោះការនាំទំនិញពីកម្ពុជា ទៅជប៉ុន មានទឹកប្រាក់ ១ ១៧៣,០៣ លានដុល្លារកើនឡើង ៧,៣ ភាគរយ និងនាំចូលមានទឹកប្រាក់ ៧៧៤,៩៨៩ លានដុល្លារកើនឡើង ២១ ភាគរយ។ នេះបើតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជា៕
