.jpg)
អគ្គនាយកដ្ឋានពន្ធដារ តាមបណ្ដោយផ្លូវសហព័ន្ធរុស្ស៊ី។ រូបថត ហេង ជីវ័ន
ភ្នំពេញៈ រដ្ឋាភិបាលកម្ពុជារកចំណូលបានជាង ៣ ពាន់លានដុល្លារពីអគ្គនាយកដ្ឋានពន្ធដារ ដែលស្មើនឹង ៨៥,៧០ ភាគរយ នៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ បើទោះបីស្ថានភាពសេដ្ឋកិច្ចសកលក្នុងតំបន់រួមទាំងកម្ពុជាកំពុងមានការធ្លាក់ចុះក្តី។ នេះបើយោងតាមតួលេខពីអគ្គនាយកដ្ឋានពន្ធដារ (GDT)។
បើតាមសេចក្តីប្រកាសព័ត៌មានរបស់ GDT អំពីលទ្ធផលនៃកិច្ចប្រជុំកាលពីថ្ងៃទី ៣០ ខែតុលាថា នៅក្នុងរយៈពេល ៩ ខែឆ្នាំ ២០២៣ ចំណូលពន្ធអាករសម្រេចបានប្រមាណ ២,៨០៦ ពាន់លានដុល្លារអាមេរិក ស្មើនឹង ៧៨,៥៧ ភាគរយនៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ហើយបើគិតដល់ត្រឹមថ្ងៃទី ៣០ ខែតុលា ឆ្នាំ ២០២៣ គឺសម្រេចបានប្រមាណជាង ៣ ពាន់លានដុល្លារ ស្មើ ៨៥,៧០ ភាគរយនៃផែនការច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣។
លោក គង់ វិបុល អគ្គនាយកនៃ GDT បានលើកឡើងក្នុងសេចក្តីប្រកាសព័ត៌មានចេញផ្សាយកាលពីល្ងាចថ្ងៃទី ៣១ ខែតុលាថា ចំពោះលទ្ធផលប្រមូលពន្ធអាករនេះ គឺឆ្លុះបញ្ចាំងពីការខិតខំរបស់អគ្គនាយកដ្ឋានពន្ធដារក្នុងការផ្តល់នូវសេវាកម្មគាំទ្រផ្នែកអេឡិចត្រូនិក (eTax Service) ជូនអ្នកជាប់ពន្ធក្នុងគោលដៅសម្រួលដល់ការប្រើប្រាស់ប្រព័ន្ធ និងកម្មវិធីរបស់អគ្គនាយដ្ឋានពន្ធដារ។
លោកបានថ្លែងថា៖ «យើងនឹងបន្តធ្វើបច្ចុប្បន្នភាព និងជំរុញការអនុវត្តនិយាមនីតិវិធីប្រតិបត្តិការ (SOP) របស់អង្គភាពពន្ធដារទាំងអស់ដើម្បីសម្របទៅតាមច្បាប់ និងលិខិតបទដ្ឋានគតិយុត្តថ្មីៗ និងការវិវឌ្ឍដំណើរការការងារ (Business Process) តាមប្រព័ន្ធបច្ចេកវិទ្យាព័ត៌មានផងដែរ»។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដែលបានធ្វើជាអធិបតីភាពនៃកិច្ចប្រជុំនោះបានកោតសរសើរចំពោះកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីពន្ធដារទាំងអស់ ដែលបានរួមចំណែកបំពេញភារកិច្ចអស់ពីកម្លាំងកាយចិត្ត និងសម្រេចបានលទ្ធផលការងារគ្រប់គ្រងប្រមូលចំណូលពន្ធយ៉ាងល្អប្រសើរ។ រដ្ឋមន្ត្រីរូបនេះ ក៏បានបង្ហាញការគាំទ្រលើការដាក់ចេញចក្ខុវិស័យនៃការធ្វើបដិវត្តន៍កម្មឌីជីថលរដ្ឋបាលសារពើពន្ធ ដើម្បីកែប្រែអគ្គនាយកដ្ឋានពន្ធដារកម្ពុជា ទៅជារដ្ឋបាលសារពើពន្ធជំនាន់ ៣.០ ស្របតាមការវិវឌ្ឍនៃរដ្ឋបាលសារពើពន្ធសកលលោក។
លោកបន្ថែមថា៖ «អគ្គនាយកដ្ឋានពន្ធដារបន្តធ្វើការងារអាទិភាពសំខាន់ៗ ក្នុងការពង្រឹង និងធ្វើឱ្យប្រសើរឡើងនូវការផ្តល់សេវាអ្នកជាប់ពន្ធ ការដាក់ចេញអាទិភាពការងារ និងដោះស្រាយបញ្ហាប្រឈមនានារបស់វិស័យឯកជនក៏ដូចជាសាធារណជនទូទៅ»។
មូលនិធិរូបិយវត្ថុអន្តរជាតិ (IMF) កាលពីថ្ងៃទី ៣១ ខែតុលា បានទម្លាក់ការព្យាករសេដ្ឋកិច្ចកម្ពុជាមកនៅត្រឹម ៥,៣ ភាគរយក្នុងឆ្នាំ ២០២៣ នេះទាបជាងការព្យាករកាលពីខែមេសា ដែលមានអត្រា ៥,៨ ភាគរយ ដោយសារតែបញ្ហាប្រឈមខាងក្រៅ និងការធ្លាក់ចុះនៅក្នុងវិស័យអចលនទ្រព្យ ជាពិសេសការធ្លាក់ចុះនៃបណ្តាប្រទេសគោលដៅនាំចេញដូចជាអាមេរិក អឺរ៉ុប និងប្រទេសចិន។
ប្រធានបេសកកម្មប្រចាំកម្ពុជា លោក Davide Furceri បានថ្លែងថា សេដ្ឋកិច្ចកម្ពុជាកំពុងស្ទុះងើបឡើងវិញជាលំដាប់ពីការរីករាលដាលនៃជំងឺកូវីដ ១៩ ប៉ុន្តែប្រឈមមុខនឹងបញ្ហាក្នុងស្រុក និងខាងក្រៅ។ សេដ្ឋកិច្ចត្រូវបានព្យាករថា នឹងកើនឡើង ៥,៣ ភាគរយនៅឆ្នាំ ២០២៣ និង ៦,០ ភាគរយនៅឆ្នាំ ២០២៤។
លោកបញ្ជាក់ថា៖ «ការស្ទុះងើបឡើងវិញជាបន្តបន្ទាប់នៃវិស័យទេសចរណ៍ និងការនាំចេញបន្ទះសូឡា និងគ្រឿងបន្លាស់អគ្គិសនី គឺជាកត្តាជំរុញកំណើនដ៏សំខាន់។ ការនាំចេញសម្លៀកបំពាក់នៅតែខ្សោយ ដោយបង្ហាញសញ្ញាការស្ទុះងើបឡើងតិចតួចនៅក្នុងរយៈពេលប៉ុន្មានខែថ្មីៗនេះ ស្របពេលសកម្មភាពសំណង់កាន់តែយឺតយ៉ាវ ដែលបានដាក់សម្ពាធលើកំណើនផងដែរ»។
លោកលើកឡើងថា៖ «បន្ទាប់ពីរយៈពេលនៃការធ្លាក់ចុះពីកម្រិតខ្ពស់បំផុតកាលពីក្នុងខែមិថុនា ឆ្នាំមុន អតិផរណាបានស្ទុះងើបដល់ ៣,៨ ភាគរយ កាលពីក្នុងខែកញ្ញា ឆ្នាំ ២០២៣ ដោយសារតែតម្លៃអាហារ និងឥន្ធនៈកាន់តែខ្ពស់»។
លោកបន្ថែមថា សម្រាប់ពេញ ១ ឆ្នាំ ២០២៣ អតិផរណាត្រូវបានរំពឹងថា នឹងមានមធ្យម ២,៣ ភាគរយ និងឈានដល់និន្នាការរយៈពេលវែងរបស់វាប្រហែល ៣ ភាគរយនៅឆ្នាំ ២០២៤៕
