ភ្ញៀវទេសចរទៅទស្សនាបឹកយក្សឡោមអំឡុងព្រះរាជពីធីបុណ្យអុំទូក។ រូបថត ក្រសួងទេសចរណ៍
ភ្នំពេញៈ កម្ពុជាទទួលបានភ្ញៀវបរទេសសរុបជាង ៤,៤ លាននាក់ ក្នុងរយៈពេល ១០ ខែ ឆ្នាំ ២០២៣ នេះកើនជិត ២០០ ភាគរយ បើធៀបនឹងរយៈពេលដូចគ្នាឆ្នាំមុន ខណៈប្រទេសក្នុងតំបន់អាស៊ានចំនួន ២ នៅបន្តឈរលំដាប់ឈានមុខគេនៃការមកដល់របស់ភ្ញៀវទេសចរអន្តរជាតិ។ នេះបើយោងតាមក្រសួងទេសចរណ៍។
ស្ថិតិទេសចរណ៍ចេញផ្សាយកាលពីចុងសប្តាហ៍មុន ឱ្យដឹងថា រយៈពេល ១០ ខែឆ្នាំ ២០២៣ គឺមានភ្ញៀវបរទេសចូលមកកម្ពុជាសរុបជាង ៤,៤ លាននាក់ កើន ១៧៩,៧ ភាគរយ បើធៀបរយៈពេលដូចគ្នាឆ្នាំ ២០២២ ក្នុងនោះ ៦៣,១ ភាគរយមកពីប្រទេសសំខាន់ៗទាំង ៣ ដោយភ្ញៀវជនជាតិថៃ ចំនួន ១ លាននាក់ (ស្មើ ៣៤,១ភាគរយនៃចំនួនភ្ញៀវបរទេសសរុប) កើន ១៥៤,៣ ភាគរយ, វៀតណាម ៨២៥ ៩៧០ នាក់ (១៨,៧ភាគរយ) កើន ១៤១,៥ ភាគរយ, និងចិន ៤៥៣ ៥៦២ នាក់ (១០,៣ភាគរយ) កើន ៤៩៧,៥ ភាគរយ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បានប្រាប់ ភ្នំពេញ ប៉ុស្តិ៍ថា បន្ទាប់ពីធ្លាក់ចុះគំហុកតាំងពីដើមឆ្នាំ ២០២០ ដែលបណ្តាលមកពីវត្តមានជំងឺកូវីដ ១៩ ចំនួនភ្ញៀវទេសចរបរទេសធ្វើដំណើរមកកម្ពុជាបានងើបឡើងវិញជាបន្តបន្ទាប់ ដោយភាគច្រើនជាអ្នកមកពីប្រទេសនៅជាប់ព្រំដែន និងក្នុងតំបន់។
លោកស្រីបន្តថា មូលហេតុដែលភ្ញៀវជនជាតិថៃ និងវៀតណាម មានច្រើនដាច់ពីគេ គឺដោយសារភាពងាយស្រួលក្នុងការធ្វើដំណើរទាំងផ្លូវគោក និងទឹក។
លោកស្រីបន្ថែមថា ព្រឹត្តិការណ៍ជាតិធំៗដូចជាបុណ្យអុំទូក និងបុណ្យសមុទ្រនាដើមខែធ្នូខាងមុខ គឺសុទ្ធតែជាមុខព្រួញសំខាន់ក្នុងការផ្សព្វផ្សាយ និងទាក់ទាញភ្ញៀវទេសចរ និងវិនិយោគិនបរទេសឱ្យធ្វើដំណើរមកកម្ពុជាកាន់តែច្រើន។ ព្រឹត្តិការណ៍ទាំងនេះ គឺមិនត្រឹមតែជួយបង្កើតឱ្យមានចរន្តទេសចរណ៍ក្នុងស្រុករស់រវើកប៉ុណ្ណោះទេ ប៉ុន្តែក៏ជាការផ្សព្វផ្សាយដ៏មានសក្តានុពលទៅពិភពលោកឱ្យយល់ដឹងពីកម្ពុជាផងដែរ។
លោកស្រីថ្លែងថា៖ «បន្ទាប់ពីព្រឹត្តិការណ៍បុណ្យអុំទូកបញ្ចប់ទៅដោយភាពជោគជ័យ យើងជឿថា ទាំងភ្ញៀវបរទេសដែលមកទស្សនាផ្ទាល់ និងមិនទាន់មក ប៉ុន្តែឃើញរូបភាពល្អៗពីសកម្មភាពនានានឹងទាក់ទាញពួកគេឱ្យធ្វើដំណើរមកកម្សាន្តនៅកម្ពុជាកាន់តែច្រើន»។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បាននិយាយថា យុទ្ធសាស្ត្ររបស់រដ្ឋាភិបាលក្នុងការផ្សព្វផ្សាយ និងទាក់ទាញភ្ញៀវទេសចរ និងវិនិយោគិនបរទេសឱ្យចូលមកកម្ពុជា ព្រមទាំងការជំរុញការវិនិយោគលើហេដ្ឋារចនាសម្ព័ន្ធផ្លូវថ្នល់ ព្រលានយន្តហោះអន្តរជាតិ ការកែលម្អ និងបង្កើតរមណីយដ្ឋានទេសចរណ៍ថ្មីៗ គឺជាចំណែកក្នុងការជួយលើកសក្តានុពលវិស័យទេសចរណ៍កម្ពុជាឱ្យកាន់តែខ្លាំង។ កម្ពុជាប្រាកដជាទទួលបានភ្ញៀវទេសចរបរទេសកាន់តែច្រើន៕
