.jpg)
ក្រុមហ៊ុន CambodiaTienit International Trading គ្រោងបង្កើននាំចេញបង្កងកណ្តូប ឬប្រកាំងធម្មជាតិទៅទីផ្សារប្រទេសចិនបន្ថែមទៀត។ រូប សហការី
ភ្នំពេញៈក្រុមហ៊ុន CambodiaTienit International Trading គ្រោងបង្កើននាំចេញបង្កងកណ្តូប ឬប្រកាំងធម្មជាតិទៅទីផ្សារប្រទេសចិនបន្ថែមទៀត នៅឆ្នាំនេះ បន្ទាប់ពីឆ្នាំ២០២៣ ក្រុមហ៊ុននាំចេញបានជាង ១ តោន ដោយសារមានការគាំទ្រច្រើនពីប្រជាជនចិន។
លោក ជា គឹមឡុង ទីប្រឹក្សាក្រុមហ៊ុន CambodiaTienit International Trading បានប្រាប់នៅថ្ងៃទី៧ ខែមករាថា នៅឆ្នាំ២០២៤នេះ ក្រុមហ៊ុននឹងបង្កើនការប្រមូលទិញបង្កងកណ្តូប ឬប្រកាំងធម្មជាតិ ដើម្បីជំរុញការនាំចេញទៅទីផ្សារចិនឱ្យមានការកើនឡើងថែមទៀត។
លោកបានរំឭកថា ក្រោយពីក្រុមហ៊ុនបាននាំចេញបង្កងកណ្តូប ឬប្រកាំងធម្មជាតិ ដែលនៅរស់បានជិត១០លើកក្នុងឆ្នាំ២០២៣កន្លងមក ហើយពេលនេះក៏មានការគាំទ្រច្រើនពីប្រជាជនចិន ខាងក្រុមហ៊ុនកំពុងគិតគូរបង្កើនបរិមាណនាំចេញប៉ុន្តែមានបញ្ហាប្រឈមខ្លះដែលត្រូវមានការដោះស្រាយ។
លោក ជា គឹមឡុង បានបញ្ជាក់ថា៖«បញ្ហាប្រឈមនោះគឺថា នៅពេលដែលយើងនាំចេញទៅជោគជ័យ ការលក់កើនឡើង និងមានតម្រូវការច្រើនពីខាងចិន ប្រជានេសាទយើង បែរលក់ដំឡើងថ្លៃទៅវិញ ដោយចាប់តាំងពីយើងនាំចេញជាច្រើនលើកកាលពីឆ្នាំ២០២៣មក តម្លៃបង្កងកណ្តូបនេះបានឡើងថ្លៃរហូត។ ដូច្នេះនៅពេលឡើងថ្លៃពេក វាអាចនឹងធ្វើឱ្យប៉ះពាល់ដល់សមត្ថភាពនៃប្រមូលទិញរបស់យើង ព្រោះមិនចំណេញ»។
លោកថា បញ្ហាប្រឈមមួយទៀតគឺដោយសារបង្កងប្រភេទនេះជាផលិតផលធម្មជាតិ ដូច្នេះក្រុមហ៊ុនហាក់មានការលំបាកទាក់ទងនឹងការប្រមូលទិញពីប្រជានេសាទ ស្របពេលដែលទីផ្សារចិនមានតម្រូវការខ្ពស់។
បើតាមលោក ជា គឹមឡុង ក្រុមហ៊ុននឹងនាំចេញផលិតផលជលផលសមុទ្រដទៃទៀតផងដែរនាពេលខាងមុខ។
ចំពោះបញ្ហាប្រឈមដែលក្រុមហ៊ុន CambodiaTienit International Trading លើកឡើងនេះ លោក ខូវ គួង អនុប្រធានរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា លោកក៏ទទួលបានព័ត៌មានពីខាងក្រុមហ៊ុនទាក់ទងនឹងការលក់ឡើងថ្លៃលើផលិតផលបង្កងកណ្តូបឬប្រកាំងធម្មជាតិនេះដែរ ដោយលោកអះអាងថា ខាងរដ្ឋបាលជលផលនឹងពិនិត្យសិក្សាឱ្យបានច្បាស់ចំពោះបញ្ហានេះ។
លោកបានបញ្ជាក់ថា៖«ប្រសិនបើតម្រូវការកើនឡើងហើយការផ្គត់ផ្គង់នៅមានកម្រិតបែបនេះ ទីផ្សារតែងមានការឡើងថ្លៃតិចតួចដែរ ប៉ុន្តែបើបញ្ហាកើតឡើងដោយសារឈ្មួញកណ្តាលក្រឡុកតម្លៃយើងអាចនឹងមានវិធានការសម្របសម្រួលមួយចំនួន ដើម្បីជួយការពារកុំឱ្យវាមានបញ្ហាតម្លៃនេះកើនឡើងហួសហេតុ»។
លោក ខូវ គួង បានបន្តថា ការនាំចេញបង្កងកណ្តូប ដែលជាផលិតផលធម្មជាតិ និងជាប្រភេទជលផលទឹកប្រៃនេះ គឺជាសមិទ្ធផលថ្មីមួយទៀត ដែលបានចូលទៅកាន់ទីផ្សារប្រទេសចិនជាផ្លូវការ ប៉ុន្តែដោយសារតែបង្កងកណ្តូបជាផលិតផលធម្មជាតិខាងរដ្ឋបាលជលផលក៏បានគិតគូរយ៉ាងហ្មត់ចត់ដែរ ចំពោះការនាំចេញនេះដើម្បីរក្សានិរន្តរភាពនៃផលិតផលធនធានធម្មជាតិ។
យោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទ បានបង្ហាញថា នៅក្នុងឆ្នាំ២០២៣ កន្លងទៅ កម្ពុជាបាននាំចេញផលនេសាទស្រស់នាំចេញចំនួន ៣ ៤៤៩ តោន ស្មើនឹង ៤៩,២៧ ភាគរយនៃផែនការចំនួន ៧០០០ តោន ប្រៀបធៀបឆ្នាំ២០២២ កើនឡើងចំនួន ៥៤៧ តោន។ ដោយឡែក ផលនេសាទកែច្នៃវិញ នាំចេញបានចំនួន ១៨៦ តោន ស្មើនឹង១៨,៦៣ ភាគរយនៃផែនការចំនួន ១០០០ តោន ប្រៀបធៀបឆ្នាំ២០២២ កើនឡើងចំនួន ១៤៥ តោន។
ដោយឡែក ផលនេសាទសមុទ្រអនុវត្តបានចំនួន ១២៥ ៥០០ តោន ស្មើនឹង ៩៦,៥៤ ភាគរយនៃផែនការចំនួន ១៣
០០០០ តោន ប្រៀបធៀបឆ្នាំ២០២២ កើនឡើងចំនួន ៣០០ តោន។ ក្នុងនោះការកែច្នៃផលនេសាទ ផលនេសាទសមុទ្រអនុវត្តបានចំនួន ១១ ២៨០ តោន ស្មើនឹង ១១២,៨០ ភាគរយនៃផែនការចំនួន ១០០០០ តោន ហើយបើប្រៀបធៀបនឹងឆ្នាំ២០២២ មានការកើនឡើងចំនួន២០តោន៕
រូប សហការី
