ពិធីបញ្ចប់ការសិក្សារបស់និស្សិតចំនួន ១១៣ នាក់ ពីកម្មវិធីវិញ្ញាបនបត្រ Cloud Computing អន្តរជាតិ Cloud4Cambodia។ រូបថត សហការី
ភ្នំពេញ៖ ប្រទេសកម្ពុជាកំពុងបោះជំហានក្នុងសេដ្ឋកិច្ចឌីជីថល ដោយមានជំនួយពីភាពជាដៃគូអន្តរជាតិសំខាន់ៗ និងការសង្កត់ធ្ងន់លើការអភិវឌ្ឍន៍កម្លាំងពលកម្ម។
គម្រោងអភិវឌ្ឍន៍កម្លាំងពលកម្មឌីជីថល (DWD) របស់ទីភ្នាក់ងារ USAID សហការជាមួយ Amazon Web Services (AWS) ថ្មីៗនេះបានប្រារឰពិធីបញ្ចប់ការសិក្សារបស់និស្សិតចំនួន ១១៣ នាក់ ពីកម្មវិធីវិញ្ញាបនបត្រ Cloud Computing អន្តរជាតិ Cloud4Cambodia។
វគ្គសិក្សាមិនត្រឹមតែមានគោលបំណងបណ្តុះបណ្តាលនិស្សិតប៉ុណ្ណោះទេ ប៉ុន្តែថែមទាំងផ្តល់សិទ្ធិអំណាចដល់អ្នកអប់រំតាមរយៈការបញ្ចូលជំនាញ Cloud Computing ទៅក្នុងកម្មវិធីសិក្សារបស់ពួកគេ។ នេះធានាថា សិស្សជំនាន់ក្រោយត្រៀមខ្លួនដើម្បីចូលក្នុងកម្លាំងការងារជាមួយនឹងជំនាញពាក់ព័ន្ធ និងជាក់ស្តែង។
ទីភ្នាក់ងារ USAID ប្រចាំកម្ពុជាបានឱ្យដឹងថា៖ «ក្នុងចំណោមនិស្សិតចំនួន ១១៣ នាក់ដែលបានបញ្ចប់ការសិក្សាមាន ៣៤នាក់បានឆ្លងកាត់ការប្រឡងវិញ្ញាបនបត្រ AWS ដោយជោគជ័យ ក្លាយជាអ្នកអនុវត្ត Cloud Computing»។
និស្សិតទាំងនេះបច្ចុប្បន្នមានជំនាញចាំបាច់ដើម្បីបំពេញតម្រូវការទីផ្សារ Cloud Computing ពិភពលោកដែលកំពុងរីកចម្រើនយ៉ាងឆាប់រហ័សដោយផ្តល់សិទ្ធិអំណាចដល់ពួកគេក្នុងការចាប់យកឱកាសជាច្រើននៅក្នុងប្រទេសកម្ពុជា និងលើសពីនេះ។
បង្កើតឡើងដោយ USAID DWD កម្មវិធីវិញ្ញាបនបត្រគឺជាឧទាហរណ៍នៃការអភិវឌ្ឍន៍ដែលដឹកនាំដោយវិស័យឯកជនក្នុងគោលបំណងរៀបចំយុវជនសម្រាប់អនាគត។
ផ្តល់មូលនិធិដោយ USAID តាមរយៈសាកលវិទ្យាល័យកាលីហ្វ័រញ៉ា ប៊ើកលី គម្រោង DWD រយៈពេលប្រាំឆ្នាំ (២០២១-២០២៦) មានគោលបំណងផ្ដល់ឱ្យនិស្សិតកម្ពុជានូវជំនាញបច្ចេកវិទ្យាព័ត៌មាន និងទំនាក់ទំនងសំខាន់ៗ (ICT) រួមទាំង Cloud Computing ទន្ទឹមនឹងការជំរុញភាពជាដៃគូក្នុងវិស័យឯកជនផងដែរ រួមទាំងផ្តល់កម្មសិក្សាអាហារូបករណ៍ និងការទទួលបានវិញ្ញាបនបត្រទទួលស្គាល់ជាសកល។
នៅពេលដែលអាជីវកម្មទូទាំងពិភពលោកផ្លាស់ប្តូរឆ្ពោះទៅរកដំណោះស្រាយពីចម្ងាយ និងការគ្រប់គ្រងទិន្នន័យក្រៅបណ្តាញ Cloud Computing បានក្លាយជាផ្នែកសំខាន់មួយនៃហេដ្ឋារចនាសម្ព័ន្ធឌីជីថល។
ពិធីបញ្ចប់ការសិក្សារបស់និស្សិតចំនួន ១១៣ នាក់ ពីកម្មវិធីវិញ្ញាបនបត្រ Cloud Computing អន្តរជាតិ Cloud4Cambodia។ រូបថត សហការី
Cloud Computing អនុញ្ញាតឱ្យក្រុមហ៊ុនរក្សាទុកគ្រប់គ្រង និងដំណើរការទិន្នន័យនៅលើម៉ាស៊ីនមេពីចម្ងាយតាមរយៈអ៊ីនធឺណិត ដោយផ្តល់នូវភាពបត់បែន សុវត្ថិភាព និងការសន្សំការចំណាយ។
ជំនួសឱ្យការពឹងផ្អែកលើមជ្ឈមណ្ឌលទិន្នន័យ និងម៉ាស៊ីនមេ Cloud Computing អាចឱ្យអង្គការនានាធ្វើមាត្រដ្ឋានធនធាន IT របស់ពួកគេតាមគំរូបង់ប្រាក់ភ្លាមៗ ធ្វើឱ្យវាក្លាយជាជំនាញដែលស្វែងរកបានកម្រៃខ្ពស់នៅក្នុងសេដ្ឋកិច្ចបច្ចុប្បន្ន។
អ្នកស្រី Kerry Pelzman នាយកបេសកកម្មរបស់ទីភ្នាក់ងារ USAID ប្រចាំកម្ពុជាបាននិយាយក្នុងពិធីចែកសញ្ញាបត្រកាលពីថ្ងៃទី៦ ខែកញ្ញា នៅទីក្រុងភ្នំពេញថា៖ «USAID ប្តេជ្ញាគាំទ្រដល់អនាគតឌីជីថលរបស់កម្ពុជាតាមរយៈការវិនិយោគក្នុងការអភិវឌ្ឍន៍កម្លាំងការងាររបស់ខ្លួន»។
អ្នកស្រីបានបន្ថែមថា៖ «តាមរយៈការផ្តល់ឱ្យនិស្សិតកម្ពុជានូវជំនាញដ៏ទំនើបនៅក្នុង Cloud Computing យើងកំពុងផ្តល់អំណាចដល់យុវជន ឆ្លើយតបទៅនឹងតម្រូវការរបស់វិស័យឯកជន និងរួមចំណែកដល់កំណើនសេដ្ឋកិច្ចដ៏ទូលំទូលាយរបស់ប្រទេសកម្ពុជា»។
បំពេញតម្រូវការទីផ្សារពិភពលោក
គម្រោង DWD ត្រូវបានរចនាឡើងដើម្បីជួយបំពេញតម្រូវការទីផ្សារ Claud ពិភពលោក ដែលត្រូវបានគេរំពឹងថានឹងកើនឡើងពី ៦២៦,៤ ពាន់លានដុល្លារក្នុងឆ្នាំ ២០២៣ ដល់ជាង ១,២ ពាន់ពាន់លានដុល្លារនៅឆ្នាំ ២០២៨។
ជាពិសេស តំបន់អាស៊ីប៉ាស៊ីហ្វិក ត្រូវបានព្យាករណ៍ថានឹងដឹកនាំកំណើននេះ ដោយបង្ហាញពីឱកាសពិសេសមួយសម្រាប់កម្ពុជាក្នុងការលើកកម្ពស់សេដ្ឋកិច្ចឌីជីថលរបស់ខ្លួន។
ក្រោមកម្មវិធីនេះ និស្សិតបានចូលរួមក្នុងវគ្គបណ្តុះបណ្តាលកូនកាត់រយៈពេលបីសប្តាហ៍នៅសាកលវិទ្យាល័យឈានមុខគេចំនួនបីរបស់ប្រទេសគឺ សាកលវិទ្យាល័យភូមិន្ទភ្នំពេញ សាកលវិទ្យាល័យជាតិគ្រប់គ្រង និងបណ្ឌិត្យសភាបច្ចេកវិទ្យាឌីជីថលកម្ពុជា។
វិញ្ញាបនបត្រដែលទទួលស្គាល់ជាអន្តរជាតិផ្តល់ឱ្យនិស្សិតកម្ពុជានូវការប្រកួតប្រជែងក្នុងទីផ្សារការងារ ជាពិសេសដោយសារតែតម្រូវការជំនាញ Cloud Computing បន្តកើនឡើងជាសកល។
ភាពជោគជ័យនៃកម្មវិធីបង្ហាញពីរបៀបដែលកិច្ចសហការរវាងវិស័យសាធារណៈ និងឯកជនអាចជំរុញការអភិវឌ្ឍន៍កម្លាំងពលកម្ម។
ពិធីបញ្ចប់ការសិក្សារបស់និស្សិតចំនួន ១១៣ នាក់ ពីកម្មវិធីវិញ្ញាបនបត្រ Cloud Computing អន្តរជាតិ Cloud4Cambodia។ រូបថត សហការី
យោងតាម USAID Cambodia បានឱ្យដឹងថា៖ «សាជីវកម្មសកល ដូចជា AWS, META និង Coca-Cola រួមជាមួយនឹងអាជីវកម្មក្នុងស្រុក បានគាំទ្រគម្រោង DWD ដែលផ្តោតលើការផ្តល់ឱ្យយុវជនកម្ពុជានូវជំនាញជាក់ស្តែងដែលភ្ជាប់ដោយផ្ទាល់ទៅនឹងឱកាសការងារ»។
ភាពជាដៃគូបង្ហាញពីសារៈសំខាន់កាន់តែខ្លាំងឡើងនៃការចូលរួមរបស់វិស័យឯកជននៅក្នុងការផ្លាស់ប្តូរឌីជីថលរបស់កម្ពុជា។
សេវាកម្ម Cloud Service គឺមានសារៈសំខាន់សម្រាប់ឧស្សាហកម្មទូទាំងពិភពលោក ដោយផ្តល់ឱ្យអាជីវកម្មនូវវិធីដែលអាចធ្វើមាត្រដ្ឋានបាន សុវត្ថិភាព និងមានប្រសិទ្ធភាពក្នុងការគ្រប់គ្រងទិន្នន័យ។
ទីភ្នាក់ងារជំនួយអាមេរិក USAID ប្រចាំប្រទេសកម្ពុជា បានបង្ហាញថា៖ «សម្រាប់ប្រទេសកម្ពុជា Cloud Computing ផ្តល់ផ្លូវឆ្ពោះទៅរកការធ្វើបរិយាបន្នក្នុងសេដ្ឋកិច្ចឌីជីថលពិភពលោក ជាពិសេសសម្រាប់យុវជនរបស់ខ្លួន»។
ជាមួយនឹងការផ្លាស់ប្តូរឌីជីថលដែលកំពុងរីករាលដាលតាមវិស័យ ដូចជា ធនាគារ ការថែទាំសុខភាព និងការលក់រាយ តម្រូវការសម្រាប់អ្នកជំនាញក្នុង Cloud Computing មានការកើនឡើងខ្លាំង។
តាមរយៈការបំពាក់យុវជនកម្ពុជាជាមួយនឹងជំនាញតាមតម្រូវការទាំងនេះ គម្រោងនេះមានគោលបំណងបញ្ចូលកម្លាំងពលកម្មរបស់ប្រទេសទៅក្នុងវេទិកាឌីជីថលថ្នាក់ជាតិ តំបន់ និងអន្តរជាតិ។
លើសពីជំនាញបច្ចេកទេស គម្រោងនេះក៏លើកកម្ពស់បទពិសោធន៍ជាក់ស្តែងតាមរយៈកម្មសិក្សា និងអាហារូបករណ៍ ដោយធានាថា សិស្សានុសិស្សត្រូវបានរៀបចំយ៉ាងល្អសម្រាប់តម្រូវការនៃឧស្សាហកម្មនេះ។
បន្ថែមពីលើការផ្តល់អត្ថប្រយោជន៍ដល់សិស្សម្នាក់ៗ គំនិតផ្តួចផ្តើម Cloud4Cambodia ពង្រឹងស្ថាប័នឧត្តមសិក្សារបស់ប្រទេស ដោយជួយពួកគេឱ្យបំពេញតាមស្តង់ដាទទួលស្គាល់និងលើកកម្ពស់ការផ្តល់ ICT របស់ពួកគេ៕
