ម្ចាស់សហគ្រាស និងសិប្បកម្មផ្សេងៗមាន២៥មូលដ្ឋាន សេវាកម្ម និងលក់ប្រេងឥន្ទនៈ ជិត ៤០មូលដ្ឋាន រួមទាំងនិស្សិតមកពីវិទ្យាស្ថានបណ្ដុះបណ្ដាលប្រមាណ ៤០នាក់ និងសិស្សវិទ្យាល័យអូរជុំ ៦ នាក់ ចូលរួមសិក្ខាសាលាថ្ងៃទី ១៧ ម្សិលមិញនេះ។ រូបថត សហការី
ខេត្ដរតនគិរី៖ សិក្ខាសាលាកាលពីថ្ងៃទី១៧ ខែកញ្ញា នៅខេត្តរតនគិរី ក្រោមប្រធានបទ ការលើកកម្ពស់សមត្ថភាពប្រកួតប្រជែងតាមរយៈផលិតភាព និងនវានុវត្តន៍» បានគូសបញ្ជាក់ពីការបន្តខិតខំប្រឹងប្រែងរបស់រដ្ឋាភិបាលក្នុងការពង្រឹងសហគ្រាសក្នុងស្រុក និងកាត់បន្ថយការពឹងផ្អែកលើផលិតផលនាំចូល។
សិក្ខាសាលានេះរៀបចំដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានប្រមូលផ្តុំភាគីពាក់ព័ន្ធសំខាន់ៗ ដើម្បីដោះស្រាយបញ្ហាប្រឈមនានារបស់សហគ្រាសខ្នាតតូច មធ្យម និងមធ្យម (MSMEs) និងឧស្សាហកម្មសិប្បកម្ម។
លោក ភោគ សុវណ្ណរិទ្ធ រដ្ឋលេខាធិការ បានសង្កត់ធ្ងន់លើការប្តេជ្ញាចិត្តរបស់រដ្ឋាភិបាលក្នុងការផ្តល់អំណាចដល់វិស័យឯកជន ជាពិសេសសហគ្រាសធុនតូច និងមធ្យម និងសិប្បកម្ម ឱ្យក្លាយជាអ្នករួមចំណែកដ៏រឹងមាំ និងនិរន្តរភាពដល់សេដ្ឋកិច្ចជាតិ។
លោកបានកត់សម្គាល់ថា ខណៈពេលដែលអ្នករិះគន់មួយចំនួនអះអាងថា ផលិតផលក្នុងស្រុកពិបាកប្រកួតប្រជែងជាមួយនឹងលំហូរនៃទំនិញនាំចូលដែលមានតម្លៃថោក ប៉ុន្តែបញ្ហានេះមិនមែនជាកត្តាតែមួយគត់ដែលរារាំងការប្រកួតប្រជែងទីផ្សារនោះទេ។
លោកបានពន្យល់ថា៖ «បញ្ហានេះយើងទទួលស្គាល់ តែមិនមកពីកត្តានេះទាំងស្រុងនោះទេ សូមបងប្អូន ក្មួយៗ សិក្ខាកាមទាំងអស់គិតពិចារណា ហើយវិលត្រឡប់ទៅក្រោយជាង២០ ឆ្នាំមុន ដែលប្រទេសយើងមិនទាន់ផលិត ផលិតផលបាន គឺយើងបាននាំចូលស្ទើរតែ ១០០ភាគរយ»។
លោកបន្ដថា៖ «តែបច្ចុប្បន្ន យើងផលិតបានផលិតផលមួយចំនួនដូចជា៖ អង្ករ ភេសជ្ជៈ គ្រឿងសំណង់ (ស៊ីម៉ង់ត៍) គ្រឿងទេស សម្ភារប្រើប្រាស់ ….។ល។ យើងឃើញថា ការនាំចូលផលិតផលទាំងនោះ បានធ្លាក់ចុះទៅវិញ ហើយថែមទាំងមានផលិតផលខ្លះ បាននាំចេញទៅក្រៅប្រទេសទៀតផង ទោះបីជានៅមានកម្រិត ដោយមូលហេតុថ្លៃដើមផលិតរបស់យើងនៅមានថ្លៃខ្ពស់នៅឡើយ»។
លោក សុវណ្ណរិទ្ធ បានចង្អុលបង្ហាញថា តួនាទីរបស់ក្រសួង រួមមាន ការលើកកម្ពស់ផលិតភាព និងនវានុវត្ដ៍ តាមរយៈកម្មវិធីបណ្តុះបណ្តាល ដើម្បីគាំទ្រដល់សហគ្រាសធុនតូច និងមធ្យម និងសិប្បកម្ម។
លោកបានបន្ថែមថា៖ «គោលដៅរបស់យើងគឺដើម្បីធានាថា វិស័យទាំងនេះអាចរីកចម្រើន និងសម្របខ្លួនទៅនឹងស្ថានភាពសេដ្ឋកិច្ចពិភពលោកដែលមិនជាប់លាប់»។
សិក្ខាសាលាកាលពីថ្ងៃទី១៧ ខែកញ្ញា នៅខេត្តរតនគិរី ក្រោមប្រធានបទ ការលើកកម្ពស់សមត្ថភាពប្រកួតប្រជែងតាមរយៈផលិតភាព និងនវានុវត្តន៍»។ រូបថត សហការី
ក្នុងសិក្ខាសាលានេះ លោក សុវណ្ណរិទ្ធ បានជំរុញឱ្យអ្នកចូលរួមស្រូបយកចំណេះដឹងដែលបានបង្ហាញ ហើយយកទៅអនុវត្តនៅមូលដ្ឋានផលិតកម្មរបស់ពួកគេ។
លោកបានកត់សម្គាល់ថា ការលើកកម្ពស់ផលិតភាពត្រូវបានគេមើលឃើញកាន់តែខ្លាំងឡើងថាជាយុទ្ធសាស្ត្រសំខាន់សម្រាប់ជំរុញការប្រកួតប្រជែងជាសាកល ហើយកម្ពុជាត្រូវតែអនុវត្តតាមដើម្បីកុំឱ្យធ្លាក់ពីក្រោយ។
លោក សុវណ្ណរិទ្ធ បានព្រមានថា៖ «ប្រទេសកំពុងអភិវឌ្ឍន៍មួយចំនួនបានអនុវត្តវិធីសាស្ត្រលើកកម្ពស់ផលិតភាព ដើម្បីជំរុញការប្រកួតប្រជែង។ ប្រសិនបើយើងមិនធ្វើដូចគ្នាទេ សហគ្រាសធុនតូច និងមធ្យមរបស់យើងនឹងជួបការលំបាក ហើយមនុស្សជាច្រើនអាចនឹងដួលរលំ»។
លោក អ៊ុំ សេរីវុទ្ធ ប្រធានមជ្ឈមណ្ឌលជាតិផលិតភាពកម្ពុជា បានគូសបញ្ជាក់ពីសិក្ខាសាលានេះ ផ្តោតលើការជួយសហគ្រាសធុនតូច និងមធ្យម និងសិប្បកម្មក្នុងខេត្តរតនគិរី កសាងសមត្ថភាពរបស់ពួកគេឱ្យមានភាពធន់ និងនិរន្តរភាព។
លោកបានចែករំលែកថា មជ្ឈមណ្ឌលបានអនុវត្តយុទ្ធសាស្ត្រផ្សេងៗ ដើម្បីកាត់បន្ថយថ្លៃដើមផលិតកម្ម និងលើកកម្ពស់ប្រាក់ចំណេញ និងការប្រកួតប្រជែងរបស់អាជីវកម្ម។
លោកលើកឡើងថា៖ «បងប្អូនម្ចាស់សហគ្រាស សិប្បកម្ម សេវាកម្ម ក្នុងខេត្ត នៃភូមិភាគឦសាន យកទៅអនុវត្តជាក់ស្តែងនៅមូលដ្ឋានផលិតកម្ម ឱ្យមានការវិវឌ្ឍឈានឡើង និងប្អូនៗ សិស្ស និស្សិត កាន់តែមានមូលដ្ឋានចំណេះដឹងមួយជាក់លាក់សម្រាប់ប្រកបមុខមុខរបររៀងៗខ្លួននាពេលខាងមុខ»។
លោកបាននិយាយថា ម្ចាស់សហគ្រាស និងសិប្បកម្មផ្សេងៗមាន២៥មូលដ្ឋាន សេវាកម្ម និងលក់ប្រេងឥន្ទនៈ ជិត ៤០មូលដ្ឋាន រួមទាំងនិស្សិតមកពីវិទ្យាស្ថានបណ្ដុះបណ្ដាលប្រមាណ ៤០នាក់ និងសិស្សវិទ្យាល័យអូរជុំ ៦ នាក់៕
