លោក ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា (CDC) និងលោកស្រី Bridgette Walker ភារធារីស្ថានទូតអាមេរិកចាប់ដៃគ្នាក្នុងជំនួបថ្ងៃទី៣ កញ្ញា។ CDC
ភ្នំពេញៈ លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា (CDC) ចង់ឃើញការវិនិយោគពីសហរដ្ឋអាមេរិក និងសហគមន៍អឺរ៉ុប (EU) នៅកម្ពុជាឱ្យបានកាន់តែច្រើនថែមទៀត ខណៈបេសកកម្មស្វែងរកការបណ្ដាក់ទុនពីក្រុមហ៊ុនអាមេរិកមកកម្ពុជានឹងចាប់ផ្ដើមក្នុងខែនេះនៅសហរដ្ឋអាមេរិក។
លោកលើកឡើងដូច្នេះក្នុងជំនួបជាមួយលោកស្រី Bridgette Walker ភារធារីស្ថានទូតសហរដ្ឋអាមេរិកប្រចាំកម្ពុជា នាថ្ងៃទី៣ កញ្ញា នៅទីស្ដីការCDC នៅភ្នំពេញ។
សេចក្ដីប្រកាសព័ត៌មានCDCបញ្ជាក់នាថ្ងៃដដែលនេះថា លោក ស៊ុន ចាន់ថុល បានថ្លែងអំណរគុណដល់សហរដ្ឋអាមេរិក និងក្រុមហ៊ុនអាមេរិកដែលបានដាក់ទុនវិនិយោគ នៅកម្ពុជានាពេលកន្លងមក។
លោកលើកឡើងថា មានក្រុមហ៊ុនធំៗរបស់សហរដ្ឋអាមេរិកមួយចំនួន ដែលទទួលបានជោគជ័យលើការវិនិយោគនៅកម្ពុជា ដូចជា ក្រុមហ៊ុនផលិតភេសជ្ជៈ Coca Cola ក្នុងតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ និងក្រុមហ៊ុន RMA Automotive (Cambodia) ដែលដំឡើងរថយន្តម៉ាក FORD ក្នុងខេត្តពោធិ៍សាត់ជាដើម។
សេចក្ដីប្រកាសព័ត៌មានបន្តថា៖ «ឯកឧត្ដមឧបនាយករដ្ឋមន្ត្រីចង់ឃើញឱ្យបានកាន់តែច្រើនថែមទៀតនូវការវិនិយោគពីសហរដ្ឋអាមេរិក និងសហគមន៍អឺរ៉ុបនៅកម្ពុជា»។
លោក ស៊ុន ចាន់ថុល ប្រាប់លោកស្រី Bridgette Walker ថា គម្រោងបេសកកម្មគោះទ្វារវិនិយោគិននៅសហរដ្ឋអាមេរិករបស់CDC នៅខែកញ្ញានេះមានគោលបំណងផ្សព្វផ្សាយពីបរិយាកាសវិនិយោគនៅកម្ពុជា និងស្វែងរកការបណ្ដាក់ទុនពីក្រុមហ៊ុនអាមេរិកមកកម្ពុជា។
លោកឧបនាយករដ្ឋមន្ត្រី រំពឹងថា ការវិនិយោគដោយផ្ទាល់ពីសហរដ្ឋអាមេរិកនឹងមានការកើនឡើងនាពេលអនាគត ក្រោមកិច្ចសម្របសម្រួលវិនិយោគរបស់រដ្ឋាភិបាល ដែលមាន CDC ជាសេនាធិការច្រកចេញចូលតែមួយ និងភាពបើកទូលាយរបស់កម្ពុជាជូនដល់វិនិយោគិនបរទេស។
សេចក្ដីប្រកាសព័ត៌មានបញ្ជាក់ថា ឆ្លើយតបទៅកាន់លោកស្រី Bridgette Walker ដែលបានសាកសួរអំពីវិស័យជាគោលដៅ ដែលរដ្ឋាភិបាលព្យាយាមទាក់ទាញការវិនិយោគបន្ថែម លោក ស៊ុន ចាន់ថុល បានបង្ហាញអំពីវិស័យគន្លឹះ រួមមាន វិស័យយានយន្ត គ្រឿងបង្គុំអេឡិចត្រូនិក និងកសិឧស្សាហកម្ម ដោយលោកបញ្ជាក់ថា វិស័យទាំងនេះនឹងបង្កើនតម្លៃបន្ថែមដល់សេដ្ឋកិច្ចកម្ពុជា។
យោងតាមសេចក្ដីប្រកាសព័ត៌មានដដែល លោកស្រី Bridgette Walker បានបង្ហាញសុទិដ្ឋិនិយមអំពីកិច្ចខិតខំរបស់កម្ពុជាក្នុងការទាក់ទាញវិនិយោគិន និងជូនពរជូនដល់CDC ឱ្យទទួលបានជោគជ័យក្នុងបេសកកម្មគោះទ្វារវិនិយោគិននៅសហរដ្ឋអាមេរិកនាពេលខាងមុខនេះ។
ប្រភពដដែលបញ្ជាក់ថា ចំពោះទំនាក់ទំនងទ្វេភាគី លោកស្រីរំពឹងថាកម្ពុជា និងសហរដ្ឋអាមេរិកនឹងរួមគ្នាបន្តកិច្ចសហប្រតិបត្តិការនានាបន្ថែមទៀត ដើម្បីពង្រឹង និងពង្រីកទំនាក់ទំនងឱ្យបានកាន់តែល្អប្រសើរថែមមួយកម្រិតទៀត ដែលនឹងរួមចំណែកគាំទ្រដល់ការអភិវឌ្ឍសេដ្ឋកិច្ច និងសង្គមកម្ពុជា។
របាយការណ៍ CDC បានឱ្យដឹងថា ក្នុងរយៈពេល១ឆ្នាំចុងក្រោយនេះ ពីខែកញ្ញា ឆ្នាំ២០២៣ ដល់ខែសីហា ឆ្នាំ២០២៤ ប្រភពទុនវិនិយោគមកពីសហរដ្ឋអាមេរិកមានប្រមាណ០,១ភាគរយ នៃទុនវិនិយោគសរុប ខណៈចិនឈរនៅលំដាប់លេខរៀងទី១ដែលមានប្រមាណ ៦០ភាគរយនៃទុនវិនិយោគសរុប។
ក្នុងរយៈពេល ៧ខែដំបូងក្នុងឆ្នាំ២០២៤ ទំហំពាណិជ្ជកម្មរវាងកម្ពុជា និងសហរដ្ឋអាមេរិក មានជាង៥,៦ពាន់លានដុល្លារ កើនឡើង៦,៥ភាគរយ។ ក្នុងនោះ ការនាំចេញមានជាង៥,៥ពាន់លានដុល្លារ កើន៦,៤ភាគរយ ខណៈការនាំចូលពីសហរដ្ឋអាមេរិកមានជាង១៥៤លានដុល្លារ កើន៨,៩ភាគរយ បើធៀបរយៈពេលដូចគ្នាក្នុងឆ្នាំ២០២៣។ នេះបើយោងតាមរបាយការណ៍អគ្គនាយកដ្ឋានគយនិងរដ្ឋាករកម្ពុជា៕
