លោក ហួត ហាក់(កណ្តាលស្តាំ) ពិភាក្សាជាមួយលោក Bodo Pfaff-Greiffenhagen។ ក្រសួងទេសចរណ៍
កម្ពុជា និងអាល្លឺម៉ង់ បានពិភាក្សាគ្នាអំពីគម្រោងនៃការតភ្ជាប់ជើងហោះហើរត្រង់រវាងប្រទេសទាំង ២ នៅពេលអាកាសយាន្តដ្ឋានអន្តរជាតិតេជោបើកដំណើរការ ខណៈក្នុងឆ្នាំ២០២៤ មានជនជាតិអាល្លឺម៉ង់ប្រមាណ ៧,៥ ម៉ឺននាក់បានធ្វើដំណើរមកកម្ពុជា។
រដ្ឋមន្ត្រីក្រសួងទេសចរណ៍ លោក ហួត ហាក់ កាលពីដើមសប្តាហ៍នេះបានដឹកនាំគណៈប្រតិភូជាន់ខ្ពស់ក្រសួងទេសចរណ៍កម្ពុជា ទៅចូលរួមពិព័រណ៍អន្តរជាតិ International Tourismus Borse (ITB Berlin) 2025 ដែលប្រព្រឹត្តទៅចាប់ពីថ្ងៃទី៤-៦ ខែមីនា ឆ្នាំ២០២៥ នៅមជ្ឈមណ្ឌលពិព័រណ៍ Messe Berlin ក្នុងទីក្រុងប៊ែរឡាំង សាធារណរដ្ឋសហព័ន្ធអាល្លឺម៉ង់។
នៅក្នុងជំនួបនៅទីក្រុងប៊ែរឡាំង កាលពីថ្ងៃទី៦ ខែមីនា រវាងលោក ហួត ហាក់ ជាមួយនឹង លោក Bodo Pfaff-Greiffenhagen តំណាងក្រុមហ៊ុន Marketpilots នៃសាធារណរដ្ឋសហព័ន្ធអាល្លឺម៉ង់ ភាគីទាំង ២ បានពិភាក្សាគ្នាយ៉ាងច្រើនពីលទ្ធភាពក្នុងការសិក្សាពីគម្រោងការតភ្ជាប់ជើងហោះហើរត្រង់រវាងព្រះរាជាណាចក្រកម្ពុជា និងសាធារណរដ្ឋសហព័ន្ធអាល្លឺម៉ង់ តាមរយៈអាកាសយានដ្ឋានអន្តរជាតិតេជោ (ភ្នំពេញ)។
ភាគីទាំង ២ បានយល់ស្របគ្នាថាការតភ្ជាប់ជើងហោះហើរនេះ គឺដើម្បីជំរុញកំណើនភ្ញៀវទេសចរពីទីផ្សារអឺរ៉ុប ជាពិសេសទីផ្សារនិយាយភាសាអាល្លឺម៉ង់មកកាន់ប្រទេសកម្ពុជាឱ្យកាន់តែទូលំទូលាយ និងជំរុញលើកតម្កើងកិត្តិនាមកម្ពុជាជាគោលដៅទេសចរណ៍ប្រកបដោយភាពកក់ក្តៅ និងឈានមុខគេក្នុងតំបន់ និងពិភពលោក។
ទិន្នន័យក្រសួងទេសចរណ៍ ឱ្យដឹងថា ក្នុងឆ្នាំ ២០២៤ កម្ពុជាទទួលបានភ្ញៀវបរទេសសរុប ៦,៧ លាននាក់ កើនឡើង ២២,៩ភាគរយបើធៀបនឹងឆ្នាំ ២០២៣ ដែលមានចំនួន ៥,៤៥ លាននាក់។
ក្នុងចំណោមនោះជនជាតិអាល្លឺម៉ង់ មានចំនួន ៧៤ ៨៦១ នាក់ កើនឡើង ១៨,៨ភាគរយ ដោយក្នុងនោះភ្ញៀវទេសចរ មានចំនួន ៦៩ ៥២២នាក់ ក្រៅពីនោះគឺជាធុរកិច្ចជន។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ភ្នំពេញប៉ុស្តិ៍ថា ស្ថានភាពចំនួនភ្ញៀវទេសចរបរទេសដែលមកទស្សនាប្រាសាទបុរាណក្នុងខេត្តសៀមរាបបានកើនឡើងគួរឱ្យកត់សម្គាល់ចាប់ពីចុងឆ្នាំ២០២៤ មក។
កំណើននេះអាចមកពីកត្តារួមផ្សំមួយចំនួនដូចជា ការងើបឡើងវិញនៃកំណើនសេដ្ឋកិច្ចសកល ព្រមជាមួយនឹងការខិតខំរបស់រដ្ឋាភិបាល និងផ្នែកឯកជនកម្ពុជាលើការផ្សព្វផ្សាយ និងការកសាងហេដ្ឋារចនាសម្ព័ន្ធផ្លូវថ្នល់ អាកាសយានដ្ឋាន និងកំពង់ផែជាដើម។
លោកបន្ថែមទៀតថា កំណើនជើងហោះហើរត្រង់ពីក្រៅប្រទេសមកកម្ពុជា ក៏ជាចំណែកសំខាន់ធ្វើឱ្យកម្ពុជាទទួលបានភ្ញៀវច្រើនផងដែរ ។
លោកលើកឡើងថា៖«ជាការល្អណាស់ប្រសិនបើមានជើងហោះហើរអន្តរជាតិកាន់តែច្រើនចូលមកកម្ពុជា។ វានឹងកាន់តែពិសេសបន្ថែមទៀត ប្រសិនបើក្រុមហ៊ុនអាកាសចរណ៍អន្តរជាតិធំៗ អាចមកចុះចតផ្ទាល់នៅអាកាសយាន្តដ្ឋានអន្តរជាតិខេត្តសៀមរាប ដែលជាតំបន់ប្រាសាទបុរាណដ៏ល្បីល្បាញលើពិភពលោក»។
ទោះយ៉ាងណា លោក ខៀវ ធី ក៏លើកទឹកចិត្តឱ្យប្រតិបត្តិការទេសចរណ៍ និងអ្នកពាក់ព័ន្ធទាំងអស់ត្រូវខិតខំបន្ថែមទៀតក្នុងការផ្តល់សេវាកម្មឱ្យកាន់តែប្រសើរ ដើម្បីទាក់ទាញចិត្តភ្ញៀវទេសចរទាំងអស់នោះឱ្យធ្វើដំណើរមកកម្ពុជាសារជាថ្មី ក៏ដូចជាជួយផ្សព្វផ្សាយទៅក្រុមគ្រួសារ និងមិត្តភក្តិរបស់ពួកគេ។
ប្រធានទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បាននិយាយថា ការពង្រឹង និងពង្រីកទំនាក់ទំនងការទូត និងមធ្យោបាយដឹកជញ្ជូនឱ្យកាន់តែសម្បូរបែប គឺជាធាតុផ្សំដ៏សំខាន់ក្នុងការធ្វើឱ្យចរន្តធ្វើដំណើររបស់ភ្ញៀវទេសចរពីប្រទេសមួយទៅប្រទេសមួយមានចំនួនកាន់តែច្រើន។
ប្រសិនបើកម្ពុជា និងអាល្លឺម៉ង់ អាចមានជើងហោះហើរត្រង់ជាមួយគ្នាគឺជាការល្អ ព្រោះតាមរយៈជើងហោះហើរនេះ ក៏អាចនាំយកភ្ញៀវទេសចរ និងអ្នកវិនិយោគពីតំបន់អឺរ៉ុបឱ្យចូលមកកម្ពុជាកាន់តែច្រើនផងដែរ។
លោកស្រីនិយាយថា៖«វិស័យទេសចរណ៍បានផ្តល់ប្រាក់ចំណូលយ៉ាងច្រើនសម្រាប់ប្រជាជនខ្មែរ និងសេដ្ឋកិច្ចជាតិ ដូច្នេះវាជាការចាំបាច់ណាស់ដែលគ្រប់គ្នាត្រូវខិតខំទាញយកផលប្រយោជន៍ឱ្យបានច្រើនពីវិស័យមួយនេះ»។
ដើម្បីបង្កើនសក្តានុពលក្នុងការទាក់ទាញភ្ញៀវទេសចរបរទេរសឱ្យចូលមកប្រទេសកម្ពុជាកាន់តែច្រើ រាជរដ្ឋាភិបាលកម្ពុជា មានសម្រេចធ្វើការបញ្ចុះតម្លៃវីសា (e-Visa) ផងដែរ ដោយចាប់ពីថ្ងៃទី១ ខែមករា ឆ្នាំ២០២៥ វីសាប្រភេទ (T)បញ្ចុះ ពី ៣៦ ដុល្លារ មកនៅត្រឹម ៣០ ដុល្លារ, វីសាប្រភេទ (E) visa បញ្ចុះ ពី ៤២ ដុល្លារ មក ៣៥ ដុល្លារ។
ក្នុងសប្តាហ៍នេះ វិស័យអាកាសចរណ៍កម្ពុជា ក៏ទទួលបានដំណឹងវិជ្ជមានចំនួន ២ ផងដែរ គឺក្រុមហ៊ុនអាកាសចរណ៍ Turkish Airlines នឹងចាប់ផ្តើមហោះហើរត្រង់ពីទីក្រុងអ៊ីស្តង់ប៊ុល មកកាន់រាជធានីភ្នំពេញចាប់ពីថ្ងៃទី១០ ខែធ្នូ ឆ្នាំ ២០២៥ ចំណែកក្រុមហ៊ុនអាកាសចរណ៍ Emirates ក៏នឹងបន្ថែមជើងហោះហើររបស់ខ្លួនពីទីក្រុងឌុយបៃ មកកាន់អាកាសយានដ្ឋានអន្តរជាតិខេត្តសៀមរាប ចាប់ពីពាក់កណ្តាលឆ្នាំ២០២៥ តទៅ ខណៈបច្ចុប្បន្នគឺមានការហោះហើររវាងទីក្រុងឌុយបៃ និងអាកាសយានដ្ឋានអន្តរជាតិភ្នំពេញ៕
