លោក ស៊ុន ចាន់ថុល (ឆ្វេង) និងលោកស្រី ចម និម្មល (ស្តាំ)។ ភ្នំពេញប៉ុស្តិ៍
អ្នកសេដ្ឋកិច្ចមានសុទិដ្ឋិនិយមថា កម្ពុជានឹងទទួលបានផលវិជ្ជមានពីការចរចាលើកិច្ចព្រមព្រៀងពាណិជ្ជកម្មបដិការរវាងកម្ពុជា និងសហរដ្ឋអាមេរិក ដែលនឹងប្រព្រឹត្តទៅដោយផ្ទាល់នៅរដ្ឋធានីវ៉ាស៊ីនតោន របស់សហរដ្ឋអាមេរិក នាថ្ងៃទី១៤-១៥ ខែឧសភា ឆ្នាំ២០២៥ ខាងមុខ។
នាព្រឹកថ្ងៃទី២ ខែឧសភា នេះ អង្គភាពអ្នកនាំពាក្យរាជរដ្ឋាភិបាលកម្ពុជា បានចេញសេចក្ដីប្រកាសព័ត៌មានមួយដោយលើកឡើងថា នាព្រឹកថ្ងៃទី២ ខែឧសភា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា(CDC) លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី ១ នៃក្រុមប្រឹក្សាអភិវឌ្ឍន៍កម្ពុជា និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានដឹកនាំក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក បានជួបប្រជុំទ្វេភាគីតាមប្រព័ន្ធវីដេអូជាមួយនឹងតំណាងពាណិជ្ជកម្មសហរដ្ឋអាមេរិក ដែលដឹកនាំដោយ លោកស្រី Sarah Ellerman អនុប្រធានតំណាងពាណិជ្ជកម្មសហរដ្ឋអាមេរិក ទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក។
សេចក្តីប្រកាសព័ត៌មានបញ្ជាក់ថា៖«រាជរដ្ឋាភិបាលដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នឹងបន្តធ្វើកិច្ចការងារនេះដោយយកចិត្តទុកដាក់បំផុត»។
អ្នកសេដ្ឋកិច្ច និងជាអនុប្រធានសភាពាណិជ្ជកម្ពុជា-ចិន លោក ឡោ វិចិត្រ ជឿជាក់ថា រាជរដ្ឋាភិបាលកម្ពុជាកំពុងបង្ហាញពីឆន្ទៈក្នុងការសម្របសម្រួលពាណិជ្ជកម្មជាមួយសហរដ្ឋអាមេរិក តាមរយៈការបង្កើនកិច្ចខិតខំទិញទំនិញពីអាមេរិកឱ្យបានកាន់តែច្រើន ក៏ដូចជាការសន្យាកាត់បន្ថយអត្រាពន្ធគយក្នុងអត្រាណាមួយតាមលទ្ធភាពរបស់រដ្ឋាភិបាល។ លោកបន្ថែមថា បើការចរចារវាងកម្ពុជា និងសហរដ្ឋអាមេរិក ទទួលបានលទ្ធផលជាវិជ្ជមាន គឺប្រាកដណាស់ថាទំនិញផលិតនៅកម្ពុជានឹងកាន់តែមានទីផ្សារធំទូលាយនៅសហរដ្ឋអាមេរិក។ បច្ចុប្បន្នចង្វាក់ផលិតកម្មនៅកម្ពុជាបានកើនឡើងជាបន្តបន្ទាប់ ជាពិសេសផលិតផលសម្លៀកបំពាក់ ស្បែកជើង កាបូបធ្វើដំណើរ កង់ សំបកកង់រថយន្ត និងផលិតផលកសិកម្មមួយចំនួនទៀត។
លោកបានប្រាប់ភ្នំពេញប៉ុស្តិ៍ក្នុងថ្ងៃទី២ ខែឧសភា ថា៖«ដោយសារកម្ពុជាមានតម្លៃពលកម្មប្រកួតប្រជែងខ្លាំង ដូច្នេះប្រសិនបើអាមេរិកបន្ធូរបន្ថយពន្ធនាំចូលសម្រាប់ផលិតផលរបស់យើង គឺនឹងមានទំនិញកាន់តែច្រើនរត់ចូលទីផ្សារអាមេរិក។ ទោះយ៉ាងណា កម្ពុជាក៏មានភាពចាំបាច់ក្នុងការបង្កើតការបញ្ជាទិញទំនិញផលិតនៅអាមេរិកផងដែរ»។
លោកបន្តថា៖«ជារួមដើម្បីឱ្យការចរចាទទួលបានផ្លែផ្កា គឺកម្ពុជាត្រូវតែមានលក្ខខណ្ឌដោះដូរ ដូចជា ការប្តេជ្ញានាំចូលទំនិញពីអាមេរិកឱ្យកាន់តែច្រើនពីចំនួនជិត ៣០០លានដុល្លារក្នុង ១ឆ្នាំទៅជាង ១ ពាន់លានដុល្លារនាពេលខាងមុខ។ មួយវិញទៀត រដ្ឋាភិបាលកម្ពុជាក៏អាចសិក្សាលើលទ្ធភាពទម្លាក់ពន្ធគយនាំទំនិញពីអាមេរិកដល់សូន្យតែម្តង ដើម្បីឱ្យកិច្ចចរចានេះកាន់តែមានភាពទាក់ទាញជូនទៅសហរដ្ឋអាមេរិក»។
របាយការណ៍អគ្គនាយកដ្ឋានគយ និងរដ្ឋាករកម្ពុជា(GDCE) បង្ហាញថា ក្នុងឆ្នាំ២០២៤ កម្ពុជា-អាមេរិក សម្រេចបានទំហំពាណិជ្ជកម្ម ១០,១៨ ពាន់លានដុល្លារ កើនឡើង ១១,២ភាគរយក្នុងនោះកម្ពុជានាំចេញទៅអាមេរិក ក្នុងតម្លៃ ៩,៩ពាន់លានដុល្លារ កើនឡើង ១១,៤ភាគរយ ខណៈអាមេរិកនាំចូលកម្ពុជាវិញ ក្នុងតម្លៃ ២៦៤,១៤ លានដុល្លារ។
រដ្ឋបាលសហរដ្ឋអាមេរិកដែលដឹកនាំដោយលោកប្រធានាធិបតី Donald J. Trump កាលពីថ្ងៃទី៣ ខែមេសា(ម៉ោងនៅសហរដ្ឋអាមេរិក) បានប្រកាសពីការដំឡើងពន្ធគយសម្រាប់ការនាំចូលទំនិញពីស្ទើរគ្រប់ប្រទេសទៅកាន់ទីផ្សារសហរដ្ឋអាមេរិក ចាប់ពីថ្ងៃទី៩ ខែមេសា ឆ្នាំ២០២៥ តទៅ។ ទោះយ៉ាងណានៅពេលកាលបរិច្ឆេទចូលមកដល់ លោក Donald J. Trump ក៏បានសម្រេចពន្យារពេលចំនួន ៩០ថ្ងៃ ដើម្បីបើកឱកាសឱ្យប្រទេសនីមួយៗជួបចរចាទ្វេភាគីជាមួយរដ្ឋាភិបាលសហរដ្ឋអាមេរិក។
កម្ពុជាត្រូវបានសហរដ្ឋអាមេរិក កំណត់យកពន្ធទំនិញក្នុងអត្រា ៤៩ភាគរយដែលជាកម្រិតខ្ពស់ជាងគេក្នុងតំបន់អាស៊ាន។ ការកំណត់អត្រាពន្ធថ្មីនេះ ត្រូវបានធ្វើឡើងដោយផ្អែកលើចំនួនទឹកប្រាក់នៃអតុល្យភាពជញ្ជីងពាណិជ្ជកម្មទ្វេភាគីកម្ពុជា-សហរដ្ឋអាមេរិក ក្នុងឆ្នាំ ២០២៤។
កាលពីរាត្រីថ្ងៃទី១៦ ខែមេសា ឆ្នាំ២០២៥ នៅទីស្តីការក្រុមប្រឹក្សាអភិវឌ្ឍន៍កម្ពុជា(CDC) លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម ក៏ធ្លាប់បានដឹកនាំក្រុមការងារចំពោះកិច្ចសម្របសម្រួលទំនាក់ទំនងពាណិជ្ជកម្ម និងវិនិយោគទ្វេភាគីកម្ពុជា-សហរដ្ឋអាមេរិក ជួបប្រជុំទ្វេភាគីតាមប្រព័ន្ធវីដេអូជាមួយឯកអគ្គរដ្ឋទូត Jamieson Greer ប្រធានតំណាងពាណិជ្ជកម្មសហរដ្ឋអាមេរិក ផងដែរ៕
