សកម្មភាពកម្មការិនីកំពុងដេរសម្លៀកបំពាក់ក្នុងរោងចក្រមួយកន្លែង នៅរាជធានីភ្នំពេញ។ STPM
អ្នកសេដ្ឋកិច្ចយល់ឃើញថា ដំណើរទស្សនកិច្ចរបស់ស្នងការផ្នែកពាណិជ្ជកម្ម និងវិនិយោគិនកាណាដាមកកាន់ប្រទេសកម្ពុជានៅចុងខែឧសភានេះ នឹងផ្តល់ផលវិជ្ជមានសម្រាប់កម្ពុជាក្នុងការបង្កើនទំហំពាណិជ្ជកម្មទ្វេភាគី ក៏ដូចជាទាក់ទាញអ្នកវិនិយោគកាណាដាឱ្យចូលមកបណ្តាក់ទុនផ្ទាល់កាន់តែច្រើន។
សេចក្តីប្រកាសព័ត៌មានរបស់ក្រសួងការបរទេសប្រទេសកាណាដា កាលពីថ្ងៃទី២៥ ខែឧសភា ឱ្យដឹងថា ចាប់ពីថ្ងៃទី ២៨ ដល់ថ្ងៃទី៣០ ខែឧសភាខាងមុខនេះ លោកស្រី Sara Wilshaw ស្នងការពាណិជ្ជកម្មនៃប្រទេសកាណាដា និងជាឧបការីអនុរដ្ឋមន្ត្រីទទួលបន្ទុកកិច្ចការអភិវឌ្ឍន៍ធុរកិច្ចអន្តរជាតិនៃក្រសួងការបរទេសកាណាដា នឹងដឹកនាំគណៈប្រតិភូពាណិជ្ជកម្មកាណាដា ដ៏ធំបំផុតមិនធ្លាប់មានមកកាន់ប្រទេសកម្ពុជា ដែលជាផ្នែកមួយនៃបេសកកម្មពាណិជ្ជកម្មក្រុមកាណាដាសម្រាប់ឆ្នាំ ២០២៥ (TCTM) ទៅកាន់ប្រទេសថៃ និងកម្ពុជា។
សេចក្តីប្រកាសព័ត៌មានឱ្យដឹងទៀតថា៖«នៅរាជធានីភ្នំពេញ លោកស្រី Wilshaw នឹងមានការចូលរួមដោយតំណាងចំនួន ៩០ នាក់មកពីស្ថាប័នកាណាដាជាង ៥០ ដែលស្វែងរកឱកាសពាណិជ្ជកម្ម និងភាពជាដៃគូនៅក្នុងសេដ្ឋកិច្ចអាស៊ានដ៏រស់រវើកនេះ។ បេសកកម្មនេះបំពេញបន្ថែមលើទំនាក់ទំនងទ្វេភាគីដែលកាន់តែស៊ីជម្រៅ បន្ទាប់ពីដំណើរទស្សនកិច្ចផ្សព្វផ្សាយជំរុញការវិនិយោគទៅប្រទេសកាណាដារបស់លោក ស៊ុន ចាន់ថុល ឧបនាយករដ្ឋមន្ត្រីកម្ពុជា កាលពីខែកញ្ញា ឆ្នាំ ២០២៤»។
សេចក្តីប្រកាសព័ត៌មាន បានបន្តថា ក្នុងនាមជាគំនិតផ្តួចផ្តើមដ៏សំខាន់ក្រោមយុទ្ធសាស្ត្រ ឥណ្ឌូ-ប៉ាស៊ីហ្វិក និងយុទ្ធសាស្ត្រពិពិធកម្មពាណិជ្ជកម្ម TCTM ជួយដល់ក្រុមហ៊ុននាំចេញ និងក្រុមហ៊ុនច្នៃប្រឌិតកាណាដាឱ្យពង្រីកខ្លួនទៅកាន់ទីផ្សារយុទ្ធសាស្ត្រនៅកម្រិតសកល គឺកាណាដានឹងពង្រឹងខ្សែសង្វាក់ផ្គត់ផ្គង់ និងកសាងភាពជាដៃគូរយៈពេលវែង ប្រកបដោយបរិយាបន្ន តាមរយៈការចូលរួមដោយផ្ទាល់ជាមួយអ្នកធ្វើសេចក្តីសម្រេចចិត្តសំខាន់ៗ និងភាគីពាក់ព័ន្ធក្នុងស្រុក។
បើតាមសេចក្តីប្រកាសព័ត៌មាន នៅក្នុងដំណើរទស្សនកិច្ចរបស់លោកស្រី Sara Wilshaw នឹងមានកម្មវិធីសំខាន់ៗជាច្រើនដូចជា ជំនួបប្រជុំរវាងលោកស្រី Wilshaw ជាមួយលោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា(CDC), លោក សុក ស៊ីផាន់ណា ទេសរដ្ឋមន្ត្រី, លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម, លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងក៏មានជំនួបផ្គូរផ្គងផ្នែកឯកជន B2B រវាងអ្នកវិនិយោគនៃប្រទេសទាំង ២ ផងដែរ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២៦ ខែឧសភាថា ដំណើរទស្សនកិច្ចនេះនឹងជួយជំរុញកិច្ចសហប្រតិបត្តិការផ្នែកការទូត ជាពិសេសផ្នែកពាណិជ្ជកម្មរវាងប្រទេសកាណាដា-កម្ពុជា និងកាណាដា-អាស៊ានឱ្យកាន់តែល្អប្រសើរបន្ថែមទៀត។ លោកបន្តថា កម្ពុជាក៏ត្រូវតែបង្ហាញនូវឆន្ទះរបស់ខ្លួនឱ្យបានច្បាស់លាស់ តាមរយៈការលើកទឹកចិត្តឱ្យកាន់តែច្រើន ដើម្បីទាក់ទាញអ្នកវិនិយោគកាណាដាឱ្យមកបណ្តាក់ទុនផ្ទាល់កាន់តែច្រើន ហើយព្រមជាមួយគ្នានេះក៏ធ្វើការបញ្ជាទិញទំនិញពីប្រទេសកម្ពុជាឱ្យច្រើនផងដែរ។
លោកបានថ្លែងថា៖«ខ្ញុំជឿថាដំណើរទស្សនកិច្ចរបស់គណៈប្រតិភូ និងធុរជនកាណាដាមកកម្ពុជានៅពេលខាងមុខនេះ គឺជាការឆ្លើយតបទៅនឹងសេចក្តីប្រកាសរបស់កិច្ចប្រជុំរបស់ថ្នាក់ដឹកនាំកំពូលអាស៊ាន ក្នុងន័យដើម្បីពង្រឹងកិច្ចសហប្រតិបត្តិការជាមួយបណ្តាប្រទេសជាសមាជិកអាស៊ាន ជាពិសេសក្នុងបរិបទដែលសេដ្ឋកិច្ចពិភពលោក កំពុងស្ថិតក្នុងភាពមិនច្បាស់លាស់ដោយសារការគម្រាមដាក់សម្ពាធពន្ធគយរបស់អាមេរិកទៅលើប្រទេសជាច្រើនលើពិភពលោក»។
លោកបន្ថែមថាទៀត៖«ការធ្វើពិពិធកម្មទីផ្សារ និងពង្រឹកកិច្ចសហប្រតិបត្តិការលើគ្រប់វិស័យជាមួយប្រទេសដៃគូ គឺពិតជាមានភាពចាំបាច់ណាស់ក្នុងការជំរុញកំណើនល្បឿនសេដ្ឋកិច្ចកម្ពុជា ជាពិសេសក្នុងដំណាក់កាលដែលពិភពលោកកំពុងជួបប្រទះនៅពេលនេះ»។
យោងតាមស្ថិតិអាជ្ញាធរប្រទេសកាណាដា គឺការធ្វើពាណិជ្ជកម្មទំនិញទ្វេភាគីរវាងកាណាដា និងកម្ពុជា ក្នុងឆ្នាំ២០២៤ បានកើនដល់ ២,៤ពាន់លានដុល្លារ ដោយប្រទេសកាណាដា ឈរនៅលំដាប់ទី៤ នៃទីផ្សារនាំចេញសម្លៀកបំពាក់ និងផលិតផលវាយនភណ្ឌរបស់កម្ពុជា។ ក្នុងចំនួននេះ គឺទំនិញកាណាដានាំមកកម្ពុជា មានតម្លៃសរុប ៣៣,៥ លានដុល្លារ និងទំនិញកម្ពុជានាំចូលកាណាដា មានចំនួនជាង ២,៣ ពាន់លានដុល្លារ។ ជាមួយគ្នានេះ ការវិនិយោគផ្ទាល់របស់កាណាដានៅកម្ពុជា មានទឹកប្រាក់ប្រមាណ ២,៩ ពាន់លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង ធ្លាប់បានប្រាប់ភ្នំពេញប៉ុស្តិ៍ថា ប្រទេសកាណាដា គឺជាទីផ្សារដ៏មានសក្តានុពលមួយសម្រាប់ទំនិញកម្ពុជា ដោយទឹកប្រាក់នាំចេញទំនិញរវាងប្រទេសទាំង ២ បានកើនឡើងស្ទើររាល់ឆ្នាំ។ តាមរយៈបរិមាណនាំចេញទំនិញដ៏ច្រើនពីកម្ពុជា កន្លងមកសភាពាណិជ្ជកម្មកម្ពុជា ក៏បានបើកការិយាល័យតំណាងសភាពាណិជ្ជកម្ម(CCC) នៅក្នុងប្រទេសកាណាដា រួចហើយ។
លោកពន្យល់ថា ការិយាល័យតំណាង CCC នៅប្រទេសកាណាដា មានតួនាទីជួយផ្សព្វផ្សាយផលិតផលកម្ពុជាទៅដល់អតិថិជនកាណាដា និងផ្តល់ព័ត៌មានដើម្បីទាក់ទាញវិនិយោគិនកាណាដាឱ្យមកបណ្តាក់ទុនផ្ទាល់នៅកម្ពុជា។
លោកបាននិយាយថា៖ «យើងសង្ឃឹមថា តាមរយៈកិច្ចខិតខំរបស់រដ្ឋាភិបាល និងផ្នែកឯកជន ការនាំចេញទំនិញពីកម្ពុជាទៅប្រទេសកាណាដា នឹងបន្តកើនឡើងទៀត»។
បើតាមលោក លឹម ហេង ភាគច្រើននៃទំនិញកម្ពុជានាំទៅកាណាដា គឺជាផលិតផលសម្លៀកបំពាក់ ផលិតផលធ្វើដំណើរ ស្បែកជើង កង់ និងគ្រឿងបង្គុំអេឡិចត្រូនិក អគ្គិសនី ចំណែកទំនិញកាណាដា នាំមកកម្ពុជារួមមាន គ្រឿងអេឡិចត្រូនិក រថយន្ត ជាដើម៕
