លោក Jin Liqun ប្រធានធនាគារ AIIB ជួបពិភាក្សាការងារជាមួយ លោក ហ៊ុន ម៉ាណែត។ STPM
ប្រធានធនាគារវិនិយោគហេដ្ឋារចនាសម្ព័ន្ធអាស៊ី(Asian Infrastructure Investment Bank-AIIB) បានបង្ហាញចំណាប់អារម្មណ៍ក្នុងការស្វែងរកឱកាសពង្រីកកិច្ចសហប្រតិបត្តិការជាកម្ពុជាលើវិស័យសក្ដានុពលមួយចំនួន និងមានជំនឿថាសេដ្ឋកិច្ចកម្ពុជានឹងបន្តរក្សាបាននូវកំណើនប្រកបដោយភាពធន់ និងរឹងមាំបន្ថែមទៀត។
ចំណាប់អាម្មណ៍នេះត្រូវបានលើកឡើងដោយ លោក Jin Liqun ប្រធានធនាគារ AIIB ក្នុងឱកាសនៃជំនួបពិភាក្សាការងារជាមួយនាយករដ្ឋមន្ត្រីកម្ពុជា លោក ហ៊ុន ម៉ាណែត កាលពីថ្ងៃទី២៩ ខែឧសភា ក្នុងឱកាសនៃដំណើរទស្សនកិច្ចការងារផ្លូវការនៅទីក្រុងតូក្យូ ប្រទេសជប៉ុន ចាប់ពីថ្ងៃទី២៨-៣១ ខែឧសភា ឆ្នាំ២០២៥។
នៅក្នុងជំនួបនេះ លោក Jin Liqun បានសម្តែងការកោតសរសើរចំពោះភាពការរីកចម្រើនដ៏ឆាប់រហ័សរបស់កម្ពុជា និងមានជំនឿយ៉ាងមុតមាំថាសេដ្ឋកិច្ចកម្ពុជានឹងបន្តរក្សាបាននូវកំណើនប្រកបដោយភាពធន់ និងរឹងមាំបន្ថែមទៀត។ ដើម្បីចូលរួមចំណែកជំរុញកំណើនសេដ្ឋកិច្ចកម្ពុជាឱ្យបោះជំហានទៅមុខកាន់តែលឿន AIIB ក៏កំពុងចាប់អារម្មណ៍ក្នុងការស្វែងរកឱកាសពង្រីកកិច្ចសហប្រតិបត្តិការនៅកម្ពុជាលើវិស័យសក្ដានុពលមួយចំនួនដូចជា វិស័យថាមពល, ការអភិវឌ្ឍទីក្រុង-ទីប្រជុំជន និងហេដ្ឋារចនាសម្ព័ន្ធតភ្ជាប់ ជាដើម។
លោកបានថ្លែងថា៖«ធនាគារ AIIB បានត្រៀមខ្លួនរួចជាស្រេចក្នុងការចូលរួមសហការជាមួយកម្ពុជាលើវិស័យទាំងនេះ ជាពិសេសវិស័យហេដ្ឋារចនាសម្ព័ន្ធ ដើម្បីរួមចំណែកជាមួយរដ្ឋាភិបាលកម្ពុជាក្នុងការអភិវឌ្ឍប្រកបដោយភាពធន់ និងចីរភាព»។
ជាការឆ្លើយតប លោក ហ៊ុន ម៉ាណែត បានសម្តែងក្តីរីករាយដែលបានជួបថ្នាក់ដឹកនាំធនាគារ AIIB ជាថ្មីម្តងទៀត និងបានស្វាគមន៍ចំពោះចំណាប់អារម្មណ៍របស់ថ្នាក់ដឹកនាំធនាគារ AIIB ក្នុងការស្វែងរកឱកាសពង្រីកកិច្ចសហប្រតិបត្តិការលើវិស័យសក្តានុពលនៅក្នុងប្រទេសកម្ពុជា។ លោកបន្តថា រាជរដ្ឋាភិបាលកម្ពុជាតែទទួលស្វាគមន៍ និងស្វែងរកកិច្ចសហប្រតិបត្តិការពីគ្រប់ដៃគូទាំងអស់ ដើម្បីរួមចំណែកជំរុញការអភិវឌ្ឍសង្គម-សេដ្ឋកិច្ចកម្ពុជាឱ្យកាន់តែរីកចម្រើន ជាពិសេសឈានទៅសម្រេចចក្ខុវិស័យក្នុងការប្រែក្លាយកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់ក្នុងឆ្នាំ២០៣០ និងចំណូលខ្ពស់នៅឆ្នាំ២០៥០។
លោកបានថ្លែងថា៖«គោលដៅរបស់រាជរដ្ឋាភិបាលកម្ពុជា គឺការបន្តកសាងសមិទ្ធផលថ្មីៗជូនជាតិ និងប្រជាជន ក៏ដូចជាការធានាឱ្យបាននូវកំណើនសេដ្ឋកិច្ចជាតិមួយប្រកបដោយភាពធន់, បរិយាបន្ន និងចីរភាព»។
លោកបានបន្ថែមថា៖«ខ្ញុំសូមលើកទឹកចិត្តឱ្យធនាគារ AIIB បន្តធ្វើការកាន់តែជិតស្និទ្ធ និងពិភាក្សាលម្អិតជាមួយក្រសួង-ស្ថាប័នពាក់ព័ន្ធកម្ពុជា ជាពិសេសក្រសួងសេដ្ឋកិច្ច និងហិរញ្ញវត្ថុ ដើម្បីស្វែងរកឱកាសជាក់ស្ដែងក្នុងការពង្រឹង និងពង្រីកកិច្ចសហប្រតិបត្តិការឱ្យកាន់តែស៊ីជម្រៅរវាង AIIB និងកម្ពុជា»៕
