ទិដ្ឋភាពនៃរោងចក្រជាច្រើននៅក្នុងតំបន់សេដ្ឋកិច្ចពិសេសក្រុងព្រះសីហនុ។ SSEZ
គម្រោងវិនិយោគចំនួន ៥៩ ដែលមានទុនវិនិយោគជាង ៨០០លានដុល្លារ ត្រូវបានក្រុមប្រឹក្សាអភិវឌ្ឍន៍កម្ពុជា(CDC) អនុម័តក្នុងខែឧសភា ឆ្នាំ២០២៥ ដែលធ្វើឱ្យគម្រោងវិនិយោគបានអនុម័តក្នុងរយៈពេល ៥ ខែដើមឆ្នាំ២០២៥ កើនដល់ជិត ៣០០ គម្រោង។
សេចក្តីប្រកាសព័ត៌មានរបស់ CDC ចេញផ្សាយក្នុងព្រឹកថ្ងៃទី១០ ខែមិថុនា នេះឱ្យដឹងថា ក្នុងខែឧសភា ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានចុះបញ្ជីគម្រោងវិនិយោគសរុប ៥៩ គម្រោងដែលមានទុនវិនិយោគសរុប ៨១៦លានដុល្លារ និងអាចបង្កើតការងារបាន ៤៤ពាន់កន្លែង។ សម្រាប់គម្រោងទាំង ៥៩ គឺ ៣៨ គម្រោងមានទីតាំងនៅក្រៅតំបន់សេដ្ឋកិច្ច និងចំនួន ២១ ស្ថិតក្នុងតំបន់សេដ្ឋកិច្ចពិសេសមាន(SEZ)។ ចំនួនគម្រោងដែលចុះបញ្ជីក្នុងខែឧសភា បានកើនឡើង ៣៤ គម្រោង ខណៈទុនវិនិយោគកើនឡើងប្រមាណ ៥៧០ លានដុល្លារ ឬស្មើនឹងប្រមាណ ២៣១ភាគរយ បើធៀបនឹងខែឧសភា ឆ្នាំ២០២៤។
បើតាម CDC គម្រោងដែលលេចធ្លោក្នុងខែឧសភា ឆ្នាំ២០២៥ គឺគម្រោងអភិវឌ្ឍន៍ស្ថានីយផលិតអគ្គិសនីដើរដោយថាមពលខ្យល់ មានអានុភាព ១៥០ មេហ្គាវ៉ាត់ នៅខេត្តមណ្ឌលគិរី ក្រោមទុនវិនិយោគ ២០៧ លានដុល្លារ, គម្រោងពង្រីកផលិតកម្មផលិតសំបកកង់រថយន្ត នៅខេត្តស្វាយរៀង មានទុនវិនិយោគបន្ថែម ២៤៤ លានដុល្លារ, និងគម្រោងបង្កើតរោងចក្រផលិតសារធាតុគីមីសម្រាប់វិស័យឧស្សាហកម្ម នៅខេត្តស្វាយរៀង មានទុន ២០ លានដុល្លារ។ ទុនវិនិយោគមកពីប្រទេសចិន បានគ្របដណ្តប់ ៨៤,៨ភាគរយ ក្រៅពីនោះមានកម្ពុជា សិង្ហបុរី កោះ Samao និងសាធារណរដ្ឋកូរ៉េ។ គម្រោងទាំង ៥៩ មានក្នុងខេត្តស្វាយរៀង ១៩ កំពង់ស្ពឺ ១៥ តាកែវ ៨ កណ្តាល ៧ ភ្នំពេញ ៦ ក្រៅពីនោះមាននៅខេត្តព្រះសីហនុ មណ្ឌលគិរី កំពង់ឆ្នាំង និងខេត្តកោះកុង។
ជាសរុបបើគិតពីខែមករា ដល់ខែឧសភា ឆ្នាំ២០២៥ ការចុះបញ្ជីគម្រោងវិនិយោគមានចំនួនសរុប ២៩០ គម្រោង កើនឡើងចំនួន ១៣៧ គម្រោង ស្មើនឹងប្រមាណ ៩០ភាគរយ ខណៈទុនវិនិយោគសរុបមាន ៤,២ ពាន់លានដុល្លារ កើនឡើង ១,៤ ពាន់លានដុល្លារ ស្មើនឹង ៥២ភាគរយបើធៀបនឹងរយៈពេលដូចគ្នាក្នុងឆ្នាំ២០២៤។ នេះបើតាមសេចក្តីប្រកាសព័ត៌មានរបស់ CDC។
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានប្រាប់ភ្នំពេញប៉ុស្តិ៍ក្នុងថ្ងៃទី១០ ខែមិថុនាថា ទោះបីស្ថានភាពកំណើនសេដ្ឋកិច្ចពិភពលោកកំពុងស្ថិតក្នុងភាពមិនច្បាស់លាស់ ហើយកម្ពុជាក៏កំពុងចរចាបញ្ហាពន្ធបដិកាជាមួយសហរដ្ឋអាមេរិក ក៏កម្ពុជានៅតែមានសក្តានុពលគ្រប់គ្រាន់ក្នុងការទាក់ទាញវិនិយោគិនជាតិ និងអន្តរជាតិឱ្យបណ្តាក់ទុនកាន់តែច្រើន។ ចំនួនគម្រោងវិនិយោគនឹងបន្តកើនឡើងបន្ថែមទៀតនាពេលខាងមុខ ខណៈច្បាប់វិនិយោគនៅកម្ពុជា និងកត្តាកម្លាំងពលកម្មវ័យក្មេងដែលមានជំនាញ កំពុងផ្តល់ភាពអនុគ្រោះ និងផលវិជ្ជមានច្រើនសម្រាប់វិនិយោគិនគ្រប់ជាតិសាសសន៍។ លោកបន្តថា ក្រៅពីនេះ កម្ពុជាក៏មានទីផ្សារជាច្រើនចាំទទួលទំនិញក្រោមលក្ខខណ្ឌពិសេសផ្នែកពន្ធគយផងដែរ។
លោកអះអាងថា៖«កិច្ចខិតខំរបស់រដ្ឋាភិបាលលើការកសាងប្រព័ន្ធច្បាប់ ធនធានមនុស្ស ហេដ្ឋារចនាសម្ព័ន្ធ ព្រមទាំងការចូលរួមរបស់ផ្នែកឯកជននឹងជួយបង្កើតនូវបរិយាកាសកាន់តែទាក់ទាញសម្រាប់ការវិនិយោគលើគ្រប់វិស័យ។ គម្រោងវិនិយោគថ្មីៗនេះពេលនេះ ក៏កាន់តែមានភាពចម្រុះ ដែលធ្វើឱ្យសរសរគ្រឹះសេដ្ឋកិច្ចកម្ពុជាកាន់តែមានភាពរឹងមាំជាងមុន»។
ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល កាលពីថ្ងៃទី២៩ ខែឧសភា ឆ្នាំ២០២៥ ក្នុងពេលអមដំណើរលោក ហ៊ុន ម៉ាណែត នាយករដ្ឋមន្ត្រីកម្ពុជា ទៅបំពេញទស្សនកិច្ចផ្លូវការនៅប្រទេសជប៉ុន បានលើកឡើងពេលជួបពិភាក្សាការងារជាមួយថ្នាក់ដឹកនាំក្រុមហ៊ុនសំខាន់ៗរបស់ជប៉ុនថា កម្ពុជា មានសក្តានុពលច្រើនសម្រាប់ការចូលមកបណ្តាក់ទុនផ្ទាល់ ជាពិសេសកម្ពុជាក៏មានទីតាំងភូមិសាស្រ្តអំណោយផលផងដែរដូចជា នៅចំណុចកណ្តាលបេះដូងនៃតំបន់អាស៊ានដែលមានការអភិវឌ្ឍប្រកបដោយថាមវ័ន្ត, ជាទីតាំងអំណោយផលសម្រាប់ផ្នែកឯកជនសំដៅជំរុញក្បាលម៉ាស៊ីនកំណើនសេដ្ឋកិច្ចដើម្បីវិបុលភាពរួម, និងមានការផ្តល់កញ្ចប់លើកទឹកចិត្តវិនិយោគប្រកបដោយភាពឆ្លាតវៃ និងមានភាពប្រកួតប្រជែងជាមួយនឹងឧត្តមភាពប្រៀបធៀបខ្ពស់នៅក្នុងតំបន់ ហើយថែមទាំងផ្តល់នូវសេវាថែទាំគាំទ្រវិនិយោគដ៏កក់ក្តៅជូនដល់វិនិយោគិនថែមទៀតផង។
កាលពីឆ្នាំ ២០២៤ ក្រុមប្រឹក្សាអភិវឌ្ឍន៍កម្ពុជា បានបំបែកកំណត់ត្រាប្រចាំឆ្នាំតាមរយៈការ អនុម័តគម្រោងវិនិយោគសរុបចំនួន ៤១៤គម្រោង ក្នុងនោះគម្រោងវិនិយោគថ្មីចំនួន ៣៨៧គម្រោង និងគម្រោងពង្រីកផលិតកម្មចំនួន ២៧គម្រោង ដែលមានទុនវិនិយោគសរុប ៦,៩ពាន់លានដុល្លារ និងអាចបង្កើតការងារបានជិត ៣២ ម៉ឺនកន្លែង។ ក្នុងចំណោមគម្រោងវិនិយោគទាំង ៤១៤ គម្រោង គឺចំនួន ២៦៤ ស្ថិតនៅក្រៅតំបន់សេដ្ឋកិច្ចពិសេស និងចំនួន ១៥០ ស្ថិតនៅក្នុងតំបន់សេដ្ឋកិច្ចពិសេសមាន។
ជារួមក្នុងឆ្នាំ២០២៤ ការអនុម័តគម្រោងវិនិយោគមានការកើនឡើងចំនួន ១៤៦គម្រោង ខណៈទុនវិនិយោគកើនឡើងជិត ២ ពាន់លានដុល្លារ ស្មើនឹងប្រមាណជិត ៤០ភាគរយបើធៀបនឹងឆ្នាំ២០២៣៕
