សកម្មភាពកម្មករប្រមូលអំបិលពីស្រែ យកទៅទុកក្នុងឃ្លាំងនៅខេត្តកំពត។ ភ្នំពេញប៉ុស្តិ៍
កត្តាអាកាសធាតុមានភ្លៀងធ្លាក់ច្រើននាអំឡុងខែមីនា-មេសា បានធ្វើឱ្យការប្រមូលផលអំបិលកំពត កែប ដែលជាផលិតផលម៉ាកសម្គាល់ភូមិសាស្ត្រ«GI» ក្នុងឆ្នាំ២០២៥ នេះធ្លាក់ចុះយ៉ាងច្រើនបើធៀបនឹងឆ្នាំ២០២៤ ដោយសម្រេចបានត្រឹមជាង ៣ ម៉ឺនតោន។ នេះបើតាមប្រធានសមាគមអ្នកផលិតម៉ាកសម្គាល់ភូមិសាស្ត្រទំនិញអំបិលកំពត កែប។
លោក ប៊ុន ណារិន ប្រធានសមាគមអ្នកផលិតម៉ាកសម្គាល់ភូមិសាស្ត្រទំនិញអំបិលកំពត កែប បាននិយាយថា កត្តាអាកាសធាតុបានធ្វើឱ្យការផលិតអំបិលនៅខេត្តកំពត និងកែប ត្រូវអាក់ខានចាប់តាំងពីចុងត្រីមាសទី១ បន្តរហូតដល់ខែមេសា ឆ្នាំ២០២៥។ ទោះយ៉ាងណាទិន្នផលដែលប្រមូលបានតិចក្នុងឆ្នាំនេះនឹងមិនបង្កអ្វីនោះទេ ព្រោះអំបិលដែលកម្ពុជាផលិតបានកាលពីឆ្នាំ២០២៤ មាននៅសល់ក្នុងឃ្លាំងស្តុកប្រមាណ ៥ ម៉ឺនតោន។
លោកបានថ្លែងថា៖«ឆ្នាំនេះយើងផលិតបានត្រឹមតែជាង ៣ម៉ឺនតោនប៉ុណ្ណោះ ប៉ុន្តែដោយសារអំបិលរបស់យើងនៅសល់ក្នុងឃ្លាំងឆ្នាំមុនប្រហែល ៥ ម៉ឺនតោន ដូច្នេះយើងអាចទប់ទល់បាន។ ជាមធ្យមកម្ពុជាមានតម្រូវការអំបិលប្រើប្រាស់ប្រហែល ៧-៨ ម៉ឺនតោនក្នុងមួយឆ្នាំ»។
បើតាមលោក ណារិន កាលពីអំឡុងខែមីនា អំបិលកំពត កែប មានតម្លៃចន្លោះពី ៥ ៥០០-៦ ០០០រៀលក្នុងមួយបាវទម្ងន់ ៥០គីឡូក្រាម ប៉ុន្តែពេលនេះបានកើនដល់ពី ៩ ០០០-១១ ០០០រៀល។ ការឡើងថ្លៃនេះ គឺដោយសារពេលនេះរដូវកាលប្រមូលផលអំបិលបានបិទបញ្ចប់ទាំងស្រុងហើយ។ ជាទូទៅរដូវប្រមូលអំបិលកំពត កែប ចាប់ពីខែមករា ដល់ ខែមេសា ជារៀងរាល់ឆ្នាំ ប៉ុន្តែឆ្នាំណាដែលមានអាកាសធាតុក្តៅ និងមិនសូវមានភ្ញៀង គឺការប្រមូលផលអាចអូសបន្លាយដល់ខែមិថុនា។
បច្ចុប្បន្នសមាគមអ្នកផលិតម៉ាកសម្គាល់ភូមិសាស្ត្រទំនិញអំបិលកំពត កែប មានសមាជិក ១៣ក្រុម និងក្រុមហ៊ុនកែច្នៃអំបិលមានចំនួន ៤ ព្រមទាំងមានសហគមន៍ផលិតប្រមាណ ១៥០គ្រួសារ។ សមាគមនេះកំពុងរៀបចំបង្កើតសហគមន៍ថ្មីមួយទៀត ដោយក្រសួង-ស្ថាប័នពាក់ពន្ធកំពុងត្រួតពិនិត្យសំណើរបស់សមាគម។
រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក ហែម វណ្ណឌី ក្នុងជំនួបសវនាការការងារជាមួយគ ណៈកម្មការទី ៩ នៃព្រឹទ្ធសភា កាលពីថ្ងៃទី៦ ខែកុម្ភៈ ឆ្នាំ២០២៥ បាននិយាយថា ជុំវិញការអភិវឌ្ឍស្រែអំបិល គឺកម្ពុជាមានស្រែអំបិលចំនួនពីរកន្លែង លើផ្ទៃដីសរុបជិត ៤ ពាន់ហិកតា ក្នុងនោះស្រែអំបិលនៅខេត្តកំពត មានចំនួន ៣ ៤៨៩ ហិកតា និងនៅខេត្តកែប ៤៩៧ ហិកតា។
លោករដ្ឋមន្រ្តីបានបញ្ជាក់ថា ចំពោះការងារផលិតអំបិលវិញ គឺនៅក្នុងឆ្នាំ ២០២៤ កម្ពុជាផលិតអំបិលបានចំនួនប្រមាណជាង ១៦៨ ពាន់តោន ដែលជាបរិមាណមួយកើនឡើងខ្ពស់បើធៀបនឹងរយៈពេល ៥ឆ្នាំចុងក្រោយ។ ជាក់ស្តែងក្នុងឆ្នាំ ២០២០ កម្ពុជាផលិតបានជាង ៩៦ ពាន់តោន, ឆ្នាំ ២០២១ ជាង ៧៥ ពាន់តោន, ឆ្នាំ ២០២២ ជិត ៣៣ ពាន់តោន និងនៅឆ្នាំ ២០២៣ ផលិតបានជាង ៨១ ពាន់តោន ។ ចំណែកនៅក្នុងឆ្នាំ ២០២៤ ចំពោះការផលិតអំបិលបានកើនឡើងខ្ពស់ ដោយសារអាកាសធាតុភាពភាពអំណោយផលដល់ការផលិត និងបានធ្វើឱ្យកម្ពុជាមិនមាននាំអំបិលចូលពីក្រៅប្រទេសទៀតឡើយ៕
